South Korea gamsung ah President thak kiteelkik khinta: Moon Jae-In

South Korea gamsung ah President thak kiteelkik khinta: Moon Jae-In

South Korea gamsung ah numei President asem ahi Park Geun-Hye pen golhguk vai tawh President panin aki khawlsakkhitzaw President aomlo ahihi.

Ahi zongin Presidential Election kibawlkik a, Moon Jae-In in President kidemna gualzo cih Tuesday ni in ki tangko khiata hi. Moon Jae-In pen Wednesday ni in President dingin kiciamna “Oath of office as president” neitading hi.

President Park Geun-Hye pen tukum March khasung in Corruption Scandal vaitawh buaina aom ciangin nasep kikhawlsak a, tu’nzong akimancip ahihi.

Tu’n President angahthak ahi Moon Jae-In in abeisa President Park Geun-Hye ii hunlai in akikoihsa Cabinet leh Presidential Staff tezong amanlang in lumletding cihi.

National Election Commission te genna ah Wednesday ni zingsang 8am hunin President ngahthak Moon Jae-In pen kiciamna neiding a, President nasep kipan tading cihi.

Inauguration Ceremny aneihkhit ciangin nitaklam 2:30pm hunin President ahihna tawh Moon Jae-In pen Media tetawh kimu masakpenna neiding uhhi.

Prime Minister dingmunpi, National Intelligence Service makaiding, Chief of Staff, Chief Bodyguard cihtezong amanlang in panmun piakna neiding hi ci’n Parliament Official te’n genkhia uhhi.

Yonhap News Agency te pulakkhiatna ah Provincial Governor Lee Nak-yon pen Prime Minister panmun kipiading ci uh a, ahi zongin President ngahthak Moon Jae-In ii Spokesman te’n tuavai tawh kisai in bangmah kuppihna neilo uhhi.

Moon Jae-In pen Human Rights Lawyer leh Politician khat ahihi. 24 January 1953 kumin asuak hi a, tu’n kum 64 phakhinta hi. South Korea gam adingin a 12 na President ahihi.

Moon Jae-In pen South Korea, Geoje ah suak in unau 5 lakah a upapen ahihi.

2012 kum inzong South Korea Presidential Election ah meekuang lui in akidem ahihi. Anunung ah Park Geun-Hye tawh kidem uh a, tawmciklik tawh lel citciat ahih manin Park Geun-Hye in President dinmun hong ngahto hi.

Related: Tulaitak Korea Actors lakpan sumlut tam angah penpen mi 10 te

Ahi zongin Park Geun-Hye pen Corrpution tawh March 2017 akipan buaina aom ciangin President nasepna panin ki khawlsak in, tu’n Moon Jae-In in President dinmun hong ngahtokik ahihi. ZD Sawltak #zomidaily