Malaysia, Selangor aom inn kilamsan khat kicim, mi 1 si, 5 liam

Malaysia, Selangor aom inn kilamsan khat kicim, mi 1 si, 5 liam

Malaysia, Selangor State sung aom nasepna Construction Site khatah Steel sikzawn te kicim in mi 1 si cih NST pan kiza hi. Tuni Friday (March 9) zingsanglam in thupiang hi a, asi banah aliamzong mi 5 bang pha cihi.

Tua Construction nasepna pen Jalan Kenanga 9, Kawasan Perindustrian Bukit Beruntung ah hi a, zingsanglam 10:10am hunpawl in buaina apiang ahihi.

Construction Site ah nasemte pen Bangladesh gammi leh Indonesia gammi te hi uh a, nasep agim mahmahkhit uhciangin tawmvei tawlnga in innkilamna anuai ah atupak uh ahihi.

Tualaitak in atungpan in sikzawn te kicimsuk in anuai ah aom nasemte adengkha ahihi. Siktawn in adenkhak nasemte pen kum 24 panin kum 30 gualpawl vive ahihi.

Hih tuahsiatna amukha Witness khatin agenna ah hih tuahsiatna pen huih ahat mahmah khitciangin akicim hi ci’n genkhia hi.

Agin ngaihmahmah kaza a, banghipeuhmah dinghiam ci’n ka etkhiat ciangin Construction Site ah Building kilamsan khatpan in sikzawn te akicimsuk nahimawk hi. Tuaciangin ka thaneihzah, angaihthei penpentawh awnggawp in, kidawm un ci’n Warning kapiak hangin ziakailuata ahih manin, anuai ah aomte adengsukkha ahihi ci’n genkhia hi.

More: Yangon – Mandalay lamzikpi tungah 2017 kumsung Accident 555 veipiang, mi 116 si

Aliam nasemte pen Sungai Buloh Hospital ah kipuak in, hih tuahsiatna vaitawh kisai in kumpi thunei te’n hoihtak kancianna neiding uh cih kiza hi. Construction Site tuahsiatna pen akoikoi ah omthei zeuhzeuhmawk ahih manin, kidoptheih aomleh kidop huai mahmah hi. Sawltak #zomidaily