Suan leh Khak ~ Pau Tun Thang

Pasian in mihingte suan leh khak nei a, a khang a pung dingin hong deih hi.Pasian in leimi te a bawl dan ah numei leh pasal ki lamdan na pipen bang hiam cih leh; numei te bek in naupai thei se uh hi.Numei khat peuh peuh in pai theilo laideep uh hi.A taangpi thu in kum 15-49 in paai thei uh a,hi lakah zong ta nei theilo(Sterility) awm sawn lai uh hi.

Numeite’ nau neih theih hun sung pen kum 34(49-14) sung ahi hi.Numei khatin a ta neih theih cil a kipan in kidalna(contraceptive) bangmah zang lo in ta nei to ngek ngek hi zen leh 25 bang a nei man ding dan hi ta zen hi.Ahizongin hizah ta a nei kithei khawl lo hi.

Leitungah North America a teeng Hutterites minam te in ta tam neih pen uh hi.Hih minamte in naukhak cihte zang vet loin mikhat i’ ta neihzah average 11 pha hi.Misiamte sinna panin leitungah nau piang numei sangin pasal tamzaw den hi.Numei 100 ah pasal 105 bang dan in kituat thei hi.

Leitung hong khan touh zel ciang mite in nuntakna, neek leh taak zon na hoih hong lunggulh uh hi.Ta tam neih luat pen khantouhna dal a hih lam mite in hong phawk thei uh a,ta tam neih sang tawm neih in Quality zaw leh cih pen mi tamzaw deihdan hong hi ta hi.Tua ahih manin birth control (or contraceptive measures) tuam tuam ki zang ta hi.

Gam khangto te ah mite in ta tam neih nawn lo uh hi.Tua manin a nuntak zia uh zong sensang hi.Ahizongin gam zawng ta ta in ta tam neihin hih pen Innkuan khanmawh bawk khat hong suak hi.

Hinna nei veve te lakah mihing leh ganhing, vasate i kibat lohna pen mihingte kikhangto thei a ganhing, vasate khangto lo uh hi.Vakhu in tuma kum tampi peka a bu bawl dan ngei mah in tudong bawl lai hi.Ahizongin mihingte ngaihsun leeng hunkhat khit hun khat a ki lamdan zia ki thei thei hi.Ganhing Thankikte in ta neih theih zah zah nei mawk uh hi.Mihingte bel Pasianin pilna siamna guanin naukhak dan a tuam tuam hong piang hi.

Pasian’ hong piak pilna siamna te zat ding mah ahi hi.Thankik banga neih theih zah zah suan le khak neih ding hi lo hi.Sang kivan sakna ahizongin Contraceptive measures a tuam tuam te zat huai hi.Tuhun ciang Quality Children neih ding baih nawn lo hi.Pilna khawng sum a lei tang tang kul ta.Gentehna in ta 8 bang a nei pa in a tate puan 1 tek leisak nuam hi leh khat 100 manin tuat ni, 800 hong hi pah hi, sang hoih ah kha nuam lai leh a haksat veve ding dan.A leh lam ah ta 3 bek nei pa in tua 800 pen kicing takin zang thei zaw kha ding hi.Hih gentehna pan ka gennop kitel thei in um ing.A piang nai lo ta ngaia kap awm sam lo aih teh, ta neih theih zah zah neihna khawhun hi nawn meel lo hi!

N.Pau Tun Thang
Mumbai, India