Suang manpha khuk tampi ~ Michael Pau

Suang manpha khuk tampi ~ Michael Suan Lian Pau

Nidang lai Persin gam Indus gun gei ah Ali Hafed kici Lokho mihau khat teng hi. Innmun logam hau mahmah in nektheih dawntheih mehteh mehgah tuamtuam cinga, nuntak nuamsa in hau mahmah hi. Neih le lam kicingin lungnuam a, lungnuam ahih manin zong hau pah hi. Ni khat mihaupa Ali Hafed inn ah nisuahna lam pan mipil khat zin tung hi. Tua zinpa in leitung piancil a kipan theihhuai thulela tuamtuam gen hi. Pasian bawlsa nate khempeuh lak pan Diamond hohina le manphatna zong gen hi. “Na khutpi cia a pha Diamond nei lecin gam khat na leizo ding hi,” cih zong gen lai hi.

Ali Hafed in tua nitak Diamond hoihna le manphatnate a zak khit ciang zawngkhal takin lum hi. Aneih alamte bei mang hi loin, amah le amah zawng kisa hizaw hi. “Diamond deih sing ee” cih ngaihsun kawmkawm in zan thapai limtak ihmu thei lo hi. Zingsang phalvak ma in tho khiankhin a, a zinpa kiangah “Diamond koi ah om ding hiam?” ci’n dong hi. A zinpa in zong ihmut suak kawmkawm in “Mual sang mahmah nih kikal a luitui luang khat zong in, tua luitui sunga sehnel khangte lakah Diamond om ding hi,” a cih ciang Ali Hafed in a neisa inn le lo, ganhing a kipan avekin zuakin a zi a tate dong ciang nusia in Diamond zong dingin kuankhia pah vingveng hi.

A masa in Palestine gam, tua pan Europe teng ah Diamond zongin pai kawikawi khit ciang, a sum neih teng bei in, zawng mahmah a, Spain gam Barcelona ah si hi. A lunggulh mahmah Diamond mu zo loin si hi. Ali Hafed i innmun logam teng a lei lokhopa in lo sung luitui luangah bawng tui a piak laitakin, lui sungah suang khang khat ate leklek mu in, hoihsa ahih manin la in inn ah kem pong hi. A sawt loin nisuahna lam pan mipil zin hong tung leuleu a, inn sunga Diamond a muh ciang “Oh! Hih diamond! Ali Hafed hong tungkik ta maw?” ci in dong hi.

Lokhopa in “hong tungkik nai kei, tua zong Diamond hi kei e, lo sunga lui sung pan hoihsa a ka lak pong hi,” a cih ciang zinpa in “hi pen Diamond hi mah.” A nih un lui ah paikhawm pah uh a, Ali Hafed i lo, luitui luang sung pan Diamond tampi tak mukhia uhi. Tua mun pen leitung tangthu ah Diamond khuk l ian pen ahi Gol conda Diamond khuk hi a, l e i tungah a minthangpen le a golpen Diamond England Kumpinu’ kham lukhu tunga a tuang Koh-i-noor Diamond kimuhkhiatna mun ahi hi.

Ali Hafed in leitungah a lian pen Golconda Diamond khukpi nusia in Diamond zong dingin a kuankhiat mah bangin ei zong i nisim nuntakna ah Pasian hongpiak thuphate mu khalo/sang siam loin i guallel thei zel hi. Tua manin tuni pan kipan i lunggulh gualzawhna, matutnate Pasian in bangci hong piak hiam cih a nai penna mun, i pumpi, i khuak, i lungsim ngaihsutnate le i kim i pam ah zong siam/san siam nadingin hanciam ciat ni, ci-in Tongsan pan i kihanthawn hi. Michael Suan Lian Pau