Refugee vai tulaitak thuthang: Philippines leh Cambodia puak uhhen!

Refugee vai tulaitak thuthang: Philippines leh Cambodia puak uhhen!

Refugee tepen Philippines leh Cambodia gam te ah puakzaw uhhen ci’n zanni May 14 ni in Malaysia Minister khatin genkhia ta mawk hi. Malaysia gampen 1951 Refugee Convention ah Signatory in akihel hilo ahih manin, UN (United Nations) te’n Malaysia gamsung ah Refugee te akhol uhsang in Philippines leh Cambodia gam te ah puak uhhen aci ahihi.

New Starits Times te kiangah “Minister in the Prime Minister’s Department” pan Datuk Seri Shahidan Kassim in agenkhiat hi a, Myanmar pen Malaysia gamsang in Philippines leh Cambodia tetawh akizopna zong tamzaw hi ci’n genkhia hi. Tua gamnih tepen UN Convention ahzong aki helte ahi uhhi.

Tua Minister pa in agenbehna ah “Gunkuang tawh Malaysia gamzuan in honglut illegal immigrants kamuh uhleh bangvai bangvai tawh ahi zongin gamgi panin ki lehhawlkik dinghi.” ci’n Locay News te ahzong genkhia hi.

“Gentehna zenzen in tuipi kantan in ka gamsung Maritime Border uh honglutzo aomleh mihing ciatciat ki hehpihna tawh kamanding uh a, thukhenzum katunding uhhi. Thukhenna athuakkhit uhciang in Immigration Detention Camp ki puakdinghi. Tuapan in UNHCR te’n mawhpuak la uhhen la, adang gam ahih keileh hong kipatkhiatna gam uh puakkik uhhen” ci’n genkhia giapgiap hi.

UK thuthang kaikhawm minthang mahmahkhat ahi The Guardian te pulakkhiatna ah zanni ciangciang Malaysia leh Indonesia tuipi geiteng ah athamcip Bangladesh minam leh Rohingya Asylum Seekers mi akigawm in 8000 val phakhin hi cih pulakkhia uhhi.

Malaysia kumpizumpi ahi Putrajaya pan inzong Asylum Seeker Boat honglut aomleh ki lehhawlkik dinghi ci’n pulakkhia giap uhhi. Indonesia gam atung Asylum Seeker Boat khatzong Indonesia te in akisam neklehdawn ding apiakkhit uhciang in agam ah lutsaklo uh a, Malaysia apaiziading lampi hilh uh cih azak ciangin Malaysia kumpi inzong kozong lehhawl kikding cih apulakkhia ahihi. ZD Sawltak