Singapore Airlines vanleng sungah Bomb omhi ci’n kikhem ahih manin alenhunding ziakai

Singapore Airlines vanleng sungah Bomb omhi ci’n kikhem ahih manin alenhunding ziakai

Taiwan gamsung aom Taipei City panin Singapore azuanding vanlengkhat asungah Bomb omhi ci’n ki patausak ahih manin, tua vanlengpen alen khiatding ziakaisak cih CNA pan kiza hi.

Tua vanlengpen Singapore Airlines (SIA) te ii vanlengkhat ahihi. Vanleng sungah Bomb omhi ci’n Bomb Threat akigen pen kikhemna Bomb Hoax nahimawk hi.

Hih Bomb Hoax kikhemna hangin Singapore Airlines Flight SQ879 pen Taiwan’s Taoyuan International Airport panin alenkhiatding ahun aki ciantansa sangin nailangbang ziakaizaw in lengkhia theipan hi.

Zanni Friday nitaklam in thupiang hi a, Bomb Hoax kikhemna asiangzawh 5:45pm ciangin Taoyuan International Airport panin lengkhia theipan a, Singapore ah zanlam 10:35pm hunpawl in bangmah nawngkaina omlo in tuthei hi.

SIA Spokesperson khatin agenna ah hih kikhemna Bomb Hoax pen atakpimah hi a, tua vanlengpen bangmah nawngkaina omlo in Singapore’s Changi Airport hong tungthei hi ci’n genkhia a, ahi zongin adang athu akician in bangmah genkhiat neinailo hi.

Taiwanese Media te pulakkhiatna ah Singapore Airline Flight SQ879 alenkhiat madeuh in numei khatin lamgei Payphone panin Taipei Police Hotline ah phone sam a, Flight SQ879 sungah Bomb omhi ci’n zasak cihi.

More: Singapore aom vanlengtual in “World’s Best Airport” ciaptehna ngahleuleu

Tuabangin azaksak laitak in Singapore Airline pen alengkhia liandingin Runway tungah apaipaita, aki khinkhinta ahihi. Tuaciangin Flight SQ879 pen ki khawlkik sakphot a, thunei Authorities te’n avelcian khitciangin ki lengsakpan hi. Taipei Police te’n hihvai tawh kisai in akanciansan laitak cih kiza hi. Sawltak #zomidaily