Taiwan ah Helicopter khat kia in mi 3 si, asi lakah Video Director minthang Chi Po-lin kihel

Taiwan ah Helicopter khat kia in mi 3 si, asi lakah Video Director minthang Chi Po-lin kihel

Taiwan ah vantungdawn panin Video azaih kawikawi in aleng Helicopter khat kia in mi 3 si cih CNA pan kiza hi. Tua asi te lakah Taiwan gammi Chi Po-lin pen Director leh Director, Cinematographer minthang mahmahkhat ahihi.

Adang asi nihte lakah khatpa pen vanlenghawl Pilot hi a, adang khatpa pen Chi Po-lin ii anasephuh Assistant ahihi.

Chi Po-lin pen Documentary Director, Photographer, Cinematographer cihbang in siamna tuamtuam aneikhat ahihi. Adiakdiak in 2013 kumin akihawmkhia “Beyond Beauty: Taiwan from Above” akici Documentary pen minthang mahmah a, Golden Horse Awards ahzong Best Documentary a ngahkhia ahihi.

Zanni Saturday ni in Taiwan, Hualien County sungah vantungdawn panin Helicopter tawh Video leh Photo zaihkawikawi in alen laitak vanleng kiasuk in asungah atuang mi 3 teng avek un simawk uhhi.

Taiwan Aviation Authorities te genkhiatna ah hih akia Helicopter pen kum 15 sungbang aki zangzangkhin hi a, anunung penpen sitcianna Inspection akibawlpen tukum April khasung ci uhhi.

Helicopter akiatna ahangpen bangmah ki theician nailo a, Aviation Authorities te’n kancian sanlai uh cih kiza hi.

Chi Po-lin ii zaihkhiat “Beyond Beauty: Taiwan from Above” kici Documentary Video pen Minute 93 sawtin avekin apatpan atawpdong vantungdawn panin azaihngiat “Aerial Photography” hi a, hoihkisa mahmah in minthang mahmah hi.

Video: Trailer – Beyond Beauty: Taiwan from Above

Tuaban ah Chi Po-lin ii Director leh Cinematographer asepkhopna Video pen “Taiwan from the Air”, “Taichung – The Heart Of Taiwan”, “Beyond Beauty II” cihte zong kideih mahmah hi.

Taiwan gamsung ii ahoihna teng vantungdawn panin limtak in zaihkhiathei a, leitungbup in Taiwan gamsung ahoihna te amuhtheihding in lakkhiathei ahih manin, ki paakta mahmah hi.

Related: Taiwan numei khat alupnasung buahbanglua mahmah ahih manin alawmpa tawh kikhenlawh

Zogam hoihna tezong limtak in vantungdawn pan azaihkhia siamding asawtlo in hong omdekdek tading cih lamen mahmah hang. Sawltak #zomidaily