Sungkhakden khat nga gul ahingin ataw pan hento in, agil nagawp in kikhei khiakik

Southern China ah pasal kum 49 aphakhin khat asung khakden “Constipation” ahih manin, bangcileng hoihding cih kankawikawi hi. Pawlkhat in tuabang in sungkhakcipden te nga gul “Eel” ahingin taw panin hento leng hoihhi ci’n gen uhhi.

Tuapen “Folk Remedy” ngeina zatui kibawlzia khat kici ahih manin, amahzong alung akhakcipden pen nawngkai salua ahih manin, nga gul ahinglai in ataw panin hento cihi.

Guangzhou Daily te Tuesday ni in agenkhiatna ah hih thupiang pen ataktak hi a, China, Guangzhou khuasung aom pasal khat in ataw panin nga gul ahinglai “Living Eel” ahento takpi cihi.

Tuabangin nga gul ahinglai in ataw pan aki hento tepen sungkhak anoptuam bekthamlo in damsuakthei ci’n kihilh hi. Ahi zongin tua ataw panin ahentoh nga gul in asungkhak noptuam saklo bekthamlo in, agilzangsung nasakgawp ahih manin nungkal in zato kipuak cihi.

Nga gul pen ihtheihsa mahbangin ahiam mahmah hi a, ngasa dangdang te tawh kibanglo hi. Tuisung bekthamlo, sehnel lak, buan lak, suanghum lak cihkhawng ahzong taalgawp, kipeigawp in apaithei hi a, tuabang ganhing pen gilzang sungah lutmawkleh baihhetloding cihpen mihai lobuangin a ngaihsun theihding khat ahihi.

Hih Chinese pasalpa ii ataw pan ahentoh pen golsimtham a, alu pen Ping-pong Ball cia phading cisawnsawn hi. Asauna zong letmat 20 (pikhat leh alangval) sau cimawk hi.

Agil anatluat ciangin tua pasalpa in Guangzhou Dongren Hospital ah kilak ah, ahi zongin ataw panin nga gul ahentohlam gennuam paklo in, imcipphot cisawnsawn hi.

Siavuan te’n agilsung a etsak uhciangin nga gul “Asian swamp eel” acihte mu uh a, patau ngeingai in Surgery bawlsakpah uh cihi.

Dr Zhao Zhirong kici siavuanpa’n agenna ah agilpi kakhei uhciangin a ek leh a an nek te lakah nga gul golpi khat kamu uh cihi. Tuaban ah a sinkha “Pancreas” zong kitam in thuak hamsa samahmah cihi.

Guangzhou Dongren Hospital panin nasem te genna ah hihpa pen zato hongtun ciangin agilpen Air Balloon bangliang in puakgawp cihi. Apuak bekthamlo, natcihtak in nasa cihi.

Doctors te’n agilsung panin nga gul ahing mahin lakhia uh a, tua Eel pen asauna pikhat leh letmat sagih (half-meter) pha cimawk hi.

Sungkhak theite’n hihbangdan in nasin kha hetkei unmaw 🙂 ZD Sawltak #zomidaily

Leitung ah nisim in thulamdang, a uphuai lolo tampi piangden hi. Thuthang khatpeuhpen uphuai kei ci’n na pumnialgawp sangin na theihbeh nopleh Research bawlbeh in.