Politics tawh kisai thu (14) ~ Pau Sian Lian

Politics tawh kisai thu (14) ~ Pau Sian Lian

1. Politics pen a sung thugil taktak en lehang party vai, min le za vai, beh le phung vai ciang hi masa lo-in, Topa Zeisu gen “Mualtung Thuhilhna” (Sermon on the Mount) bangin daihna, kilemna le thuman thutak lunggulhna cih a kipan aki nenniam mizawng, daipam, numei naupangte zong thupit sakna hi masa zaw hi. Thuman thutak lunggulhte in hih politics gil taktak veilo in om theilo hi.

2. Politics pen a thugil paipi (theory) a kikan teh thuk-in zai-a, mihingte khuasakzia le setkhuak pilnate huzapna tungtawn-in thu omzia kikhel den hi. Tua pimah politics hoih a neizo gamte pen gamhoih gamnuam hipah hi. Politics lam sinna a ultung sak minamte in hunsau ah mazang zaw veve uh-a, politics tuihual ah pehsiam zaw pahin, kikhelnate-ah luanglet lo takin paizia man tawh sawhkhawm theizaw uh hi.

3. Politics pen gam le minamte ukin makaihna (governance) hi-a leitung bup ah a kicing khin sitset, puahbeh ding omnawn ngiatlo ki-ukna cih om theilo hi. Hih ki-ukna pen kizom in a luangden nasep (process) khat ahih manin mailam ah a hoih pen ding thute kankhol, mukhol thei (vision) in, tua dinmun tun nading mipihte kalsuanpih theihna pen politics siamna ahi hi.

4. Politics pen Max Weber gendan ahih leh, “A kiciangtan sa gamhuang sung-a om mipite khuasakna ah thuneihna hawmna (distribution of power),” ahi hi. Mipih-te’ sunmangte tangtun sakzawh nading le mipihte hawmkik theih ding thuneihna (power) koi-ci ngah ding, cih thupi masa pen pah hi.

5. Politics pen mimal khensatna (decision) tawh kihelna ahi hi. Thuneihna ki-innkholh cih omlo in thu neihna ngah nading midangte tawh kidem in hanciamna ahi hi. Tua ahih manin “kei thuthu” cih theih hilo-a, tangpi piak siah (tax) tawh kivak sung diak pen thuneihna hong ngahsak mipite’ sawl bang manding le mipi’ aw mah ultun sak det ding ahi hi.

6. Politics pen thuneihna (power) tawh kilimzop ahih ziakin politics ah a kihel khin vette in khamtheih guihtheih zongsat (addict) bangin thuneihna duh ngaungau thei uh hi. Tua ahih manin mimal khat, kipawlna khatbek tungah thuneihna khempeuh bup-ap gaih ding pen lauhuai mahmah hi. Mark Twain in, “Naungekte tawdap khek zeel loh a phamawh bangin politiciante zong khek zeelzeel kul hi. A kulna ahang zong kibang hi,” na cihi.

7. Politics pen lampi thak zon tawm, sial tawmna (entrepreneuship) namkhat ahih manin lampi kikhak in kidal keei tase mahleh tua sung pan lampi zonkhiat theih veve na ahi hi. U Win Tin in, “Aisa zong a pumpi sakin khauh mahmah tase leh mitvun (eyelid) neilo ahih manin a mit pen tho kang pehna tawh zong si thei hi,” na ci hi. Mipih tading sepnop takpi nak leh lampi na om hamtang veve hi.

8. Politics pen gam vai kikhelna tuamtuamte tawh kizui in ngaihsutna thak neih ding kisam den hi. Peter Katzenstein genna-ah, “Politics i cihin ciantak-a kituat khol theilo (unpredictability) le a kician omlo (uncertainty) dinmun ahih manin politics kimawlna-ah kuama nial theih loh lampi man (rational) le kuama ngaihsut khak loh lampi hoih (innovative) tawh hong piang bangbang hunhoih hunphate zatsiamna (seize the moment) hi,” ci hi.

9. Politics pen khuahun tawh kizui-in gamtat theihna (pragmatism) le vandek bangin deksiamna (negotiate, compromise) zong kisam hi. Ahi zongin dinpih thugil (principle) meel neilo-a dinmun laih kawikawi-te zong lauhuai mahmah hi. Gandhi in leitung-ah siatna a piangsak nam sagih-te lakah “Dinpih thugil neilo politics” cih zong khatin nahel hi.

10. Politics pen kidemna pawi (game) ah kihelna hi-a, thapiak le panpih zong kisam napi a kimawl dingte ngiat zong thakhauh-in pilvang (qualify, smart) ding thupi zaw kan hi. Tua ahih manin a cidam lo (unfit) party-te hong bei ding-a, party thakthak zong hong piang thei lua hilel-in patauh huai khollo hi. Kimawlna ah a gualzo party, a muanhuai zawzaw party-te teeltheihna pen mipi-te’ hamphatna hizaw hi.

11. Politics pen ei deih le ei huat partyte kikal panpihna le demna ahi hi. Ahi zongin a picing sa mipi (civilized citizens) te in party khat vai sang gambup vai, minam bup vai vei zawin, kidempih party te-in nahoih a sep leh theihpihna pia (recognize) uh a, ei panpih party te’ thanemna zong pumgup lo-in kipuahphatna in neizaw uh hi.

12. Politics pen phatna le kona-te in a ngakkholh litletna hi-in, a kihel politiciante zong mihing hihna tawh a kicing sitset kuamah hong omlo hi. Sepna peuhah pum phatna le pum huatna omden ding ahih manin Harry Truman in, “Meisa na thuakzawh kei ding leh anbuk ah lut dah in,” acih mah bangin, hihteng ka thuak ngap takpi diam cih kidot tawm den kul hi.

13. Politics pen thuakngam in kipumpiakna (sacrifice) ahih mah bangin a gah nek khak ciang zong limci phadiak pah hi. Kivak tawmna (profession) nam khatzong ahih manin khat veivei tangpi vai sang mimal ankuang vai khauhpai zaw thei hi. Tua ahih manin kivak tawm nading ciangtawh a patau lo mite, a pualam mite hong kihel uh teh politics taktak hong om zawsop thei hi. Thu nei ngeilo-te thukhual zawthei hi.

14. Politics pen thubuaina le siatnate’ zungpi (roots of conflict) te zongin kankhiatna le tua zung hoihlohte long khia-in paihkhiatna ahi hi. Mailam ading khaici manpha vawhin posakna na zong ahi hi. Zung hoihlo te pan piangkhia a hiang, a gah (symptoms of disease) sat khiat thapaih ciang tawh politics siam kici theilo hi. Pau Sian Lian