Rih – Tedim Road India & Myanmar (ASEAN) Highway pi ~ Dr. Dongno

Rih – Tedim Road India & Myanmar (ASEAN) Highway pi ~ Dr. Dongno

Zogam ah cikmah hun aa i ngaihsut baan loh, i kilamet ngei loh Highway kici mawtaw lam lianpi India gam panin Tedim Gungal gam kantanin Tedim khuapi ong tawn ding cih thu i zak ciangin, Zogam buppi kuamapeuh lungdamin lametna lianpi tawh i ngaklah ciat hi.

Tua kawmkaal ah hih Highway lamlianpi leh a omsa Biuha lampi nih thu ciantakin aki theihtel lohna hangin upmawhna, ki muan lohna, kideihsak-lohnate nasia lua ahih manin ngaihsutna tuamtuam ong piangin tua panin Zomite iki pumkhat nading asiasak ciang, thu dik lo tak dinmun ong tun hi. Hih thu hangin, Tedim gamin i ngah ding (ASEAN Highway ciang ahi ding) lamlianpi vai i nawmgkai sak ding deih huai lo hi. Hoihtakin thu khualna tawh Zogam ading deihsakna tawh lungngai-in pilvangtakin i om ciat ding thupi mahmah hi.

A kitel khial highway nihte:

Highway Khatna : “Tedim-Mansuanglei-Laitui-Ciau lampi”, (“Biuha lampi” zong ici hi.) Hih pen Kawl kumpi bawl ahih manin, TEDIM-RIH ROAD ci-in Lam zumpi ah kiciamteh hi. Tedim pan kipan ahih manin amin zong TEDIM tawh kipan hi. Hih lampi vai ah Laitui khua ii hanciamnate thupi aa etteh huai hi. A mau sepna khempeuh pen Kawl kumpi’ Biuha lam ading aa asepna uh ahi hi.( India, Rih-Tedim Road tawh kisai lo). Kum sawtpi mah kizang khin aa Zogam noptuamna tampi kingah zo hi.

Hih Biuha lampi asawt lo-in Union Highway, ‘Pyihtaungsuh Lan Mah Gyi’ ci-in ahoihzawin ong puah pha lai ding ahih manin lungdam huai semsem hi. Hih pen Kawl Kumpi’ Project hi aa Laituite ‘ngahsa’ i cih, Biuha lampi ahi hi.

Highway Nihna : Tulaitak aa i gengen, Kapteel atawn ding pen RIH-TEDIM ROAD kici aa India kumpi ong bawlsak ding (Kawl kumpi bawl ding hi lo) ahih ciangin, Rih pan ong bawl suk ding ahih manin amin zong RIH tawh kipan hi. India Kumpi-in, Look East policy ong neih uh ciangin tua nuai ah ASEAN gamte tawh, Myanmar-Thailand-Cambodia-Vietnam dongin leilam kikawm nading kongpi, ‘gateway’ dingin Mizogam ong zat uh ciangin i Zogam ong tawn kha zenzen hi.

A kigen thei lo hamphatna lian mahmah khat hi aa India Kumpi-in US $150 million tawh ong bawl sak ding highway lampi ahi hi. Hih highway pen alamziin zon, survey, aa kipan, lampi azawh siang dong uh India Kumpi-in Kawl Kumpi leh engineer-te konlawh lo-in abei khempeuh amau ong piak khong ding ahi hi. Hih pen India Kumpi’ Project hi aa Kapteel atawn ding, Kapteelin ‘angahsa’ Highway ahi hi.

Hi tegel Project atuam vilvel tuak hi. Khat pen Kawl Kumpi’ bawl ding, Tedim-Rih Road (Biuha lampi)ci-in Lamzumpi ah kiciamtehin Laitui khua tawn hi. Khat pen India Kumpi’ ong piak ding Rih-Tedim Road ahi hi. Ong pia ding atuam, budget atuam, alamziin zong atuam, asem ding atuam tuak hi. A minte zong ki lehbulh hi.

Hih lampi nih a kipatna leh atunna uh kibang tuak, highway lah hi tuak, amin zong kilehbulh citciat se ahih ciangin aki am, confused, loh nadingin, tulaitak aa kizang Laitui lam atawn Tedim-Ciau (Rih) Road pen, Biuha lampi ici ding aa, Kapteel atawn ding, India kumpi ong piak ding, Rih-Tedim Road pen India highway ici ding hi. Lentang pan ka-in Lamzang ah kituah hi.

Highway icih ciangin, * lam aphei theithei, agradient a zaang theithei, * lamtang, theithei, *Lam kawi kikhep hairpin bend om lo theithei, tua hi leh * mawtaw manlangin kihawl thei aa, * nakpi-in, datsi tawm bei zaw, * mawtaw na lozaw, * driver-te gim lozaw ahih ciangin *accident zong tawmzaw in * khualzin hun zong tawm beizaw ahih manin * khantohna zong manlang zaw hi. A tot nading leitang mahmah zong akip akho kisam hi. Highway icih ciangin leitung bup ah hih daan ahi hi.

A thupi : India Kumpi-in hih India highway in, khua a tam theithei nawkin mi tampi-in noptuamna angah theih nading policy thupi mahmah khatin aneih uh ahi hi.

India(Rih-Tedim Road) Highway (India-Myanmar ASEAN Highway) ii pai nading survey bawl dingin India Kumpi-in amuan uh Survey Dept. te ong sawl uh hi. Kawl kumpi survey team-te’ zonsa (Biuha lamzon sate) zang lo-in, amau hoih asak bangbangin ong en kawikawi uh hi.

Laitui lam mun nih-mun thum en masa uh hi. Highway pai nading apiang thei ding hiam ci-in feasibility study ong bawl masa phot uh hi. Tawn sak ding cihna hipah lo hi. Hoih asak uh leh bek detailed survey bawl ding uh hi pan hi. Hih pen highway lamzongte zatdaan protocol ahi hi. Deih bang sa zo lo uh hi. A tot ding khua zong Laitui leh Lamzang khua nih bek ahi hi.

Kapteel lam, study bawl leuleu uh hi. Hih zong tawn sak ding cihna hipah nai lo hi.

*A lei lupzia, topography, amuh uh ciangin, hoihsa pah uh ahih ciangin,

*Detailed survey bawl dingte ong kipan pah uh hi.

*Geological report : soil sample leitang ip 80 Hyderabad ah puakin sittelna, soil test, bawl uh aa, highway pai nading aa hoih, lei kho, lei ciip, mencimcim lo nam hi cih mu uh hi.

*“Lam bawl nang suangsi zong quarry gamlapi pan puak kul lo-in, alignment tung ah kicing takin om aa hun leh sum bei nakpitakin noptuamin nasep ol mahmah ding hi” cih mu uh hi.

*Lampi lupdaan, gradient zong hoih sa uh hi. Tai 8 sung 0/0 zaang-tam thei napi, hawktui luan nading ngaihsutna hangin, 2 in 100 dingin bawl uh hi. “Mualtung gamah hih bangin mawtaw speed tawh atai theih nading mudang om kenteh” ci-in lamdang sa uh hi.

*Tua ban ah India Kumpi-in hih highway pai nading tawh kisai athupi ngaihsut mahmah criterion khat tawh kituakin, Kapteel lam tawn leh khua 5 – Tuitawh, HiangAwn, Lunmual, Kapteel leh Lamzang kantan ding aa, Kapteel gei ah adang khua 9 – Suangzang, Heilei, Munluah, Suangphei, Pakzang, Cawhte, Haiheng, Sialtui leh Lamzang gei ah, Gawngmual khuate-in zong naitakin zang thei lai ding uh ahih ciangin khua 14, mi tampi-in noptuamna ngah thei ding cih zong mu uh hi. (Joint Survey conducted 28.03.2018)

Hi bang teng survey abawl dimdem khit uh ciangin Survey Team-in Kapteel lam hoihpeen sa ahih ciangin India Kumpi tung ah report apuak bang un India Kumpi-in saangin kipsak hi.

India Kumpi-in ong sep ding uh hih India (Rih-Tedim Road)Highway Project pen, ‘Rih-Tedim Two-lane Carriageway’ ci-in, atot nading khuate,‘Towns and villages passed by the Project Corridor’ :– Rihkhawdar Township – Haimual village(new) – Tuidil village – Lentang village – Tuitawh village – Kapteel village – Manipur River – Lamzang village – Tedim Township ci-in aki gamlatna kilometre ciat tawh ciamteh ngiat uh hi.(Ground Survey finalised by 26.05.2018)

Ki-lamen khial : Hih India(RIH-TEDIM) highway- in Laitui tawn ding cihthu om ngei lo hi. Laitui ‘ngah sa’ pen, atung aa, Highway Khatna, Biuha lam ( Union Highway ding) hi aa tua tawh akhial kha om hi. Feasibility study abawl uh pen highway apai thei ding hiam ci aa lamziin azong masa phot uh hi bek hi. Tua pen angah kisa kha-in kilamen khial uh hi ding hi. Ngah – cihna hi pah zenzen lo hi.

Kapteel lam zong feasibility study bawl uh hi. A ngah hipah nai lo hi. Hoih asak uh teh, detailed survey limtak bawl pahin India kumpi-in akip sak khit ciangin Kapteelin angah hi pan hi.

Laitui ngahsa Biuha lampi Kapteel lam kituah kisa kha : Hih India-Rih-Tedim Highway-in Kapteel tawn ding cih thu akizak ciangin, Laitui-tate pawlkhatin, ‘Laitui ngahsa Biuha lam Laitui pan Kapteel ah kikhin ding’ sa kha uh hi leh kilawm hi. Hi lo hi. Kapteel lam atawn ding pen India Kumpi bawl ding, Rih-Tedim Road ahi hi. Tedim-Rih (Biuha lampi) hi lo hi. Atuam vilvel tuak hi aa, Lentang pan kikhenin, Lamzang ah kituah kik ding hi.

Ong kipia ding lampi Project nihte etcianna (ngah icih ciangin ‘tawn’ cihna hizaw hi.)

Laitui atawn lampi : Tu-aa kizang, Laitui lam, Biuha lampi, Tedim-Rih Highway pen Kapteel lam kituah lo lua kisa-in, asawt lo-in Union Highway in aki upgrade ding Kawlgam Kumpi’ Project ahi hi. Kua ma’n deihgawh lo, tuh lo, kankuat lo hi . Hih pen Laitui ‘ngah sa’ ahi hi.
Kapteel tawn ding lampi : Hih Rih-Tedim Highway pen India Kumpi-in ong bawl sak ding, Project ahi hi. India engineer-te’n feasibility study bawl phot uh aa hoihsa uh ahih ciangin detailed survey bawl zom pah uh hi. India Kumpi tung amuhna bangun report puak uh aa India Kumpi-in tua tung tawnin lam ong bawl ding hi. Hih pen Kapteel ‘ngah sa’ ahi hi.

Hih India-Rih-Tedim Highway thu ah, Kawl kumpi-in, ‘phalna’ apiak uh simloh, Kawl Kumpi/Kawl engineer-te, kuakua-in bangmah va sawk, va sai, va interfere, thei lo, kuamah lut thei lo hi. Indian expert-te’n lam ong bawl ding uh ahi hi. Galkap kumpi hun bangin mai-et zawhthu hun hi lo hi. India kumpi’ teel ahi hi. Kumpi nih thu kimna, MoU kithuh khin zota hi.

Banghangin Kapteel ngahsa ‘India RIH-TEDIM ROAD’ Laitui-in kankuat? Laitui aa ateng lo, Laitui tate pawlkhatin Naypitaw ah lungkim lo-in a kankuatna uh, ahang pen, anuai aa thu nihte lak ah, khat zawsangsang hi ding hi.

No.1. TEL KHIAL UH : Laitui Biuha lam Kapteel ah aki khiin ding sa uh : Banghang hiam cih leh,

(i) A kankuat upa khatin hih bangin lai ong khah khia hi. (a) “Banghangin Laituite ngahsa Kapteelte in tuh thak?” ci hi. ‘Laituite ngahsa’ lampi cih theih ding, Biuha lam khat bek om hi. Tua ahih ciangin Biuha lampi Kapteelin “atuh” asa kha hi mawk hi. (b) , “Laitui tate in a ngah sa uh lampi a kan kik tak ciangin” ci kik lai hi. Laituite ngahsa lampi, kan kik ci hi. Laituite ‘angahsa lampi pen, Biuha lampi ahi hi.

(ii) Khat in ong at leuleu aa, (a) “………. Laiitui lampi ding kipsak pah uha Falam siklei lui penzong Mansuang lei ah ong dawh to pah uh hi.” ci hi. Mansuang lei pen Biuha lampi paina ahih ciangin Biuha lampi thu mah agen ahi hi. (b) “ Tu hun teh ZCD pan Pu GKL te pawl CLK te pawl in Kaptel lam tawt sak sawm mawk”, ci ahih ciangin, Biuha lampi Kapteel lam kitawn sak ding asa ahi hi. (c) Gen thuah lai-in, “Chin state khuapi ding pen Kawlpi hi napin mihai Vankulh in Hakha khua ah a tuah bang dan in….. ” ci lai sawnsawn ahih ciangin, Laitui atawn Buha lampi, Kapteel ah akituah asa hi mawk zen hi.

(iii) Adang khatin hih bangin at thuah lai hi, “Ciau pan in Lentang ah Lentang pan Laitui ah Tedim ah …… project nei leuleu uh in lampi bang ki to ziahziah ta hi. Hih lai ah, ‘lampi kito ziahziah ta’ cih theih ding, Biuha lampi khat bek om hi. Tu aa i gen, Kapteel tawn ding India Highway pen hih lai aki khah ni, tuni July 12, 2018 ni dong ki to nai lo hi. Tua ahih ciangin sawt lam aa ki to ziahziah, Biuha lam mah agen ahi hi.

Kapteel in Laitui ngahsa Biuha lampi “atuh sa kha-in” Naypitaw ah Laituite-in ‘Kapteel ngahsa’ India, Rih-Tedim highway ava kankuat uh hih tuak mawk zen hi. Banghang hiam cihleh (a) ‘Laitui ngah sa’ lampi cih theih ding Biuha lam simloh lampi dang om lo hi. (b) Falam siklei kidawhna Mansuang lei pen Biuha lampi ahi hi. (c) ZCD …. tepawlin Kapteel lam tawn sak sawm mawk.. , ….. hih in Biuha lampi Laitui pan Kapteel lam tawnsak sawm aci nuam ahi hi. (d) “mihai Vankulh bangin tuah “, ci lai hi. India Highway ki to nai lo ahih ciangin, koimah ah kituah thei lo hi. A omsa, Biuha lampi aki tuah mah asa-sa uh ahi mawk hi. (e) “Lampi ki to ziahziah” ci sawnsawn hi. Biuha lam bek ki to khin ahi ciangin lampi mencim kithai ziahziah agen hi ding hi. India Highway July 12, 2018 dong, ki to nai lo hi.

Hih thu nga tengin ‘Laitui ngahsa’ Biuha lampi, Kapteel ah kituah ding ‘sa kha’ uh ahihna siang sinsenin long ak khia hi. Teltakin kan nawn lo-in ‘Sa’ ahihna bek uh tawh Naypitaw ah Kapteel ngahsa, India Highway ava kankuat (va nial) bek hi lo-in ‘va tuh’ sawm uh ahi hi.

Hih mi thumte-in “ Laitui ngahsa (Biuha lampi) Kapteel lam ki tuah” ci-in lawng khatin ging khial kha uh hi. Kapteelin Biuha lampi tu phingphingin banghangin tuh ding hiam?

Tun, Laitui atawn Biuha lampi Kapteel ah kituah takpi ahih leh, a kankuat ding mah uh hi. Khial kasa kei hi. Ahih hangin, ahi lopi,’tuh’, ‘kituah ‘ cih pen thumaan lo (zuauthu) ahi hi. Thumaan lo siksanin i MP-te dong ‘mawhsuan’ in Kawlgam khuapi ciangdong ah va ‘nial’ uh aa, ‘false acusation’ thu lianpi suak thei ding thu ahi hi.

Kapteelin Laitui ngahsa, Biuha lampi “ tuh ‘naisai’ ” lo hi. Atuh nading thu zong om lo hi. Biuha lam ngaihsutin zong nei kha beek lo lai ding uh hi. Banghang? India (Rih-Tedim Road) Highway ngah uh ahih ciangin Biuha lampi ngaihsun kha lo ding uh hi. Highway kici tuaktuak ahihteh, am kha, confused kha, in Biuha lampi atuh sakha uh hi peelmawh ding hi.

Atung aa ih gensa mah bangin, hih India Highway pai nading lamziin Kawl kumpi/engineer-te, nangawnin bangmah va sai thei lo hi. Kituh theih ding thu zong hi lo cih tua zahin theih hak lua lawmlawm sam kei leh kilawm buang hi.

Tua hi lo aa, No.2. THEI GEGU PIPI mah aa ‘Kapteel ngahsa’ India, RIH-TEDIM Highway kankuat uh, ahih uh leh, deihgawh in amau Naypitaw dong ‘atuh’ hizaw mawk ding uh hi. Laitui khua khat bek adingin Biuha lam (Union Highway) lah om khin zo, tun Kapteel ngahsa India Highway lah ‘tuh’ sawm lai – Laitui ah highway nih akop-athuahin pai sak nopna lungsim hi mawk hi. Hih pen hih zah zawzenin Laitui tate duhhop, nun sia liang dingin ken ka ngaihsun thei kei hi. Tua ahih ciangin : Hih, atung aa, ahaang thu nihte lak ah, thei gegu aa kankuat pen Zotate, ei leh ei tung ah tat ding in cikzeet huai, mulkim huai lua ahih ciangin, tua sangin “atuh sakha aa kankuat kha” uh hizaw ding hi, ci-in ka deih-kaihzaw hi.

Vaikhakna : Zomite ki pumkhat nading i hanciam laitakin hih thu hangin akisam het lo, akul lo khuaveng khuapam, u leh nau kilemna, nakpitakin siatna ong piang ahih ciangin i supna kigen zo lo hi. I sanggam dangte kiang ah ei leh ei ki deihsak lohna i valak aa, i mai ong zumsak hi. Ong nuihsan hiuhiau bek uh hi. Mailam ah na khat pepeuh i hih ding ciangin thu limtak pilvangtakin i ngaighsut masa ciat ding hi.

Tua hi lo aa, thei gegu mah aa ei leh ei Zomite ngahsa kiphiat sak ding lungsim nei i hih zenzen khak leh mailam ah Zomite khantoh nading leh, kipumkhat nading akhaktan, adongkholh nasepna khat peuhpeuh i sep loh nading hanciam ciat ni. “Zomi ka it hi” aci nuamte ihi hi.

Tu-in, Laitui ngahsa, (Biuha), Union Highway kua mah’n tuh lo-in angei-in ngei ding hi. Asawt lo-in Kapteelin zong India ong piak ding Highway ngah ding aa, Zogam ading vive ahih ciangin bangzahin lungdam huai, kipaakhuai hiam! I tuptup, i ngakngak thuphapi ahi hi. Topa hoih hi.

Khat leh khat ki it ding, kideihsak ding, neih peuh kihawm diamdiam ding cih pen Zomite pom, nunpih zia-leh-tong ahi hi. Tagah Thangho leh Liandote unau-in mim tang khat, tang tang khat a muh pepeuh phelhawm ci-in i tangthu-in ki-it nading leh kikhuak nading ong thuhilh hi. “Hawmsiam nungta, nebum si” cih paunak anei zong ei Zomite ihi hi. “Huaiham, duhhopna-in siatna, manna ong tun aa, hawm siam leng ki nungta hi” ci-in ong thuhilh ahi hi.

Tua bek hi lo-in, Kapteel pan a tuan khia Laitui khua hi aa tuni ciang dong hih khua nihte unau khat, pata khat, pi leh pu, ni leh gang, beh leh phung, sung leh maak aa kiman khuate ahi hi. A kingah mengmeng lo hih alamdang hamphatna lianpite ki haza lo-in, mimtang, taangtang bangin hawm thiamthiam leng i biak Pasianin van pan nuih mai tawh ong en suk ding hi. Dr. Dongno