Singlamteh a na lamdang (miracle) piangte ~ Pa LP Tuang

Singlamteh a na lamdang (miracle) piangte ~ Pa LP Tuang

Matthai: 27: 45-54 :: Amasa pen in pawlpi miteng leh hih Good Friday message simkhate khempeuh i Topa Jesu Khris min in hong chibai masa ing. Tutung Good Friday thulu dingin “Jesu Singlamteh a kikhailup hun a na lamdang (miracle) piangte apan Pasian deihna” bang hi hiam chih kikum khawm leng ut huai kasa hi. Matthai 27:45-54 sungah Jesu Singlamteh a a kikhailup hun in na lamdang mahmah nga piangte muh theih in om hi.

Tuate ahih leh: 1. Gamsung khempeuh ah khuamial in, khim zing hi (v.45) 2. Biakinn sung deina puan a lu pan in a taw dong kikek in phel nih suak hi (v.51) 3. Zinling in suang tumpite kitam hi (v.51) 4. Han khukte kihong in, a sisa misiangtho tampite a tho kik uh hi (v.52) 5. Galkap mangpa leh a galkapte’ pianthakna (v.54)

Jesu Singlamteh a kikhailup hun laiin hih a tunga na lamdang mahmah nga piangte suut khawm ding hi hang. Tua na lamdangte i suut ma in na lamdang i cih bang cihna hiam cih en khawm masa ni. Na lamdang thumal Webster Dictionary in a khiatna gen cian mahmah hi. “An extraordinary event manifesting divine intervention in human affairs,” ci hi. Ei kammal in na lamdang khiatna , a kituak thei pen dingin let leng, “leitung ah na lamdang mahmah thupiang, mihingte piansak theih a hilo, Pasian nasepna kilatna” cihna hi ding hi.

Jesu Singlamteh a a kikhailup hun in na lamdang mahmah nga piangte pen, mihing piansak theih a hilo, Pasian nasepna a lamdang mahmahte ahi hi. Hih na lamdangte pen leitung leh khuahun paizia/luanzia tawh a kituaklo, lamdang tak a hong om guihte ahi cih thei leng ut huai sa ing.

I thulu in a taklat sa mah bangin Jesu Singlamteh a a kikhailup hun a na lamdang piangte leh tuate apan Pasian deihna bang hi hiam cih en khawm ni.

1. Gamsung khempeuh ah khuamial in, khimzing hi (V.45):

Nai gukna apan nai kuana dong gamsung khempeuh ah khim hong zing hi. Tua hun lai a Judate nai 6 pen tuhun a sun nai 12 (noon) tawh kibang a, nai kuana pen tuhun a nitaklam nai 3 (pm) tawh kibang hi. Tuhun nai dan in gen leng, gamsung khempeuh ah khuamial leh khimzing a om sung sun nai 12 pan nitaklam nai 3 dong, naikal thum sung ahi hi. Sun nisat mahmah hun laitak a tuabang a khuamial leh khimzing om guih pen Pasian nasep na lamdang mahmah ahi hi.

Gamsung khempeuh kici pen Israel gamsung bek hiam leitung bup hiam cih bel Lai Siangtho in hong gen cian kei hi. Ahih hangin khang tangthu (history) ah gamsung khempeuh mial leh khimzing in a tuam pen kimu thei hi. Tiberus uk kum 14na, Jesu Singlamteh ah kikhai kum tawh a kituak, hun in Phlegon, Romete Vanlam suisiam mi (Astronomer), in hih bang in na gen ngei hi. “Tua lai in nidang banglo in Ni awk in valh phadiak in, tua suun pen nitak bang mai in mial gawp a vaan a aksite kimu thei hi.” Hih thu i ngaihsut leh gamsung khua nak mial mahmah ding dan i geel thei hi.

Lai Siangtho i suut tak teh mial i cih pen Pasian vaihawmna tawh na kiteh kak deuh pen hi (Isai 5:30; 13:10-11; Joel 2:2; Zefania 1:14-15; Matt. 8:12; 22:13; 25:30; Juda 5-6). Singlamteh pen Pasian vaihawmna ahi hi. Pasian Tapa, mawhna neilo Jesu Khris in leitung mihingte’ khialhna tengteng Singlamteh tungah pua ahih manin gamsung khempeuh khim khua a ziin pen Pasian in khialhna tungah a vaihawmna a kilatna ahi hi.

Pasian in a bawlsa mite mial a nungta ding a hong deih ahi kei a vak a nungta ding a hong deih ahi hi. Jesu pen leitung khuavak ahi hi (John 8:12). Jesu Khris a sang mite vak a nungta ahi hi. Vak a nungta mite in Pasian vaihawnna tuak lo ding uh hi. Ahih hangin, Jesu Khris in singlamteh a eite khialhna tang a hong sihna sang nuam lo a, mial a nungtate in Pasian vaihawmna a tung uah a tung ding ahi hi (Matt. 8:12; 22:13; 25:30). Pasian vaihawmna tuak lo dingin leitung vak ahi Jesu Khris kiang zuan thei dingin Pasian in thupha hong piata hen.

2. Biakinn sung deina puan a lu panin a taw dong kikek In phel nih suak hi (V.51):

Tua laitakin, ngaihsun dih ni, mun siangtho sunga deidan na puanzak, a khung apan a taw dong, phel nih kisuah in a keksuak hi.

Jesu Singlamteh a kilhden lai a na lamdang a piang nihna ahih leh biakinn sung deina puan a lu pan a taw dong kikek a phel nih suahna ahi hi. Rabbite genna ah Biakinn sung a deina puan kizak pen 2.5”- 4” in sah a, khauhual gol mahmah (plaits) 72 tawh kiphan khawm hi a, tua khau hualte khauzang (thread) 24 tawh a kikankhawm ngen hi sawnsawn hi. Biakinn sung deina puan pen feet 60 a sau leh feet 30 a zai ahi. Biakinn sung deina puan a kigat dan, a sahdan, a sang leh a liat dante i et ciangin, a lu pan a taw dong mihing khat in phel nih suah ding pen thu baih lo ding hi.

Biakinn sung deina puan in Pasian tenna mun siangthopen leh siampite leh mipite omna kidei danna a kikhai ahi hi. Kumkhat in khatvei siampi lianpenpa tua Pasian tenna mun siangthopen sungnung pen ah mipite khialhna thoih dingin lut thei bek hi. Tua hun ciangin siampi lianpen in kithoihna sisan la in Pasian singkuang tungah theh zel hi. Tua ciangin mipite khialhna Pasian in maisak zel hi. Hih kithoihna pen Khialhna Kithoihna (Day of Atonement) kici a, kumkhat ah khat veita kibawl gige ahi hi.

Jesu Singlamteh ah mihingte khialhna thoihna dingin khailup a-a om tak teh Pasian in lamdang takin Biakinn deina puan pen a lu pan a taw dong a kiphel khap sak ahi hi. Hih in a gennop ahih leh Jesu pen ei a dingin Siampi lian hita ahih manin Jesu Khris tungtawn in mihingte in Pasian tawh tangtak in kiho/ kizopna kineita hi.

Biakinn deina puan zak kisam nawn loin, khialhna thoihna bawl ngai nawnlo hi. Jesu in khatvei bek leh a tawntung a set det ding (mandet) dingin Ama pumpi mahmah tawh kithoihna hong bawlsak zo ahi hi. Tua ahih manin, Jesu Khris um a sang mite pen a khialhna uh apan mawhmaisak in om ahi hi. Jesu Khris eite ading in i Siampi Lian a hita hi (Heb. 10:1-12, 14).

3. Zinling in suang tumpite kitam hi (V.51):

Zinling i cih pen a lamdang hilo hi. Ahih hang Jesu Singlamteh a kikhai lai a zinling hun pen a lamdang ahi hi. Jesu Singlamteh ah a sih phet in a lamdang mah a piang naa thum thakhat in hong tung uh hi. Tuate ahih leh Biakinn deina puan a lu pan a taw dong kiphel khap, Zinling in suang tumpite kitam leh hankhukte kihong in, misiangtho sisa tampite pumpi in thokik uhi. Tua ahih manin zinling om guih hun pen a lamdang mahmah ahi hi. Zinling zong hat mahmah hi kha ding hi . Bang hang hiam cihleh suang tumpite zong kitam uh hi.

Lai Siangtho ah thakhat thu a zinling hattak hong omna hang a kigen loh hangin, zinling pen ama thu a hong om guih in gen nei ding hi. Khuamial mah bangin Zinling in zong Pasian vaihawmna kilatna ahi hi. Ps. 18:7 ah, “Lei lingin kilok a, mualbulpite zong kising in lingdam dam hi. Amah (Pasian) heh ahih mana amaute kiliing uhi,” ci in zingling pen Pasian hehna latsakna in na gen hi. Nahum 1:3-5; Hebrews 12:25-29 leh Rev. 6:12-17 ah zong zingling in Pasian thangpaihna langsak ahihdan muh theih in om hi.

Jesu Khris Singlamteh tungah mihingte khialhna teng pua a tatkhiatna a sep laitak a zinling hong om pen Pasian vaihawmna kilatna ahi hi. Singlamteh tungah Jesu in Pasian thangpaihna teng pua zo a, Khialhna tunga Pasian vaihawnna Jesu in singlamteh ah hong puaksak zo ta ahih manin Jesu Khris pen eite ading in khialhna thoihna ahi hi. Tua ahih manin Jesu loin khialhna mawh maisakna omlo a, Jesu asang mite bekin gupkhiakna a ngah ahi hi.

4. Han khukte kihong in, misiangtho sisa tampite pumpi in thokik uhi (V.52):

Hih banga misiangthote thawhkikna thu pen theologiante’n ngaihdan tuamtuam nei uh hi. (i). Pawlkhatte’ ngaihdan in mi siangtho sisa tampite Jesu Singlamteh a a sih laitakin phot in om uh a ahih hang hankhuk sungah Jesu thawhkikna ngak uhi. Jesu sihna pan a thawhkik ciang amaute zong hankhuk pan thokik pan uhi ci uhi. (ii). Ngaihdan nihna pawl leuleu ah mi siangtho sisate pen Jesu sihna pan a thawhkik ni in amaute zong thokik pan uh hi. (iii). Ngaihdan thumna in ahih leh Jesu Singlamteh ah a sih ni in mi siangthote hankhuk pan thokik uh a, Jesu sihna pan hong thawh tak teh amaute’n Jesu zui to in Jerusalem ah kilaak uh hi ci uh hi. Jesu thawhkikma in mi siangthote koi ah bang ci om uh hiam cih bel genna omlo hi.

Bang teng hileh, misiangthote thokik uh hi cih i gennop pipen ahi hi. Mi siangtho sisate thokik bek tham loin Jesu Khris tawh Jerusalem ah a kilaakna un Khris in a sihna tungtawn in i khialhna thaman pia khinta hi. Tua bektham loin Ama thawhkikna in sihna tung a gualzopa, ama ading bek hilo in, a misiangthote khempeuh ading zong ahi cih hong lak hi. Ni khat ni ciangin Amah a um mite nungta tawntung dingin thokik ding uh a, amah sang nuamlote bel mawhsakna thukhen na mai a ding dingin thokik ding uh hi (Jn 5:28-29).

Jesu Singlamteh a a sihni a a lamdangtak a mi siangthote thawhkikna in, thu ummite thawhkikna ding hong lahna ahi hi. Thu ummite i cih bel Khris Gumpa leh Topa a sangte ahi uh a, tua upna tungtawn in Khris in midik a tansakte ahi hi.

5. Galkapmang zakhat ukpa leh a galkapte pianthakna (V.54):

Hihpa pen Pasian tapa’ ana hi takpi hi a ci uh hi. A lamdang mahmah leh a thupi mahmah bel Jesu Khris Singlamteh ah sihna tungtawn a Galkap zakhatte makaipa leh a galkapte’n gupkhiakna a ngahna uh ahi hi. Rome hunlai in Galkap zakhat a ukte pen Officer lian mahmah leh galsiam mahmah ahi uhi.

Jesu leh mikhial nihte singlamteh ah khaitohna dinga mawhpuakna piak a om galkap mang pan Jesu kigawtna pan singlamteh ah a sih dong theihpih vek ding hi. Tangthukante’n (historian) Jesu Singlamteh ah a kikhai tan in Rome galkapte’n mikhial 30,000 val si8nglamteh ah khailum ta ding uh hi ci hi. Ahih hang tua galkap mangpa’n ami khailupte lak uah Jesu bang mi leh singlamteh a khailum a na lamdang hibang a tungte tuak kha nailo ding hi. Singlamteh a kikhai mi khatin amah thatte ading a Pa kiang thumsak cih zong a tuah patna uh hi kha ding hi. Nai 3 (Dakkal 3) sung khuamial in gamsung a tuam leh zinling thupitak in a zop pen in Galkapmangpa lamdangsakna leh lauthawngna tawh dim sak ding hi.

Galkapmangpa pen khuamial leh zingling hang a lau hilo in Jesu Singlamteh ah kikhai a tuabang a tungsak thei Pasian lo ngal omlo ding ahih manin Pasian thangpaihna hanga lauhthawngna a dim hizaw ding hi. Tua a lauhthawngna un amaute taizak sak loin, khalam ah khanlawhna thupitak tungsak zaw in Jesu pen “Pasian tapa a hihna taktak pulak uhi.” Jesu Singlamteh ah a sihna gupkhiakna nasep thupitak om in Galkapmangpa’n Jesu um in sang hi. Jesu Singlamteh ah a sih nung gupkhiatna ngah masa pen zong hi kha ding hi. Jesu Singlamteh ah hong sihna in a umte ading in gupkhiatna ngahna ahi hi. Amen.

Jesu in Singlamteh a hong tatna pen a umte ading in gupkhiakna ahi hi. Jesu Singlamteh ah kikhailupna midang kikhailumte tawh a kibang kei hi. Singlamteh ah si-in na lamdang piangte zong hundang in a piang kei hi. Tua ahih manin Jesu mikhialte tang a singlamteh ah hong sihna a um a sang dingin I kicial hi. Jesu Singlamteh a sihna-na lamdang piangte bek zong ngaihsun leng Jesu Pasian tapa taktak a hihna gen cian mahmah khinta hi. Tua ahih manin sanggam aw bang ngaihsun in suusut lai ding i hi hiam. Jesu um in sang tapeuh ni, Amah nuntak tawntungna ahi hi. A sim khempeuh Pasian in thupha namkim, daihna thupha, nopsakna thupha hong pia kim ciat ta hen. Amen. Pa LP Tuang, Hyderabad (Zomi Christian Fellowship, Delhi)