Sia Khampeek (Tongsan pu) in Doctor of Divinity ngah lungdam pihna

Sia Khampeek (Tongsan pu) in Doctor of Divinity ngah lungdam pihna

Sia Khampeek (Tongsan pu) in D.D (Doctor of Divinity) pahtawina hongngah ahih manin Zomi Daily pan ih lungdampih mahmah hi. Topa’n asep abawlna khempeuh ah lawhcin daupaina napiakthuah semsem tahen!

Topa maipha (D.D) ngahna tungtang lungdam kohna

Pilna, siamna, hoihna, kicinna, hanciam zawhna le kilawmna cihte cinvom cia zong neilo hi mah leng i Pa hong itna le angvanna hang bek tawh abeisa kum 2 lai pek akipan hong kipiak sawm ahi Doctor of Divinity (DD Honorary) Lukhu nelkai pen tuni March 7, 2020 (Saturday) ni in Christian International School of Theology (CIST), Philippines te’n Norway gam Stavanger City ah thupitak le lungkim huaitak hong pia thei ngawngaw uh ahih manin, gualzawhna hong ngah sak Topa min i phat hi.

Hih Doctor of Divinity (DD) Lukhu nelkai lakna hun ah CIST sangpi pan Prof. Dr. Michael Khe Kung, LL.B., Ph.D., D.0Min, D.D (Director of Theology Education and Professor) hong khak hong kihelthei banah Norway gammite banah mivom, mikangte banah mipil Professors and Pastors, Zomipih tampi hong kihelthei bek tham loin, lungdampihna sum le paii le tampipi man paak hoih mahmah hong pia ziahziah uh hi!

Tua banah Lengla vaakna lim mahmah hong huan makai Pa Nawlpi le Tg. Ukpi te lawmta teng tungah lungdamna lianpi i pulak hi. Tua bek tham loin, mun tuamtuam pan lungdampihna lai hong khak lawm le gualte le a zahtak huai Zomi mipil, misiamte le makai Siate khempeuh tungah lungdamna thu hong gen phapha nuam ing.

Hih bang pahtawina le gualzawh theihna pen kei pilna siamna le hanciam zawhna hang hi het loin, Pasian le minam ading veina, deihsakna tawh i mapankhopna hang ahihna hong gen phapha nuam ing. Tua manin pahtawina, minthanna le thupina khempeuh Topa i pia kik hi.
Tuni akipan mai lam hunte dongah Pasian gam le minam ading khut kilen in mapang khawm toto lai ding hihang. Khrist le Minam ading Naseppih, Sia Khampeek (Tongsan pu)