Pu Zo icih Kuam Hiam?

Pu Zo icih Kuam Hiam?

Pu Zo icih pen ih Pu hi, ih pian khiatna hi a ci pawlten a tel hetloh thu en suk leng. Pu kici peuhmah minam min hilo aa mi min ahih lam ih tel ding thupi masa hi. Minam min khat peuhpeuh Pu ci-in kisam ngeilo hi. Gan hingte zong Pu ci-in kuamah in sam ngeilo hi. Mihing bek Pu ci-in ki sam hi. Khanggui a kisut ciangin mihing panin khanggui kisut hi. Tua mihing pen Minam min hi ngeilo hi. Pu Zo khang panin khanggui a sut pawl khat in:

1. Pu Zo…Kip Mang.., leh Cin Hil

2. Kip Mang…Nawt Phut, leh Len Mang

3. Nawt Phut…Naw Song, Phu Song, Song Phut, Sum Kop, Kop Sian

4. Naw Song… SongThu, Ngaihte

5. Song Thu…That Lun, Sung Mang leh Han Hen…khang 5 ciang sut pak phot ni.

Hih a tunga Pu Zo panin khangsut nuamten zong a kal lak thu pawl khatte a ki cian tak in a thei omlo ahih manin Pu Zo panin Khangsut kuamah om sese nawn lo hi. Tuamah bangin minam min Pu Zo cih bangin ki zang ngeilo hi.

Pu Zo panin a piangte pen minam min hilo aa mi min ahihi. Hih Pu paikhia leng Zo bek hi aa, ahi zongin hih mi min Pu Zo pen ko minam hi aci om ta leuleu hi. Pu Zo suan leh khak khempeuh Beh khat hi in um lai ing. A hangin Pu Zo icih pen mi mah aiteh. Pu Zo in minam neih aa tua-in Zomi ahihi. Pu Zo in hong dampih lai hileh a pa min khawng a minam min Zomi cihte hong hilh thei kha mah ding hi. Hong hilh theihloh hangin Pu Zo pen minam min hi ki ci haihai nawnlo hi. Tu-a khang thak khaicii hoihlo pawl khat in hih Pu Zo pen ei minam min hi ci gawpgawp om lai hi. Pu Zo icih in minam neihto lai hi na pi minam min a theilo bangin ih Pu Zo ih hai muh lai hi.

Pu Zo pen ih pupi hi icihleh:

Pu Zo in suan leh khak hong neih in tuate suan leh khak te midang tawh khua khat ah hong teeng khawm uhhi. Tua khua ah a veng a veng in ki khen uh aa , Sihzang, Saizang, Zote, Teizang, Vangteh….cih bangin Veng min na phuak uh aa, veng khat leh khat akumkum in kampau khat ki behlap om aa, ahi zongin kampau ki tello kamphen ki samlo uh hi. Kamphen kisam lo teng pen a minam uh Zomi ahihi. Hih a veng a veng in a ki khen uh hangin a Beh min uh
ki banglo in Teengkhawm uhhi. Beh min ih cih pen minam min hilo aa ih pupi min na hizaw hi.

Hih veng minte hangin minam sung ki et khilhna ding om keuhkeuh lo hi. Hih a vengveng in a ki khenna uh Sihzang, Saizang, Zote, Teizang, Vangteh…cihte sungah Beh tuamtuam om khawm mang ahih manin Zomi sitset ihihna ki lang semsem hi. Tua ahih manin hih veng ki khenna Sihzang, Saizang, Zote, Teizang, Vangteh…cihte ki neu muhsak leh ki gen siatsakna ding kuamah om lo hi. Tua mah bangin hihte hangin ki phatsak pihleh ki liat sakna ding thu omlo hi. A veng bulzaw aneu zaw cih bangin ki muhloh ding ahihi.

Pu Zo cih min pen Sihzang, Saizang, Zote, Teizang, Vangteh…cih bangin Vengmin khat peuh tawh ei ut thu in ki kheng thei ding hilo hi. Ih khanggui sutna ki bang kimlo ahih manin Pu Zo panin khanggui a sut ten zong ki ultung sak luatna ding neucik zong omlo aa, adang ten zong neumuh sakna ding om keuhkeuh lo hi. Ih khanggui sutna Pupi peuh adangte kiangah va tang koko ding hi samlo hi. Beh pawi khawng bek ah hihte ki zangh hi.

Hih bang thu kong gen ciangin Pu Zo ih cih pen Mi nam min a sa kha 1% khawng om kha thei ahih manin itna veina deihsakna tawh a telbaih pen dingin ka gelh ahihi. Pu Zo pen mi min ahih manin Sihzang, Zote, Dim, Saizang, Teizang….cihte tawh laihziau thei dingte ahi kei hi.

thawntuangTheihding:: Zomi ah ki gawm ni cihthu te Zomi te lak ah va tang koko pen ahaivai thu khat ahihi. Zomi ki hi khin na pi, Zomi te kiangah Zomi ah ki gawm ni cihcih kul nawnlo hi. Nam dangte kiangah Zomi ah ki gawmni aci hileng phadawp lai hi. Ki pawlna(….) ah ki gawm ni kici thei bek hi. Tuateh Zomi ah ciah kik ni cihthu zong Zomi ki hi na pi koi ah ciah ding ihiam?

Theihbeh ding:: Zolai ih neih a ki pan Zomi cih hong piang hi dihdih lo hi. Ih pu ih pa ten Zola tampi na phuak uh aa, tuate sungah Zo cih tawh ki pan thu tampi om hi. Hih Zo kici tawh a ki pan khempeuh ko a hi, no ahi va cihdan omlo hi. Hih bang lungsim ih neih laiteng ki lemna ding a lunggulh ki hi ngeilo ding hi.

Pu Zo khang panin khanggui a sutnuam tentan ten na theih nop uhleh ki kupto laini. Pu Zo pen mi hi ei, mi nam min hi kei ei cih ki tel siangta in um ing.

Thawn Tuang
Zomi Angvaan
Dec 24, 2013