Stalin bawlsiatna nuai ah Lutheran Pawlpi (1939) ~ Rev. Dr. Ngul Khan Pau

Stalin bawlsiatna nuai ah Lutheran Pawlpi (1939) ~ Rev. Dr. Ngul Khan Pau

Joseph Stalin thupiakna tawh 1939 in Russia gam sunga Lutheran Pawlpite’ biakinn leh sanginn khempeuh kikhak hi. Amasa in Lutheran Pawlpi kem Pastorte kithat a, pawlkhat thong (jail) ah kikhum hi. Biakinn kisusia in, Lai Siangtho, labu leh biakna laibute kipaimang khin hi. Lutheran Pawlpi mi innkuante khenthang uh a, pasal khempeuh army sungah lutsakin, numeite leh naupangte Russia gam mun tuamtuam khenkhia uh hi. Pawlkhat gamkeuna mun a dangte Siberia gamvot gamah puak uh hi. Hun tomkiha sungin Russia gam sunga Lutheran Pawlpi a beisiang tawh kibang hi.

A kithehzak Lutheran nupite in amau tunna ciatah a Pawlpi uh nungtasak uh hi. Pastor om nawn lo, biakinn om lo, Lai Siangtho leh labu zat ding khat zong om nawn lo hi. Ahih hangin tua bang haksatna in amau lungkiasak lo hi. Amau tawh kinai thu-um mi kizong uh a, inn ah kikhawmin khat le khat thu kingetsakin tha kipiatuah uh hi. Lai Siangtho kammal a theihte uh gelhkhia uh a, la zong a lotngah ciat uh hong gelh uh hi. Tua bangin biakna zat tangzang (Catechism) zong amau theih teng lai tawh hong gelh uh hi. Mat le sat ding lau loin Pasian kiangah biakna hong nei toto uh hi. Amau tate’ tungah Khristian upna zong hilhin, “Pasian om lo” a kici Communist gamah upna khah loin na lenkip uh hi.

Kum bangzah zawh hiam ciangin a pasalte uh galkap panin hong tawp thei uh a, amau zi le tate kiang hong zuan uh hi. Lamdang a sak mahmah uh ahih leh bawlsiatna khauh takin a om hangin amau upna na nungta bek hi loin midangte zong upna sungah na lutpih uh a, Pawlpi na khangto mahmah hi. Tua ciangin mki ding upa khawng hong kitel kikin, Lutheran Pawlpi hong khangto kik hi. Lai Siangtho sanginn khawng hong nei-in, pastor tampi hong kibehlap hi. Communist vaihawmna hong bei-in Lutheran Pawlpi khangto semsem hi.

Hih panin i ngaihsut ding tam lo kong koih hi. Biakinn pen Pawlpi hi loin, Pawlpi i cih pen thu-um mite hizaw hi. Hih ka gen ciangin mi pawlkhat in Zomi Christian Fellowship bang Pawlpi hi kei, ci mawk uh hi. Amau ngaihsutna ah Zomi Christian Church kici leh Pawlpi a ci ding uh hi zen hi. I biakinn kikhak hangin biakna kikhak thei lo hi. Lai Siangtho leh labu et ding nei kei leng i lotngah Pasian thu le la bangzah i nei hiam? I pian a kipan kikhop simin la i sasa uh a, tuni dongin et loin bangzah i sa thei uh hiam? Lai Siangtho thu i lungsim sungah bangzah i khol hiam?

I zawhna ah 1950 pawlin Communist ki-ukna Poland gam khuapi Nowa Huta ah, thu-um mi pawlkhat in biakinn om lo ahih manin khuapi laizangah paikhawmin kikhopna nei khawm uh hi. Tua khuapi makaite’ kiangah kikhopna ding mun a nget uh ciangin, biakna ding mun om kei na ci uh hi. Amau zong munkhat ah Singlamteh hong phut uh a, tua kiangah lasakna, Lai Siangtho simna le Nekkhawm (Holy Communion) hong nei uh hi. Khuapi ukte’n a Singlamteh uh lakkhiatsak, paihsak uh a, amau a nipi kik ciangin Singlamteh phut kik zel uh hi.

Tua ciangin khuapi makaite’n Singlamteh phut thei nawn lo ding ci-in thupia uh a, amau zong Singlamteh om loin a kilemna munah kikhawm koikoi uh hi. Polish Khristiante’n, “Pawlpi i cih pen a inn (building) hi kei, eite i tutkhawm i phatkhawm i nekhawm ciangin Topa’ eite laizangah hong om a, tua in Pawlpi taktak hi,” cih mu uh hi. Topa phat in om hen, “Ama minin mi nih le thum bek nangawn a kikhopna peuhpeuhna ah kei ka om hi,” Topa’n ci hi. (Matt. 18:20). Rev. Dr. Ngul Khan Pau