Sushi Hual – 1 ~ Hau Za Cin

Sushi Hual – 1 ~ Hau Za Cin

Pa Ai Mung zahtakna i pia masa hi*** Florida khuapi tuamtuam, Tulsa khua, LA khua, Washington DC khawngah “California”, “Hawaii”, “Orange”, cih bang Zomi te in i hual ziahziah ciangin tua gam, tua thei (fruit) a hual hilo in SUSHI hual hizaw hi. A ‘shi’ hilo (a tak) zong ahual om ahi tam maw (thei sam kaa’ng)!

Su = tuithuk (vinegar), shi = buh (rice) cihna hi a, tua ahih leh Sushi cih pen tuithuk tawh a kidiah buhsih (‘vinegared rice’) cihna hilel hi. Tuithuk in buhsih hiing saklo ahih manin Buhsih huan khit ciang tuithuk tawh tawk ding, kimhel ding, tua ciang votsak ding, tua ciang a vot a tuipaanteh (sea weeds) tawh zial ding, i zial khit ciang hual ding, tumtan ding, tua ciang nek theih dinga kuang tawh luikhia ding cih dan hi.

Kei zong ka kisin mawkmawk leh lawmte ‘kum 8 ka hualta’ a cite kiangah bel i manlang dan kibang kei mawk! A man bung nih a hual khit ciang en bel tawnkhat kihualzo thamta sam hi. Hoihtak a Dragon Roll bung 4 i hual bel sun annek hun ngeingai pah sam e!! Manlah cih pen ziakai ding lauhman hi lel hiven .

Sushi limna pen Tedima Niangtui Sai bang mah in, ‘a theilote bek in paisan’ hih tuak hi. Kei zong ka nek khak loh hangin Zomi te Sushi sai tuamtuam ah vakkawikawi kha ngei ing. Hoih thei mahmah, kiciang ziziai hiven!

Sushi hual pen Zomi te ading ngiat a Pasian in a bawl tawh kibang kasa hi. Zomite tawh kiho masakna zong omvetlo in Sushi Buhtang namkhat zong ‘ZOMI’ mah na ci pah uh hi. ‘ZOMI’ buhtang Sushi in kihual ziahziah hi. Florida ah Zomite in na pan uh a, tuni tan in kizomto suak lai hi.

Pawlkhat in inn hual khia a, pawlkhat in moto hoih mahmah hual khia a, pawlkhat in zi ding hualkhia a, pawlkhat in pasal ding (a dik mah hi). Pawlkhat in minphatna khawng zong hualkhia in, innkuan nuntakna nangawn hualkhia in, pawlkhat in Pasian gam nasepna ding hualkhia in, innsung, khuasung, gamsung bek thamlo Pasian gam zaina zong semkhia uh hi.

Kimawl ciangin kimawldan diktak mah zui in (Play the games in the spirit of the games) cih mah bangin Sushi hual ciangin zong Sushi hual dan ding diktak mah in hual ding kisam hih tuak hi. Ahang pen kimawl mah bangin a dan i zuih kei leh kigualzo lo hih tuak hi.

Kawlpi ah mi khat in, “Nalemuh a omlai teng Kawlgam nusia kei ning” ci hi, kici hi. Kihosimtheihna, kigullukna a omlai teng ka nungta ding hi cihna hi. Ahi zongin Zogam thak America ah bel tuabanga ‘kihosimtheihna, kihosiamna (nalemuh) cihte tamlo (a omlo bel hi kenteh) ahi tam maw. A om zongin kithei kha leh bel thukhenna mai ah guallel kha mawk ding hi. Tua hi a, Sushi hual zong a hual ding dan takmah a i hual kisam hi. Theih ding omte thei a, siam ding kisamte siam a, siate, tungsiahte muan ngam dinga siamtak a sep ding kisam kha ding hi. Tomvei noptuam pak pen sawtpi kikhomlo thei hi.

Zomi te adingin nek leh dawn bek hong pia hilo, neih leh lam leh midang huhzawhna, panpih zawhna hong neisak nasep kician khat ahih manin siamtak, siam mahmah a sep ding hi. Suangpi tunga inn lam bangin kingaihsun ni.

Taiwan ka omlai in i ZONET sungah khatveivei, “Zomi Pastor te nangawn in US a tun ciang Sushi hual…” cih ka mu ngei tawh kibang hi. US ah tua bang a hitakpi hiam cih ka tel kei a (Pastor ten Sushi hual), ahi zongin Pastor hita kei leh nekna dingin nasep kisam himawk ahih manin Pastor zong Pastor lo zong nasep khat neih kul mawk hi.

Tua manin Pastor te zong nasep dang tampi omkhollo ahih manin (Zomi galtaite nasep theih pak ding nasep tamlo ka cihna) Sushi mah a hual kei uh leh hamsa dingin ka um hi. Sushi hual mah nekzonna baih pen lai suak ahih manin; leh Sushi hual mah Zomi te in i septheih nasep kician ahih manin (minam dangte in sem siam khollo), Zomi te i mel zong Japan te tawh kibang hiven, piangsakpa gelkholhna – tua hi thugen siamte in Thupha Ngah Minam a cihna uh.

Tua hi a, a gal pan et leh a mun ah muh kibang lo hi.

Sushi hual pen Zomi te in i siam mahmah bek hilo a, a hilhthei ding, Sushi Master semthei dingin i hanciam ding hoih tuak kasa hi. Manager khawng i om pah ding ka lamen a, tua dingin inspector khawng zong i om ding hoih tuak kasa hi.

Hibanga a paitoh zel leh hun khat ciang ‘Sushi hual kidemna’ cih zong omleh kilawm hi. Zomi in mainawt zel, khawl kei ni.

[Hih ka laiat kawmin California Roll bung khat khawng ka kiangah om leh ne kawmkawm nuam mah siing maw… he he…] Dr. Hau Za Cin (Phuitong Liim)

*** Upa te in, “Phulum phul nang Leikha in pet let,” a cih mah bangin Pa Ai Mung pen America a tung masa lakah Zomi te adingin Sushi hual theih hi cih a mukhia masa leh Sushi hual nasep a kipan masa hi a, ama kiang pan mi tampi in sinin amau Sushi sai tuam nei ciat uh a, tua banga kiban paitoto pen – tu hun in amah a theikha lo te nangawn in Sushi hual siamta, nekzonna namkhat hong suakta hi. Tua manin Sushi Hual tawh kisaia Zomi te ading a LEIKHA amah hi. Lungdam. (HZC)