Queen Elizabeth II thupitak in kivui khin

Queen Elizabeth II thupitak in kivui khin

Leitung gam kumpi leh makai tampite uapna tawh King Charles III leh a innkuanpihte in anu, api uh Queen Elizabeth II thupitakin Westminster Abbey ah vuina hun bawlna masa thupitak in bawl uh hi. Hih gambup sivuina (state funeral) pen 1965 kuma Prime Minister Winston Churchill khit ciang a omkik pan hi. A luang pen thaupi puakna lengpi tawh pua masa in tua pan mawtaw tawh pua kik in, St. George Chapel atun ciang mihing liangpuak in biakinnpi sung kilutpih hi.

Mipi tul tampite in a luang vuina ding Windsor a tun dong lampi gei ah na dingin pak tawh na pahtawi uh hi. Vuina hun ah Dean of Westminster The Very Rev David Hoyle in a nuntak sung tawntung tawlnga lo a mipite ading a nasep thupite pahtawina thu gen hi. “England Kumpinu bek hilo in gam kipawlte lutangpi ahihna zong kicingtakin sem zo hi” ci hi.

Kumpinu zahtak piakna hun nunung mipite adingin nasia takin Westminster Hall ah kibawl a, a luang zong mipi muh theih dingin a khangkhan in dawhsang ah kikoih hi. Tua mun panin khang tampi ah zong a kimu kik mengmeng nawnlo ding a hankuang pen Tuigalkap 142 in Thaupi leng tungah kikoih kai uh a, damdam in Westminster Abbey innpi tunpih uh hi.

Hih khe tawh hankuang tonpihna ah a tapa kumpipa thak King Charles III leh a sanggamte: Princess Anne, Princes Andrew leh Edward te in zui uh hi. Elizabeth tupa laigil leh kumpipa khita kumpi sem dingpa William leh a zi Catherine in zong a zui uh hi. Lampi gei ah a dimin kumpi galkap nam tuamtuamte kigualsuak uh hi.

Westminster Abbey innpi sungah leitung gam tuamtuam pan a gala hong pai kumpite, gam makaite leh mi minthangte na tu dimdem uh a, a luang dawhsang tungah a koih ding uh ciangin na dingto in zahtakna na pia ciat uh hi. A luang khuhna puanlap pen humpi thum tuang England flag, humpi san tuang Scotland flag leh tumging harp tuang Ireland flag kigawm ‘the royal standard’ a kici pen hi a, a tungah Kumpilukhupi, leitungbup lim (a tungah singlamteh tuang) leh kumpi ciang kikoih hi. Leitungbup lim tunga singlamteh kikoih pen thuum mite leitung cih genna hi a, kumpite in zong thuneihna a ngahna uh tunglam Pasian kiang pan hi ci uh hi. King Henry VIII in kum 1509 kuma Kumpipa a suah ding ciangin ‘ka thuneihna pen vantung Pasian kiang pan ka ngah hi a, hih leitung Pasian neihsa hi, kei a kem ding bek hi ing’ cih lungsim tawh hih leitungbup lim leh singlamteh na zang hi. Lukhu pen Kumpi ciamtehna hi a, ciangkang pen thuneihna lahna hi.

Sigal lak ah a naupang pente nih a tute Prince George leh Princess Charlotte, kum kua leh kum sagih hi. England Prime Minister Liz Truss leh a pasal Hugh O’Leary leh Cabinet ministers teng, Prime Ministers sem ngei teng cih bang a hankuang naih ah tu uh hi. Gamdang president bekbek 100 val ah US kumpi, France kumpi, Canada kumpi, South Korea kumpi cih bangte kihel uh hi. Tualo kings leh queens a nei gam tampi zong kihel uh hi.

Hunzatna ah Kumpinu nuntak laia nasep thupite pahtawi huai ahih dan gen uh a, Archbishop of Canterbury Justin Welby in, “Itna tawh mipi ading nasemte ki it in kiphawk tawntunga, thuneihna leh hamphatna deihbek tuate khahsuah nuamlo makaite bel a nuntak laiun zong kiphawk nuamlo kimangngilh khin hi” ci hi. Kum 21 a phaka a kiciamna, “Ka nuntak sung tawntung mipi leh gammite nasepsakna in ka zang ding hi” acih pen a kem paisuak hi” ci hi. Tua banga kamciam tangtun leitungah tamlo hi ci hi.

Westminster Abbey pen Kumpinu ading a mangngilh theihloh ding mun hi: a pasal neihna mun, kumpi lukhu a kikhuksakna mun hi. A pasal neih in Late 23 Topa Ka Tuucingpa cih la kisa hi.

Hun bawl man ciangin Last Post cih tamngai lasakna om hi. Tua tamngai lasa pen kumpinu pasal sih ningkum in zong a tumpa mah hi. Tua khit ciangin mi khempeuh daidide in minit 2 sung dingcip in zahtakna kipia hi. Hih minit 2 zahtakna piak pen UK gambup ah kitonsak uh hi.

Tua khit ciangin mangpha khakna la tamngai mah tawh tum in mi khempeuh tanglo in dinglai a, tua khit ciangin gamlapi God Save The King sa uh hi.

Lungsim phawng diak lakah King Charles III in a nu ading a khut tektek tawh a gelhtawm “Ka it ka ngaih mahmah ka nu. Charles R.” (in loving and devoted memory. Charles R.)” cih a hankuang tungah a kikoih pen hi.

Amun ah pai zolote adingin screen golpipi tawh ettheih dingin khuasungah kibawl a, gualnopna munte ah zong ettheih dingin kibawlsak hi.

Galpi nihna khit ciang a UK kumpi in gambup in vai a neihkhop uh lak ah Sir Winston Churchill sivui 1965 kum leh tu-a kumpinu sivui te mi tampen leh a lianpenpen ahi hi.

Westminster Abbey ah hun a zat khit uh ciangin a luang kiphumna ding mun London pan tai 128 km a gamla Windsor Castle lam zuan in tai uh a, thaupi leng in pua nawnlo in mawtaw tawh kipuata hi. Lamgei a ding mipite in pak tawh na theh uh a, a mawtaw tungah pak khawng bang ziaizuai hi. Mipite in lamgei pan a kimuh theih tawp dong Windsor Castle kongkhak ciang dim mitmet in kigual uh a, khasia a kapkap pawl tawh lunglenhuai mahmah hi. Lamgei ah zangiak lianga ngak Sandy Mar kici nu bangin, “naupbang bangin ka kap hi. Amah bang kumpinu kimu kik nawnlo ding hi,” ci hi.

Kumpite tenna innpi Buckingham Palace huang sung a lut uh ciang mipi om nawnlo in gamdai takin paito ngeungeu uh a, khasiat huai zezen hi. Lamgei khat ah a sakol neu khawi Emma na dinga, a pi mangpha khaksak uh hi.

Kumpi inn kongtual a tot laitak un tua muna nasem khempeuh in zong lamgei ah kigual in mangpha khakna na nei uh hi. Tuate khit ciangin a ui khawi nih, a neu kiukeu uite in inkiu pan mangpha na khak uh hi. Hih innpi pen Covid-19 sunga a nupa vua a kikhum tuamna innpi uh hi.

Lei a phumna hun, Zomite in Hanmual Hunbawl icih hun ah Dean of Windor David Conner in makaih a, Archbishop of Canterbury in Thuphapiakna tawh hun man hi.

Hun man ciangin Kumpilukhu pen a hankuang tung pang kumpilukhu bawlte in lakhia in biakna tau tungah koih uh a, Elizabeth kumpinu a hihna beita cih lakna hi. Biakna tau ah a kikoihna a hang pen kumpi hihna pen Pasian kiang pan hong pai hi a kumpi thak a kikhukkiksak mateng Pasian kiangah om hi cih lahna hi. Tua mah bangin leitungbup lim leh kumpinu ciangkang zong kilakhia in biaknatau ah kinga hi.

Tua khit ciangin King Charles III in Camp Colour kici kumpite omna mun ciamtehna puanlap pen a nu hankuang tungah koih a, tua-i tungah Kumpinu nasem lianpen Lord Parker in a ciangkang kuaitan in hankuang tungah koih hi. Kumpinu nasem ka hihna beita hi cih lahna hi.

Tua khit ciangin Kumpinu hankuang a kiphumna ding kuangpi sungah guan dingin leisung lam ah kikhiasuk a, sigal tamngai tumpa mah in tamngai tum kik hi. Hih tamngai tum ding pen Elizabeth in a nuntakna laiin a sih ciang hih bangin hihding cih a gensa ahi hi. A luang leinuai a tum khit ciangin mipite ciahta hi.

A nitak lam ciangin amau innkuan bek in leisungah phumna nei ding uh a, a pasal tawh a kizom in a luang sial ding uh hi. Ahi zongin a pua lam mi, mipi kuamah in muhpih lo ding, TV ah kilak nawnlo ding hi. Banghang hiam cih leh ‘innkuan vai’ bek hita ding ahih manin. A pasal Prince Philip April 9, 2021 asih laiin a luang pen a zi sih ciang mun khat ah sialkhop theih dingin asialo dingin a kepcingsa uh hi. A nupa un a kisial khop khit ciangin King George VI Memorial Chapel ah innkuan naihuaiteng tawh khakna hun khat bawl ding uh a, tua khit ciang St. George Chapel mun mah ah vui khawm ding uh hi. Dr. Hau Za Cin (Phuitong Liim) //09192022//