Puulnatna pan sinna nam 8 te ~ Pau Do Lian

Puulnatna pan sinna nam 8 te ~ Pau Do Lian

March 25 pan April 01, 2020 sungteng, “shelter in place- stay home” inn omding cih White House pan kumpi thuneite’n apulaktak teh ngaihsutna tampi hong omhi. Biakinn kikhawp, mopawi, sihvuina, cinema, museum, gym, shopping mall, ansai leh store saituamtuam khempeuh USA ah kikhaksak hi. Tuni (March 26, 2020 zingsang) ciang natna nei 502,250 leh asi 22118 phahi. Huntom nokhat sungin gamhau, cidamna lam ahoih’ pilna sang, USApen natna nei atampen nihna, China zom ah omta hi.

Ei Christian thu-um mite’n bangci dawn (respond) ding ihia? Dawnna tomin bel, “upna tawh laulo ding” cih hiphot hi. Zomi media leh mimal facebook tunga kipan apulaakte’n “lauluat ding hilo a, lauloh dingzong hilo” cihi. English tawh kigen nate ah tuaci genlo uh-a, kidawm mahmah ding cihi. Bangbang hileh hih natna minthang (Covid19) tungpan in sinna nam 8 kimu theihi.

Khatna (Asia thei mihing ihihi)

Late 103:15-16 Leitung mite lopa tawh akibang lel pakpalh bangin huih in semleh abei mang theite ihi hi. Akisia baih, asibaih mahmah mihing te ihi uhhi. Ganhing puulnatna omthei mahleh leitungbup alawhzo om nailo a hih Covid19 in mihing ahihnak leh deidan neilo, launeilo, azawng ahaucilo, in mi-ahing lai limlim susia zo hi.

Nihna (mihing khempeuh kibanghi)

Pian 1:17 Leitung mihing khempeuh Pasian muhna ah akibang ihihna kilangh hi. Hih natna in kuabeh kuaphung, gamgi neilo’ civom cikaang, nisuah na, nitumna, sakleh khangci lo in siasak zohi. Civom deuh aihteh thuakzo zaw cihbang omlo hi. Tua ahihman in Leitung mikhempeuh ih kibatna hongtelsak mahmah hi. Hih natna hanga sihna thuak a innkuan anusia te ii thuakdan zong Sengam taleh Italy hitaleh dahna kikim in khitui luangciathi. Ihthuak dan (launa, dahna, etc) te zong avekin kibang hi.

Thumna (mihing te control na kiciangtan)

Mihing te-in ih control zawh omhi. TV remote control, aircon, heating, leh ih computer password te ki control zo mah hi. Gym kimawl in ih pumpi ahiciang khat ki control theihi. Ahizongin control cih kammal akizat theih lohna hong tampian tahi. Natna lungno control zawhna dingin mivak kiphal lo, saileh pawi tuamtuam te ki control zomah leh natna lungno bangtan ki control zomawk hiam cih nop huai hi. Hand sanitizer, spray tuamtuam tawh ki control ciang akilawh dingzah kiamsak cih hi-a, ahizong in khuahun paizia kuaman control zolo hi.

Lina (Om tuamna social distance & isolation)

Siampi 13:45 Asiangtho lote apua lam-ah kituam koih hi. Gam puapak honglut (Gam khatpeuhpeuh ah) te atawmpen ni 14 kisit/en phot in kituam koihhi. Mihing te pianzia limlim pen tuam omlo dinga Pasian bawl (Adam zong a ompih ding Eve Pasian in bawl) ahih manin piguk anaipen kihal a tuding/ding ding ahihi. Khatleh khat akiho, thakipia, ankuang umkhawm leh khut kiletna kinai na nuam asa mihing te’ ki tuamkoih loh phamawh cihpen a om ngeinai lo thu ahihi. “Hong it ka hihman in hong/kong naih kei ding hi” cih kammal kisang siamta leh kilawm hi. Ih it te tawh akinaih mi ihi a ahizongin itna lahna in tuam omhun hita hi.

Ngana (Launa leh Upna akibatlohna)

Leitung bup lau ahihman in hizah takin social media ah genkul lo in ihmu tahi. Ei Zomi te’n bel “Lau luatding lah hikei’ lauloh dinglah hikei” cihpen kizamun mahmah hi. Lauloh dinghileh lah kigengen nawnlo khading a, mun kiciteng ah kigen aihteh alauhuai ahih lam kaphawksansan hi. Lauhuai leh kidawm cih kibanglo hi. Ih kidop mahmah nate pen lauhuai lua ahihman akidawm ihi hi. Mawtaw gas/petrol thun na pipe, kongkhak letna, ATM meekna leh sumbuk a vante tungah kilawh thei ahihman in ihtheih lohkal in kilawhthei hi. Mihing te kilawng khaleng natna kilawh a Zeisu in mihing alawnte’n damna ngah hi. Tua ahihman in khuahun a control thei Zeisu sungah apding longal omlo hi.

Gukna (Pasian ihkisap naleh thunget akulzia)

Pastor minthang tampi te’ in hih natvai bekbek online ah gengen uh ahihman in Pasian tungah thungetna hunte tua natna gengen na inzanghi. Thukhat in ih gengen sangin hoh thungetsak leng bang aci zaw tam? Gengen leng mite’n na zaza ding a lausemsem in launa tawh kidim dinghi. Ih Siavuan leh kumpi makai te adingin thungetsak hun ahihi. Natna lungno ngah tengnga phata hi. Haksat hunciangin ih buk nang Pasian lo mundang omlo ahihi. Italy kumpi pazong mipi mai-ah kap hi. Leitung nate mihing bektawh piangzolo, Pasian kisam cih honglak hi.

Sagih (Leitung mite amawknapi)

Thuhilh na 1:2 Nakhempeuh amawkna hi’ mipil Solomon in naci hi. Ih nuntakna ah tua gam kakhual zinnang, khawmpi, tentan, thugen na, nasep business vai atuamtuam gelsa in kinei napi tuate khempeuh avekin amawkna pi ahihi. Hih Covid19 lungno in banghong lakhiam cihleh leitung mihing te nuntakna amawkna pi ahihlam hongtel sakhi. Keibang hunngah (relax) sung English Premier League leh UFC a enzel hi-in tuate ki cancel khinhi. Kongging (street) te ahawmsa in, nidang parking kingah zolo tu’n mawtaw khatzong omlo ihmuh ciangin ngaihsut loh theihloh thu hongom mawk hi.

Giatna (lam etna)

Hih natna lungno omsung koimah paikhia, semkhia theilo ih omsung hun bangcizat ding cih ihlung ngai uhhi. Hih lungno natna hanga tomkal sung sihding lau-a kigin kholhsang in tawntung sihding launa tawh kiging kholleng napi takin uthuai hi. Zeisu in (Jn 11:25-26) Keipen thawh kikna leh nuntakna ka hihi, kei hong ummi te asi ngeikei ding uh hi. Leitung ah mawhna virus (Adam mawhna) honglut hangin Pasian takpi mihing hongsuak a eite tawh hong omkhawm ahihi. Miphak telak ah om a, maituam (mask) zanglo, an nekhawm tuidawn khawmin Zeisu in amaute damna pia hi.

Thukhupna:

Gamlakvakna 16:46; 31:16 Topa in Israel mite kihhuai gamtatna azuih uhciang plague (puulnatna) tungsak a, Laisiangtho thuciamlui sung ah 100 valbang kimu hi. Tua ahih manin puulnatna cihpen thu-um mite in serious tak a la-a Pasian mai-ah ih thuum ding ahihi. Tua hileh mitampi te in avang liatna muding uhhi. Pau D.Lian [Haksatna Lo-in Nopna Omlo]