Pu Chin Sian Thang’s Brief Political Biography (1961 – 2021)

Pu Chin Sian Thang’s Brief Political Biography (1961 – 2021)

Pu Chin Sian Thang pen gamvai paunak tawh genleng Political Animal taktak hi in a khantawn in a gamvai nasepnate sut ding hileng gen zawh loh zah ahihman in Highlight tak deuh teng pulak ding hi leng:

Rangoon University, Hill Chin Students Union ah President asep laitak ahi 1961 kum June 8-12 sungin Shan Ukpite Makaihna tawh ပြည်နယ်များ ညီညွတ်ရေးအဖွဲ့ (State Unity Organization) vaihawmna ahi Taungyi Conference ah tuahun lai Chin Special Division Tang in (CNO) makai Pu Mang Tung Nung nungzui in vakah hi. Meeting hun ciang Pu Mang Tung Nung tangin Thusung hi. Tua Khawmpi bulphuhpi ahi “Mualtung mite in Union gam ei kicih hangin ah Union hilo Unitary gam kihi gige aiteh Panglong Thukimna mah bangin Union gam taktak ai kei leh Federal gam taktak lam ding kisam hi” cih ngim na hi. 1947 Constitution pen Panglong Agreement bangin puahkik ding cih Conference pan thukim uh ahih manin Drafting Committee kiphuan pah uhi. Pu Chin Sian Thang zong Drafting Commmittee ah kihel hi.

1962 March (1) nitak in Prime Minister U Nu vaihawmna tawh အသံလွှင့်ရုံ ah kibawl Ethnic teng tawh Nitak Annek khopna ah Pu Mang Tung Nung, Pu Kham Za Kam, Pu Gin Do Lian, SB Pu Khual Za Kham, Pu Khup Za Go tawh va kihel thei uhi. Tua mun ah, President Sao Shwe Tike, Prime Minister U Nu, Sao Khun Cho cih bangin Ethnic makai tampi kihel hi. PM U Nu in nitak annek na pan in, “zingciang Taunggyi Conference Policy ahi Federal kiukna thu Parliament ah thu kisung ding hi” cih pulak hi. Tua ni pen Kawlgam Tangthu ah (အသံလွှင့်ရုံဆွေးနွေးပွဲ) cih in ki ciamteh hi. Aihang in tuani zan mah in General Ne Win makaih Kawl galkap te in, “Shan te theih Federal Policy cih tawh Gam kiphelkhap ding hi” cih paulap in Gam Ukna Buluh uhi.

1962 in General Tun Kho Pum Baite Zangkong ah hong pai in Zogam ading Pakistan gal huhna ngah na dingin Pakistan Embassy ah tam veipi paipih in Thau huhna ngah pih hi. East Pakistan (Bangladesh) pan Thau ngah theihna General Tun Kho Pum Baite min tawh register hi in PNC ading ahi hi. Pu Chin Sian Thang in Pu SB Khual Za Kham min tawh ki register Zomi Tangko News Letter ah Editor asep lai hi-in offset om na 38th street Lower block ah General Tun Kho Pum Baite zin tungsak hi. East Pakistan pan gal huh thau te Pu Thual Zen hun dong in Zomite in ki ngah in Colonel Son Kho Pau makai in Tangval 8 tawh Thau va pua ngei uhi.

1974 Constitution at ding cih Bo Ni Win te pawl in hong vaihawm ciangin State le Division kim ah Thusung dingin Palai te paisak tek in hilhcianna hong neihna uh Tedim ah zong 1972 in hong tung uhi. Socialist Constitution vai Kikupna hong bawl laitak un Pu Chin Sian Thang zong Tedim ah a om laitak hi. Colonel Sein Mya makaihna tawh Tedim Sangpi Hall ah kibawl hi in Pu Chin Sian Thang in, “Socialist System mah tawh gam ki uk ding na cih teitei uh leh Socialist gam veve USSR, Czech Republic, Yugoslavia, Germany gam te in zong Federal System tawh pai veve uhi” cih thusung hi. Tua ban ah

• Belpawlna bulphuh Gam hi ding

• Parliament Dawl Nih hi dingin, Parliament Dawltung Dawlnuai in Thuneihna akikim kul hi. Parliament Dawltung ah MP Palai zong akikim in koih kul hi.

• Central Government thuneihna zong ciangtan ding Limit Power kisam hi.

Residual power a tamzaw pen Ethnic Khamtungmi te let ding cih gen khia hi. 1961 Taungkyi Conference Thukimna Policy te mah vuicing tak in mipi tung ah hilhcianna ahi hi. Tua bangin thu sungna aneih ciangin hun makai Colonel Sein Mya (1988 in singnuai lut PDF found in gamsung ah hong nusia khin) in khawl in ci ta leh khawl vet lo gensuak ahih man Mic khak sak hi. Mic akhak sak hangin zong aman dong mah hangsan tak in gen suak hi. Tua khit ciangin Constitution ading Mipi in thusung thei acih ciangin Pu Chin Sian Thang leh Khangno tampi tak in amau deih Constitution Laiphah Ne Win kumpi kiang akhak uh leh mi 50 val mat thuak uh in Kawlgam bup ah Zogam pan kimat thuak atam pen ahi hi.

Pu Chin Sian Thang le Pu Song Cin Lian pen Zangkong ah MI te gitlohna penpen mun in a minthang Yi Kyi Aing ah sawtpi tak kikoih hi. Yi Kyi Aing pen amun hoih lo lua ahih manin Asthma natna hong ngah hi. Tua pan in Insein Thongpi ah kipuak in Insein Thongpi pan in Mandalay Palace sunga Thong ah kipuak hi. Hi bangin bawlsiatna tampi athuak hangin bangmah Thukhenna om hilo in Kepcingna (Detain) nuai ah kum (2) asawt hi. Pu Chin Sian Thang, Pu Son Cin Lian, Pu Lian Uk te sawt vei kiman pen in adangte kha (3) kha (4) tawh hong suakta uhi.

1988 Oct 24 in Zomi National Congress (ZNC) kiphuat khit December kha pawl in President sep kipan hi. 1990 kum March kha ciangin ZNC party Policy Tangkona Television leh Radio pan in Kawlpau tawh gen hi.

Chin hong kicih hangin Ko le Ko Zomi kici ung Ka Min man uh hi. Gentehna bangin tulaitak in Min man ahilo Zangkong ah Bo Sonpek Lampi kici in a Min man in Conbik hi. Tuaciangin Thantalang pen Mangkangte in Kalang Kalang cih akipan Sihzang te zong Siyin cih bangin Min manlo in hong kisam hi.

• Democracy Kiptak Tawh ki uk ding hi
• Free Market Economic System ka deih uhi
• Panglong Sprit Lapsang ding ka deih uhi. (Note: Tua hun in Galkapte in Federal za nuam lo uh ahih man in Panglong Lungtang cih in aki zang ahi hi)

1996 Jan 4 nitak in Daw Aung San Su Kyi tawh zong kimuh masak Ni hipah in ama kiang ah, “Daw Aung San Su Kyi aw , Kong kimuhpih nopna uh pen, na Pa lamsa innpi Belpawl gam pen , a tate tannute ginat loh na hangin nget kah in puk ding ahih manin, Hih na Pa lamsa Belpawl gam koi ci lam kik ding na hiam, Ethnic te tawh khut kilet sawmlo na hiam, cih thei nuam ung cih hong dong nuam hi ung’ cih kam Khat bek gen ziau hi. Daw Aung San Su Kyi in zong “Tulian in hong dawng thei pah kei ing in mai kha Union Day pen ka inn ah kibawl ding hi in, tua Ni ciangin hong Tangko ding hi ing” cih dawng kik hi. Tua mah bangin 1996 Feb 12 ni Union Day pen DASSK inn huang pi sung ah bawl in Ethnic Party teng zong sam in thu kikup pih hi. 1996 Independence Ni hunbawlna ah Pu Chin Sian Thang makai in Pu Do Pau, Pu Gin Kam Lian, Pu Khual Nang kihel uhi.

1997 kum ciangin Pu Chin Sian Thang (ZNC), Naing Tun Thein (MNDF), Dr Saw Mra Aung (ALD), Khun Tun Oo (SNLD) in SLORC makai Bo Than Shwe tungah Laikhak uh in 1990 Election amanlang in Thukimpih unla Parliament zong amanlang in hong sap sak un cih Mipi theih in Tangkona hong nei uhi. Tua dungzui in Nyaung Dong lam khualzin na ah awk cipna pan Zangkonog hong tungkik Daw Aung San Su Kyi in zong Working Committee Khat phuan khia ni acihna tungtawn in NLD party Secretary U Lwin in Meeting asapna ah ZNC pan in Pu Chin Sian Thang , Pu Gin Kam Lian , Pu Vung Za Pau , SNLD party pan in Khun Tun Oo leh Sai Nyut Lwin , ALD party pan in Dr Saw Mra Aung leh U Aye Thar Aung , MNDF party pan in Nai Tun Thein le Nai Ngwe Thein va kihel thei uhi. Inntek NLD pan in zong U Tin Oo, Daw Aung San Su Kyi tawh kikupna pan Working Committee phuan ding cih thukim uhi. Working Committee ah Ethnic party (4) tangin ALD party pan U Aye Thar Aung pen Palai in kikoih in CRPP hong pian khiat ciangin Secretary sem hi.

1998 August kha ciangin NLD Secretary U Lwin inn ah kibawl CRPP piangna meeting vai pen Galkap kumpi in thei veve ahih manin September (9) in party register nei nawnlo ZNC ALD MNDF party Makai te mat thuak in Yemon ah kep thuak uhi. SNLD le NLD party (2) pan makaite manlo ahih man in CRPP sung Divide and Rule dan in hong kikhen khapna hi cih kitel hi. Aihang in CRPP kiphuan hi cih September (15) ciangin ki Tangko veve hi. September (9) in Ethnic party (4) makai te bek mat thuak hilo in NLD party MP zong (100) val kiman hi. NLD khangno activist honkhat zong mat thuak uhi. Pu Chin Sian Thang Yemon ah aki mat sungin a Kal natna suak ahih manin Sakura zato ah ki at in hong dam hi. Tua khit ciangin Mingalardon, MI (9) te Branch ah kikem in kha sim in zan (1) ta inn ciah thei hi.

CRPP hong Tangko uh ciangin Leitungbup gam tuamtuam leh Kawl gamsung ah Politician khempeuh in lunglut mahmah uh ahih man in Zangkong khuapi sungah Gam tuamtuam pan Embassy khempeuh bangin ZNC tawh kimuh theihna ding Appointment hong hanciam tek uh hi. Tua mah bangin Leitungbup ah Gam tuamtuam te akipan Kawlgam sungah Politician te, Mipi te in Zomi cih hong theih khiatpih masakna uh pen Biakna pawl tuamtuam ei tamna pan hilo in Zomi National Congress pan hi cih zong telcian kul hi.

CRPP ah hong kihel ciangin MI te in, “CRPP ka thukim pih kei hi. Ka party uh zong om nawnlo hi cih na khut tawh Lai at in Sign nong kaih sak leh kumpi in kong huh ding uh hi, Kalay ah na inn Bank leiba hong loh sak ding, meter box pia ding, Zangkong ah zong Beer Pump Khat kong pia ding uhi” cih Pu Chin Sian Thang kiang ah zolna hong nei uh hi. Pu Chin Sian Thang in, “ka Party sung ah ka ki thukim sa uh hi ka khawl kei ding hi” cih adawng hi. Tua khit akipan bawlsiatna thuakna hong tam tektek pah ahih manin CRPP vai tawh ki matna a thuak (9) vei leh Kalay ah (3) vei gawm tawh (12) vei mat thuak hi.

2010 Election ding ciangin 2008 Constitution nuai ahih na tawh ALD, NLD, SNLD, MNDF, ZNC party tengin Kitelna lut lo ding ci-in ki Boycott hi. Aihang in Boycott bek tawh thupianglo ahih manin Political Platform khat khunkul cih tel ahih manin MNDF makai Naing Ngwe Thein tawh thu kikum in Panglong Thukimna bulphuh lo tawh Kawlgam ah Gamdaihna omlo ding hi cih akipan Second Panglong Sapkik ding Tangkona nasep dan ding akikupna teng uh inn ah Yetaw vai tawh kiman Daw Aung San Su Kyi tungah asim tham in azaksak uh pen Daw Aung San Su Kyi in zong thukimna zasak kik hi.

Zangkong ah Politic naseppih Sitnite tawh kizop beh to in Naing Ngwe Thein in naseppih Partyte, Politiciante hong na kaikhawm hi. MNDF pan Naing Ngwe Thein, UDP pan Phyo Min Thein, Veteran Politicians pan Khin Maung Kyi, Shan Generation Youth pan Sai Tun Aye ZNC pan Pu Kam Lam Khup cih teng active na tawh a Thukim Politician teng in Suaikaihna ah amasa pen U Tin Oo, a nihna U Win Tin cih bangin Mi (57) in suaikai uhi. Tua Laipi pen Kalay ah ki puato in Topa’ tung Lundam koh Inn Thungetna cih paulap in 2010 Oct 24 ni-in akibawl ZNC party Kum (22) cin ni in Kalay Declaration cih Leitung kiuli thawn in ki Tangko hi.

Home Arrest hun cing ta leh tuipek in ahawh sim Ye Taw vai tawh inn ah ki mat beh Daw Aung San Su Kyi hong suahtak khit 2010 Nov 20 ni Takhen Thein Phe (Wa Khe Ma) inn ah Khanghamte Thuphadawhna cih min paulap in akibawl hunpi sungah Zomi, Mon, Arakan, Shan party le NLD party akipan Veteran Politician te mai, pawisim mipi mai ah Pu Chin Sian Thang in Daw Aung San Su Kyi khut sungah Kalay Declaration maban vaipuak ding teng ap hi. Daw Aung San Su Kyi tung ah “Second Panglong sapkik ding na thukim mah hiam” cih adot leh “Ka thukim mah hi, aihangin Second Panglong pen ziakai lua ta in hun tawh kituak dingin 21 Century Panglong ci zaw ding hihang Kei guak in sem zolo ding ka hih manin pang khawm ding hi hang” acih leh mikim zong thukim uhi. 21 Century Panglong in 2016 kum ciangin muh theih in hong kipan thei pan himah taleh Sakhitui nek in pan leng ZNC pan hi cih mikim in tel kul hi.

2011 Nov 30 in USA, Secretary of State, Mrs. Hillary Clinton Kawlgam hong zin lai in Daw Aung San Su Kyi inn ah CRPP makai teng tawh kimu in Mailam Kawlgam maban thu kikum uhi.

2015 General Election ah Tedim pan in Mipi Telcing hong ngah in Kum 4 leh Kha 10 sung Parliament hong kah hi.

2016 Dec 16 in NLD pan U Win Htein vaihawm sakna tawh Pu Kham Khan Thang, Pi San Nuam tawh vapai in Daw Aung San Su Kyi inn ah Tedim District ngetna Open Letter piak kawm in Daw Aung San Su Kyi kiang akam tawh zong gen hi. Nipidaw Sipin Avenue ah Boarder (33) Room Number (6) ah TB natna tawh a damloh sungin nat veh hongpai NLD makaite tungah zong “Tedim District mahmah ka dam lai in munuam ing” cih gen hi. 2020 Feb 19 ni Tonzang ah Daw Aung San Su Kyi hong pai lai in zong Tedim District ngetna Open Letter Laipi helicopter tung pan hong tuak phet Daw Aung San Su Kyi khut sung ah Pu Gin Kam Lian pia sak hi.

2020 July 22 nimit tawh Chin State Government in hong khak Tedim District vai tawh kisai Lai ka ngah uhi cih President Office pan in zaksakna Lai October (9) in Pu Chin Sian Thang min tawh khak hi. Union Parliament kah kik ciang in Tedim District vai Procedure om bangin kikip sak thei ding hi taleh SAC Galkap kumpi in 2021 Feb (1) in Ukna hong buluh kik ciangin Parliament hun bei hong suak hiau hi. Zogam ah Mipi in atam zat pen Telenor Phone Company te hong tung nang in zong Pu Gin Kam Lian, Pu Kham Khan Thang tawh Sign kai uhi.

Pu Chin Sian Thang makaihna tawh Party vai khempeuh kisem ahih mah bangin Zogam khantohna Pyithawngsu Hluattaw tungkhin Kaptel Myo ngahna thu, Lampi, Sang inn, Zato, Lei, akipan na khempeuh zong Pu Chin Sian Thang theihpih vive ahi hi. Nipitaw Parliament ah mikim in zahtakna ah Federal Pu akicih tek mah bangin Zogam ading anasep na te pen Parliament Procedure ah om Aksi Laklo Laipai vive tawh ahih man in Parliament ah ding thethu loh na hangin mipi in ki tam muh khalo cih ding hi.

2019 January 21 ni Tedim ah Daw Aung San Su Kyi hong pai lai in Pu Chin Sian Thang sign tawh ZCD in State Counsellor Daw Aung San Su Kyi tung Open Letter kipia hi. Lai sungah, “2008 Constitution puah ding cih pen a Constitution sung mah ah ki awk sa cih theihsa hi’n, 21 Century Peace Conference thukimna Union Accord ah Democracy Federal System gam cih Partyte, Kawl galkap te leh NCA-S EAO teng thukim sa hi, Pyithawngsu Hluattaw ah zong alangpang omlo MP khempeuh ki thukimsa Federal mah ahihmanin 2008 sungah Article (8) ah Sikan Pihwa daw Democracy cih pen Democracy Federal in laih kik masa leng anung sang ah 2008 Constitution puah kik na dingin ki kantan, ki puah ZO bek ding cih ZCD party upna hi”. Cih kigelh hi. Tedim pan Daw Aung San Su Kyi Nipidaw atun kik ciang in U Aung Kyi Nyunt tawh Mi (5) meeting sam in 2008 Constitution Amendment Committee pat dingin thupia hi. January 29 ni U Aung Kyi Nyunt in Pyithawngsu Hluttaw ah 2008 puah kik ding leh Article (8) puah kik ding thusung in atam zaw thukimna ah Constitution Amendment Committee Member (45) tawh ki form up na ah ZCD pan Pu Gin Kam Lian kihel hi.

Pu Chin Sian Thang in guahlak, dailak, thauvui thautang lak ah kum (33) sung hong makaih ZNC Policy (4) akipan 1961 – 2021 dong kum (60) sung Ciampello in atupna, a ngimna ahi Federal Democracy gam mitmuh in atang tung dongin Zomi Khangthak te in zong pankhop ding ahi hi. Record by: Pu Gin Kam Lian & Pu Pau Kim Tuang/ Voice of Zomi