Puahhuai Zogam Leitang

Puahhuai Zogam Leitang

Ei Zomi te pen ih pute ih pate khanlai pekpan kipan in Lokho nasemte ih hia, Noah suan le khak te hihang cileng kikhial lo kha ding hi.

Banghanghiam cih leh Piancil 9: 20 ah, Noah pen “a man of soil” “Leitang nasempa” na kici a, amah in ‘leitang tungah nasem in, leitang tung pan apiang mehteh mehgah, ankungte tawh kivak hi’ cihnopna ahi hi.

Tua mah bangin ei Zomi te zong leitang tunga nasem, leitang tawh akivak lokho mite ihi a, kammal dang khatin cileng leitang pen ih nuntakna phungpi ahi hi. Ahi zong in tu hunciangin Khualzin gamvak, sumzong paaizong kitamta a, leitang ii thupitna kimangngilh tektek ta hi.

Bangzahtak in sum le paai hau in, nuamsa in ih omphialmah zongin, leitang pen cik mah hun in, ki nusiathei ngeilo dinghi. Banghang hiamcihleh Ngun le Kham, sum le paai te’n gilvahna hongpia theilo a, gilvahna hongpia pen ann hi in, tua an pen leitang pan hong piang ahi hi. Ann omkei leh eite apuksi ding i hilel hi. Tua ahih manin ih nuntak na pen leitang tungah kinga hi cileng kikhiallo dinghi.

Tua hi a,

• Leitang ih it keileh ih nuntakna a it lo,
• Leitang ikep keileh ih nuntakna a kem lo,
• Leitang ih zahtaak keileh ih nuntakna a zahtaak lo.
• Leitang ibawlsiat leh ih nuntakna a bawlsia kisuakkha dinghi.

Ei mihingte pen ih nuntakna abawl sia nuam kuamah ki omlo in, ih nuntak na a-it, akem leh azahtakte vive ihi hi. Ahih leh, banghangin leitang zong it in, kem in, zahtaak lo ding ihi hiam? Banghangin leitang manphatna phawklo, theilo in bawlsia zenzending ihi hiam?

Ih pianna Zogam leitang enkik ni. Patpuanbang sia in, lobang tulta hi. Nidanglai laphuaksiam te’n a phuaklai in, “Eng dimdiam Zogam Nuam” ana cih uh pen, tu in “Tul gemgam Zogam Kuam” cihding bangkek hong hita hi. Ahi zongin, “Pianna tuunnu Zogam nuam aw, nang kongit hi, nang kongngai hi; ken hong taisan kei ning, nakha nuai ah hongsel in” ci-in, la ihsa veve hi.

Zogam in hongsel nading kha (wings) aneilai mah hiam? Zogam ah alimbelhtaak ding singkung manpha ihneilai hiam. Zogamah, mualdawn ciktui, luitui luangte nidanglai bangin aluanglai hiam? Sialtang tui nangawn kikham zo nawnlo lo dekdek phial in, Meiitei guntui na ngawn ani ani in hongtawm tektek ta a, hunkhatciang Lengtong Pauno’ la nangawn ihsak ngam nawnloh ding lauhuai kasa hi.

Ahih leh Zogam a it, a ngai, akem nuam u le naute, Zogam aa ding bangsemding ih hiam?. Adang tampi ih ngaihsutma in, ih Zogam leitang ih cidam sak photphotding thupi kasa hi. Leitang a cidam phot loh in, atunga omte cidam thei lo ding hi. Japan te khantoh zia etteh huai hi. Gamkhangto (setmuh naingan) ahihma un, leitang it masa in, leitang puahmasa uh hi. Mite’n piangthei kenteh acihnamun, leitangtung nangawnah mehteh mehgah suanin, gah tampi gahsak uhhi.

Tu lai takin, ih Kawlgam pen leitungah azawngpengam sazian ah kihel a, Kawlgam sungah, Chin state pen azawng penpen in hongki ciapteh sak hi. Hih pen, aki nial theihlo, mittanga ihmuh aman thu ahi hi. Banghang hiam cihleh, Zogam ah khaulzin gamvak, gamdang pai tampi ih om tei hangin, khuazin gamvak zolo, lokhawh bek tawh anungta zong mi tampitak mah ki om veve a, kumkhat ih khawh pen kumlang nangawn kikhom zolo ahih manin, a ngaihsuthuai mahmah le alung ngaihhuai mahmah thukhat ahihi.

Ih gamah State dangte bangin leisung sumpiang ihneikei a, ih neih sunsun nangawn mikhut sung ah atung ding bang kekkhat ahihi. Leisung sumpiang omlo ahih leh atunga piang ding ihnei hiam? Om tuanlo hi. Banghang? Ih leitang cidamlo hi. Tua ahih manin, leitang cidam ih neihzawh na’ng ih ngaihsut mahmah hongkulta hi. Ngaihsutbek hinawnlo in ihsep khiatding hun mahmahta hi. Bang zahtakin ki ukna hoihin, suahtakna ihngahhang, ih teenna leitang, ih nuntakna gam le lei cidam kei leh bangci bangin ih minam cidam in, khangto thei tuanding ahi hiam? Tu’n kipan leng ziakai nailo hi.

# Theihna hang hilo in, deihsak luatna tawh ka at ahih man in, lungsim tawh kituaklo le at khelhna a omleh hong theisiam a, nong zuunsak nading un kong thum hi. Zogam a it, Khuppi (Fr. Raphael) Manila, Philippines