Russia gamsung meileng khatah Bomb puakkham in mi 11 si, 45 liam

Russia gamsung meileng khatah Bomb puakkham in mi 11 si, 45 liam

Russia, Saint Petersburg khuasung atai meileng tungah zanni in Bomb puakkham ahih manin mi 11 si a, adangzong mi tampi liam cih AFP pan kiza hi. Kumpi thunei Authorities te’n hih buaina apiankhit ciangin Metro System khempeuh khakcippah uhhi.

Adang Metro Station khat ahzong Bomb dangkhat kimu in Security Services te’n apuakkhapma in hemkhia “Defused” uhhi. Russia’s Investigative Committee te genna ah hihpen migilo te ngongtatna “Act of Terror” hiding ci uh a, banghangin hihbangin Bomb puakkham theihiam cih kancian laiding uhhi.

Hih Bomb sukhampen ko gamtatna hi ci’n apulakkhia “Claim of Responsibility” omnailo a, ahi zongin Russia te’n Syria gamsung ah IS migilo te akapkhit uhciang in thupiang ahih manin, upmawhbel omtuakpah hi.

Russia National Television panin photo akhahkhiatna ah meileng dawl “Train Carriage” khat panin apuakkhap khitciangin apualam ah misiluang atuk zihziah kimuthei a, mulkimhuai mahmah hi.

Anti-terror Authorities te’n Statement ah agenkhiatna ah asi pen mi 11 pha in, aliam bekbek pen mi 45 pha ci uhhi.

Hih tuahsiatna hangin asi aliam te dahpihna in Saint Petersburg City sungah ni 3 sung dahpihna pulak hun “Days of Mourning” in ki ciamtehding cihi. Russia President Vladimir Putin inzong Bomb puakkhapna Metro Station mai ah zannitak in vapai in dahpihna paklom asan henkhat “bouquet of red flowers” vakoih hi.

Bomb puakkhapna Train Station maiteng ah dahpihna paklom “Bouquet” kikoih ngeingai in, tuagei ah ading numei kum 30 aphakhin Maria Llyina kici in “tu’nbel meileng tuangngam nawnkei ning” ci’n genkhia hi.

Video na etnopleh: Inside the Russia metro train station

Nidang in Saint Petersburg City sungah hihbangdan aomtheiding in ka lamet hetloh, tu’n hih khuapi pen lauthawngna tawh kidimta hi ci’n genbeh hi.

Pensioner Vyacheslav Veselov inzong AFP te tungah agenna ah amailian ah Bomb puakkhap ciangin asi luang 4 ka mulian ci a, Train Station Attendant te’n kapkawm, awngkawm ngeingai in aluang zawngkhiading hihang ci’n huhna ngenin ki awng ziahziah cihi.

More: Ui photo khat hangin Russia ah pasal khatin alawmnu Acid buakin meitawh hal

Russia gamsung ah Terrorist Attack pen tunai omlo himahleh, tutung Bomb kitapna hangin asi aliam hongtam mahmah hi. ZD Sawltak #zomidaily