Singapore ah kek in meileng dengkha, meileng hawlpa zato kipuak

Singapore ah kek in meileng dengkha, meileng hawlpa zato kipuak

Singapore gamsung kikawmtuahna meileng “MRT Train” khat kek in tunilam in dengkha cih Straits Times pan kiza hi. Tuni Monday (Nov 20) nitaklam 4pm hunpawl in East-West Line atai MRT meileng khat kek in adengkha ci a, tua meileng pen Bedok Station ah ki koihcipphot hi. Tuahang in Tanah Merah leh Paya Lebar Station kikalteng meileng ziakai in, atawmpen Minute 10 bang angeina sangin ziakaizaw kici hi.

Hihvai tawh kisai in SMRT’s Vice-president of Corporate Communications asem laitak ahi Mr. Patrick Nathan in agenkhiatna ah hih meileng pen Bedok MRT Station azuatlaitak cihi.

Tuaciang in meileng tungah atuang Passengers teng Bedok Station ah ki tuakkhiasak in, tua meileng pen zatnawnloh photding in kihemkhia a, hoihtak kancianna kinei cihi. Hih buaina Incident apiankhit ciangin tua meileng ahawl “Train Captain” pen aomdan nuamlo in, zatui kibawlkul cihi.

Tua Train Captain pen kum 20 gualpawl hipan a, Changi General Hospital ah nitaklam 4:20pm hunpawl in Singapore Civil Defence Force te’n Ambulance tawh puaksak uhhi. Tua meileng hawlpa pen kek in meileng akhak ciangin aci hik in, a awm nasa cihi.

Mr. Patrick Nathan in hih buaina pen kek ii denkhakna “Lightning Strike” mah ahidiam cihpen hoihtak ki kancian laiding cihi.

Meileng pen kek in adengkha theizelzelmah hi a, ahi zongin asungah atuangte pen kidalna kithuah ahih manin, liamnading omlo hi ci’n SMRT Operator te’n genkhia hi.

Meileng khatciat pen “Faraday Cage” akici kekdalna tawh akidal, kekdalna akithuahkim hi a, tuahang in kek akiat ciangin Electric Field leh Electric Current cihte adalcipding ahihi ci’n Mr. Patrick Nathan in genbeh hi. Tua Faraday Cage hangin kek in meileng adenkhak zenzen lehzong Electric Current pen meileng sungah lutlo in, apualam meileng atuamna ahawng “Shell” dungzui in taisuakding cihi.

More: Singapore vanlengtual ah migilo te ngongtatna aomleh thuhkikziading kisinna nei

11 May 2016 kum hunlai inzong North-South Line atai SMRT Train meilengkhat kek in dengkha ngei a, Yishun Station leh Yio Chu Kang Station kikal atai meilengteng nawngkaisak ngeihi.

Tuni kek akiatma naikhat kisap hunpawl in MRT East-West Line tung aom Clementi Station ahzong Alarm ging cih kiza hi. Sawltak #zomidaily