Solkha tang nuai ah Tedim khuapi (13) ~ Hau Za Cin

Solkha tang nuai ah Tedim khuapi (13) ~ Hau Za Cin

Tedim ka nusiat ni ding zingkhua hong vakzo ahih manin ka van teng ka domkhia a, ka ciahna ding mawtaw nai 6am a hong tung ding ngak in innkatau ah ka khuadak uh hi. Tonsim leh Tonzang lamkabom lampi gei lian ah meiphual kisep in kuang luahluah a, a gei ah mei awi mi 7 ding khawng kiho lulu uh hi. Zotaang Bus khawlna leh ngakna mun ahih manin amau Zotaang Bus tawh Kawlpi pai ding hi in ka um hi. A sawtlo in Tonsim lam pan mawtaw hong tung ziahziah a, van a khop teek un pua in a tungah mite tuang venvan lai hi! A mawtaw nungzangguh kham tak in ka um hi. A pei bang kipei valval zolo in kipei diakdiak leh kilawm kasa hi.

Zogam mualtung vui leh buan lak ah hong tungtung thei cih pen a lamdang hi a, mihing sangin thahatzaw ahihna kimu mahmah hi. A sawtlo in Tedim khuasung lam pan Kawlpi lam zuanin ekleiza (fertilizers) pua mawtawpi nih hong tai phei leuleu a, a mawtaw mei vak pempam in hong ging phei dapdap hi. Zotaang Bus ngakte lah a mei uh tum deuhdeuh in khua lah vak siang deuhdeuh ta ahih manin ko tuanna ding ka mawtaw uh zong hong tung phei pah dingin ka lamen uh hi.

Mawtaw ngak kawmkawm mah in hong kha dingte tawh ka khuadak uh a, khua vak siangpianta cih ciangin iPhone 4S lakhia in camera tawh maan ka zaih kawikawi a, khuasung lamdung ka ciahsan pah ding ka zaih kawm in GZA Khawmpi a puankhai (banner) zong ka mu kawikawi hi.

Lamgei a suanggawina mawtawpi leh inn hoihnono te hong kidawk siang mahmah ta cih ciangin ka mawtaw tuanna ding uh hong tungin ka van teng uh ka guang pah uh hi. Kawlpi pana sun nai 11:00 a lengkhia ding vanleng delh nuam ka hih manun nai 6:00am a pai ding pen nai 6:10am bang hong himan ta a, ka lungsim in ka kinawh pian mahmahta hi. Hong kha khempeuh te tawh khut kilen in, thungetna leh lungdam kohna tawh ka kikhak khit uh ciangin mawtaw hingsak in ka dingkhia pah uh hi.

Leilum Sikha Mulo:

Leilum khua ka taitoh laitak un ka mawtaw uh a mai zawlpi kitansa, zan a bawl uh pen kho lo, kiplo in kiliing luapluap zel ahih manin ka mawtaw hawl uh Pa Kap in, “Bawl pak ni” ciin hong khawlpih a, workshop neipa zong na zingtho lian, a lawmnu zong innkatau ah zing zuntha na dingto lian, a maiphiat laitak, a tapa innsungah mei gei ah mei-awi in a tu bilbel ka tuakto uh hi. Pa Kap leh workshop neipa in ka mawtaw uh bawl a, “A sawt diam?” ka cih leh “Sawt lo ding,” ciin hong dawng hi. Nai khat dektak hong sawtto in nai 7:00am pawl in ka taikhia kik thei pan uh hi.

Tua sungin bel inntekte ningzu um mei geia kitung ‘tuk nih bel’ acihte uh, a inn bang ah kisuang “914: ZOMI”, Sailing, Hei, Thangmual dawna zing nisuak laitak, leh ka tuanna uh Pa Khai mawtaw tawh maan kila man ka hih manin ka lungkim, ka nuam veve hi. Ahi zongin nai 9:30am peuhmah in Kawlpi kitungnuam ahih manin nawhsa a taai kul sa in ka tun manloh ding uh lau kawm, lah cih theih dang om tuanlo in ka patau sim mahmah hi. Vanleng lap kei leng ka vai tampi kipelh dinga, vai tampi sai kik kul ding ahih manin lungsim thungetna tampi ka nei hi.

Pasian huhna tawh leilum sikha lah mulo, a thawm lah zalo, a ham lah zalo ka hih manun muizang takin ka mainawt thei zel thei uh hi! Lampi ah suanghuum kiphah phei zihziah ahih manin Sezang khuakhung to khawng ziiit ciin ka tai theilel uh hi. Vasate zong zingtho tung ahih manun lamgei khawngah lengsuk lengto nailo in lamgei a singkung khawngah tu hithiat lai uh a, khuadam, khuavot pian ahih manin amau zong tangngawh ngamlo uh hiding hi. Zomi te teen cilna Ciimnuai paina lam Saizang lamkabom khawng ka tai kheng vangvang uh ciang ngaihsutna hong tuam hanhan sam hi. Pai kik cianga ka muhnop gam, ka zuihnop lampi ahi hi.

Dimpi khua khung phei khawng ah khuamui kai ciuceu in a khang kuamsung khawng meii kaai ciciai in khua kidak theilo a, pat pho mah bangin na pak viatvuat a, zangtam bangin na kizalh didia hi. Sozang tun toh ding ciang luidung ah tui dawna vak kiaukiau Luivavom leh Lailen te na tawn keetkeet uh hi. Mawtaw lampi bawla nasem lamgei a giakte zong na zingthota uh a, lamgei ah tui keu tawh suak in a ha peuh na nawt zangzang uh hi. A zi te uh zong a giak pawl om a, naungek khawng zong om in kap vangvang hi. Anhuanna meikhu lah a giahna uh sikdaalpek leh tuipuan kikhuhna kawm pan hong zamto ngeingai hi.

Thangdung ah Maan Kila:

Sozang ka tun uh ciangin khuasung ah vanzuak leh lamgei ah van kizuak kigualto zeizai a, mawtaw khawlsak in a lei man bel ka hi kei uh hi. Vok leh Kel leh ak khawng zong vak khia in lamgei ah pai laanlaan uh hi. Khuasung – lamsak lamkhangah inn kilam ahih manin khuapi sunga inn kikal a mawtaw tawh vak mah tawh kibanga, to tai zalzal in a khuakhung ka tungto pah uh hi. Khuamual ka suah uh ciangin zingni suak in Thangmual dung teng na sawi kap hihiai in phalbi lai nisuak bangin na neem dildial a, hong lungzuanhuai mahmah hi. A mual lah singkung po lo in kiak leh tuallo bek na eng dihdiah hi.

Sozang khua pen nitumna lam mualpangah om ahih manin nisuak in kap pah lo a, amau khua pan nisuak mu dingin mualtung kikahto in Kawlpi lam tuaksuk nadingin mualdung kantan in a lehlam ah kituaksuk deudeu hi. Mualtung ka tuntoh lian uh ciangin mawtaw khawlsak in “Hih lai peuhmah maan kizaih kei leng kisik ding hi hang” ciin ka kumkhia uh hi.

Mualdung saupi va zui phei in hoihsa lua ka hih manin nakpi ka awnggawp hi. A gal bang kithawn zezen in ging vangvang sam hi. Ahi zongin huihvot nung hat lua vangvang ahih manin sawt ka om ut kei uh hi. Maan kizaih mengmeng in lopa hing dipdep leh kiak no mikmekte zingsang tui tawmtawm pia kawikawi in ka paisan kik uh a, a mualdawn zong ka ento uh a, ahi zongin ka kahto man kei uh hi. Pai kik cianga dingin ka koih mai hi.

Ngeisok pakkang mu khata!:

Thangdung hoihna maimit suan pheiphei in ka khuadak kawmkawm uh a, singkungte hoih in pakkungte zong hoih mahmah hi. Ngeisok paksan leh pakkang zong na pak phei kawkawi ahih manin a kigengen ngeisok pakkang a mu ka hita hi! A maan bek ah ka muh pen tuni 18 March 2014 ni in a takpi in ka mittang tektek tawh Zogam mualhoih pen dungah ka muta hi. Topa ei dingin hoih mah si!! Lampi lah coal tar (suangmeihol tuivom) kizut phei khinta, Kawlpi dong, ahih manin mawtaw lah kisiing nawn seselo, lampi lah gol zaw ahih manin kinawhtai theita hi.

Akluai ah bawngnawi khum haipi khat dawnin ka khawl uh a, ankam limci mahmah lom 7 ka lei khit uh ciang sumkhek laklawh ahih manin thawhbat tuun thum ka behlap vet a, Kawlpi zuan in ka taai kik vangvang uh hi. Lamgei ah Sial, Bawng, leh ak te na gamta leihleih uh ahih manin Zomi te khua hi cih kitel mahmah hi. Tai suksuk in lampi ah Kawlpi pan hong taito Zotaang Bus leh adangdangte ka tuak panpan ta uh a, “Haimual Mawtaw” te zong ka tuak suksukta uh hi.

Taingen tungsuk in Zogam leh Zomi khuate nusia suksuk in Kawlpi ka naih suk deuhdeuh uh a, lampi ah suanghum sunga nasemte lah nasep kipan dingin mei na sem panpan uh a, nasep na ding tu leh temte na lakhia in na mabung panpan uh hi. Pelh suk mengmeng in Zogam huihsiang lah kinusia deuhdeuh a, nisuak lah sa pianpianta ahih manin ihmut suak simsim hi.

Lamgei a vaupak kang zeizai leh kuangkuah pak san hilhialte leh suaklu kung pote ka et suksuk kawm in paknamsia (a pak nuaiin namh leng mit pan khitui luangsak ziahziah) pak khawng zong ka mu suksuk hi. Ka deihzah in vasa ham tam zaklo ka hih manin ka lung bel nuam mello hi. Vasa te ihmut lah hun hinawnlo, singkung lopa a tam hang singgah a bop dinguh omlo a vasa zusa tamlo hiam, ahih kei leh kivai kibeng mangkhinta hiam cih hong ngaihsunsak hi.

Kawlpi khua kidawk in lamsak lamkhanga kisuan Dolsing kungte zong a nah uh keu in pulh diahdiah a, ko zong Kawlzang ka tungsuk hiaihiai uh hi. Lampi ah Nahtang khil 4 lei in zuntha in ka khawlpak uh a, zingsang nai 8:45am hita hi. Nai 9:30am a Kawlpi vanlengtual tungman ding hanciam ka hih manun Zogam leh zanggam kigamgi ka tunsuk uh ciangin nai 9:05am hita a, Kawlpi University kongmai ka tungsuk uh a, taisuak in Singunau, Tahan, Kawlpi, ka tun uh ciangin zingsang nai 9:30am sat nailo hi!

Tedim Leilum pan nai 7am a ka kipat khiat uh zingsang nai 9:30am in Kawlpi vanlengtual a tungsuk ka himawk uh hi.

Vanlengtual delhsuak ding, vanteng ap dingin tua khit ciang vakkhia kik ding ciin ka sawm uh leh Leipi lei ah galkap a dimin na kigual uh a, tua lampi tot phallo in a nawllam pek ah ka pelh uh hong kul hi. Ulian khat pai ding ahih manin tua lei ah kuamah paiding a phallo na hi uh a, ka ciahkik lam uh ciang na kihongta hi. Ka pelh kawm un ka sunghpa Pa Cin Lian Thang Valte leh a tanu Mawmawi 7months Kawlpi Zatopi ah cina a lumcip ka va veh a, amau gimpian uh ahih manin oxygen khawng na kithuah liapluap hi.

Kawlpi Zato ka hawh ding laitak un Sagaing leh Maguai Division ah Health Director in zato en in a pai laitak ahih manin galkap tampi mah in lampi na khaktan leuleu a, zato sung nangawn hong lutsak lo taleuleu uh hi! Huiha!! Gamdang khawngah uliante zato a pai hang cinate ading, mipi adingin a dongkholh in omlo mah hiven maw cihcih bek in om hi.

Vanleng lap lua liang leuleu: Ka tuanna dinguh vanleng Air Bagan pen ka ticket tungah sun 11:00am in Kawlpi – Zangkong leng dingin kigelh hi; tua man mah a zingtunga Tedim pan Kawlpi a delh ka hi uh hi. Ahi zongin Kawlpi vanlengtual ka tun uh ciangin a nasemte zong na tung nailo uh hi. Kongcingpa in, “Nasemte zong hong tung nailo a, noh tuanna ding vanleng bel hong tung pak nailo ding hi,” hong cihsan ziau hi! Kileh kik in Lia Muangnu tunna pite kiangah ka khawl uh hi.

Kawlpi khuapi hausapa Kawlpi Mayor pa inn pan Air Bagan office hong hopihsak uh a, ka vanleng uh nitak lam 12:30 P.M. ciang hong tu ding, tua zawh nai khat 1:30 PM in lengkhia kik pan ding ciin hong gen uh hi. Vanleng lap lua ka hizen uh hi. Vanlengsung ka lut taktak uh ciang ka tuanpihte un zong Tedim pan hong delh uh na hi a, amau bel vanleng tun hunding thei uh ahih manin zingann nek khit nai 9am pawlin Tedim pan hong paisuk pan uh hi.

Theihlohna gam ah bel gamtat dan a kikhial thei mah himawk ei, ahi zongin a hun lapa pai hamtang pen kikhiallo hizaw.

Sia Do Kham zi leh tate tawh tuang khawm: Ka gelkholh uh zong hilo, ka kiciam uh zong hilo, Sia Do Kham zi Add leh a tanu Mary, a tapa Joshua tawh ka tuangkhawm kha uh hi. Vanleng ngakna sung ka lut uh ciangin amau zong hong lut uh a, “Eh! Noh lah na himawk vua,” ciin ka kikhutlet keei uh hi. Sia Peter Mangmu, Sia Do Kham naupa tawh hi in nuamtak in ka kithuah thei vua, Mandalay ah vanleng khekna ah nai 3 sung mah vanlengtual ah coffee dawn kawm, anne khawm thei ka hih manun ka nuam mahmah hi. USA pek pan GZA Khawmpi delh a hong leng vangvang uh hi a, gim mahmah, tawl mahmah, ihmut zong cim manlo in a kileh pah thethu uh hi.

A tate sangkah lai ahih manin a tuate mah delh kik kul in a ciahpah uh hi a, lunglenna leh khuangaihna tampi a om hangin Topa in hong gualzawhpih hi. Tedim ah GZA Khawmpi sungin lasakna, thugenna leh laamna cihte hong nei thei uh a, gam thupi a om cih mah hong picingzaw in inn lama om Zomi te mah kinehno zaw hi. Khatvei bek Tedim ah ankuang kiumkhoppih man leh ka cihcih pen Mandalay vanlengtual ah hong lem bilbel ahih manin ‘Topa Gelna Mah Hoihzaw’ ciin ka lungdam mahmah hi. Cidam takin ka paikhawm uh a, Zangkong vanlengtual pan amau dawnte tawh a kimuh dong uh ka kithuah thei uh hi.

Ka lamet hetloh Japan ka zin laia Nu Haukhek te inn ah ka kimuhpih Zolai sin Tg. Thang Hau Lian @ Kosei pen Tedim hong zinto in GZA Khawmpi hong siimto a, amah hong tonpih Lianpi tawh zong hun nuamtak ka zang thei uh hi. Zomi te khawmpi hong uap, hong siim kha Japan pan Zokam pau thei, Zolai gelh thei Japan mi khat nei hihang cih mangngilh kei ni.

Amah zong a PhD na zo a, zi na nei in, nasep na nei a, tu in zong Zogam ah banglam khantohna semkhawm ding i hiam ciin ngaihsutna hong a nei ahi hi. Ei thupi ikisak mahmah laitak in zong mite in zawng hong sa mahmah, hong pattah nuam lai mahmah hi, cih hong phawksak hi. Tua in Zomi te dinmun pen kikimlo hi, cih hong lak hi. Amah tawh, Sia Do Kham innkuante tawh Kawlpi pan Mandalay, Zangkong ciang ka tonkhawm thei uh a, hun nuam ka zang thei hi.

Zangkong vanlengtual ah Asia Pacific Region ah Tchoukball Federation ah Vice-President a sem Pa Do Khan Khup, Myanmar Football League ah kimawl Chin United ah zong Chief Executive Officer a sem in hong nadawn a, cidam takin ka pai lam zong hong dawn khin, tuan ka ciahlam zong hong dawn leuleu hi. Ka tunna ah hong kha in ka kisap a om hiam ciin hong donga, ka lungdam mahmah hi. Zomi khempeuh in itheih dingin a sawtlo in amau tchoukball team te Singapore ah Asia Pacific Region kidemna ah hong pai ding uh hi. Thungetna ah phawk ni. Gualzawhna bek hilo in Topa makaihna leh lamlahna tawh a kalsuan theih nading un. [Tchoukball banghiam cih na theihnop leh:

Best of tchoukball – European cup 2011

Zangkong ah zan khat giak in cidam in Singapore ka tungkik hi. Ka kuanlam sangin ka ciahlam lungdamna leh thupha tampi, ngaihsutna thak tampi tawh ka ciah hi.

Thukhupna:

Zogam khuapi Tedim a mu bek ka hi kei a, a ngaihkuaisa in a ciahsan ka hi hi. Tedim nopna leh a khuasung kidawh dan a nopci ka muhte hampha ka kisa hi. Khaliik laitak, khavak laitakin hauzacinva zin kha sese ka hih manin zong ka hamphatna hong behlap hi. Zomi vive na om in, Zokam vive kipau in, Zola vive kisa a, Zogam huihkhi hong langin Zogam pan piang anteh mehteh mehgahte ka va ne hi. Zomi van lui, Zomi ngeina vante va mu in Zomi tangthu sungah a mangngeilo ding sanginn, zato inn, tualpi, biakinn, mun leh mual te ka va sikkha hi.

Zomi ulian tampi tawh kimu in kithuah in kikhawl in ka va tukhawm kha a, angtang leh hampha ka kisa semsem hi. Zomi te nekzonna pawlkhat va mu in zingvai nitakvai hawmzia te ka va mu a, khantohna in hong pelhlo hi cih ka tel sinsen hi. A tamzaw khanglai leh khangnote khua ah omlo in mundang, gamdangah lengkhia khin ahi maitam aw ka ci hi. Khangno a tamzaw pen numei lam hizaw pian hi. Gen ding tampi omlai…

Gen zawhloh lungdamna leh phawk kikkik ding hunpha leh hunnuam va zang kha ka hih manin ka lungdam ngiat hi. Gelhgelh ni cileng bei paklo ding ahih manin mailamah thulu tuamtuam tawh zomkik zaw ni. Ka lungdam. Z = Zomite hanlungciam, khangto diam! Topa in hihciang hong tonpih hi. Hau Za Cin