Pilna sangin a thupizaw bangom hiam? Upna

Pilna sangin a thupizaw bangom hiam? Upna

Pilna sangin a thupi zaw bang om hiam? Pilna sangin a thupi zaw itna om hi. Ih pil loh ih siam loh hangin ki-it liailiai peuh rehang nuntak nuam zaw hi. Ih pil ih siam hangin ki-it kei rehang leitungah galpi piang den ding hi.

Pilna tawh kisai gen kik rehang, pawlkhatte in pilna sangin a thupi zaw bangmah om nawn lo hi ci uh hi. Gamdang pai khat, Lai Siangtho sang man khat ong tung leh, leitung pilna, computer pilna, I.T hun hi, ci-in mihingte bel kikhang to mahmah kinak pil mahmah ta hi, ci-in mihingte pilna laitakin Pasian kimangngilh a, mihingte’ pil daan bel hi mahmah nawn lo hi. Pilna sangin a thupi zaw bangmah om lo hi khawng ci-in, nitumna lam gam a, Pasian a upna uh hang a, eite sanga a pil masa zaw Mikaangte pilna khawng kisialh gen keei dih laizang thei Pasian thugen mi kitam mahmah lel dih hi. Tua hi a, upna sangin a thupi zaw pen pilna hi ci-in, Lai Siangtho in bang gen cih kikancian nawn lo mawk uh hi.

Hi lo hi. Lai Siangtho in pilna sangin a thupi zaw pen upna ahi hi, na ci hi. Pilna ih ngah theihna dingin upna ih neih masak kul hi. Mi khat pil hen na cih leh Pasian’ kammal tawh lungdamna thu genpih inla, tatkhiatna kisam ahih lam kithei sakin, kisikna tawh mawh kimaisak kul ahih lam, mi mawh mi ahih lam kithei sakin la, Jesuh Khrih tanpa le Topa-in a up kul ahihna thute, a up leh mipil suak thei pan bek ding ahih lam thei sak in. Upna ih cih pen Pasian pen naa khempeuh a piangsak Pa, bangkim thunei Pa, mawhneite amah mah in ong tankhia Pa ahihna thute pen upna bek tawh ki-um thei bek hi. Ci le sa itna tawh ki-um thei lo hi. Leitung pilna tawh ki-um thei lo hi. Leitung khantohna le pilna khawng na veng mi mawl mihaite na gengen lel tak hangin lamdangsa-in zaaknop sa lel bek ding uh a, kikhelna piang thei lo ding hi. Tua ahih manin Topa Jesuh ong tatkhiatna Singlamteh thu gen belin nei den zaw in. Tua Singlamteh thu na gengen manin upna khat hong ngah thei photphot uh leh tua a kisap nadangdangte ahi pilna, khantohna le hauhnate in zui thei pan ding hi zaw hi. Pasian’ gam le a dikna zon masak pih in (Matthew 6: 33). Tua Jesuh’ dikna tawh diktanna (pianthakna) hong ngah masa photphot uh leh, hih a kisap uh nadangdangte ahi, pilna le hauhnate zong kipia thuah veve ding hi. Kawlte’ pilna in bang gen hiam cih leh, pilna zong masa ding, tua khit teh hauhna zong ding, a tawpna ah Pasian gam le dikna zong pan ding ci uh hi. Ahi zongin Christian upna in, Pasian’ gam le dikna zong masa ding ci hi. Buddhist thuhilhna in masak ding nunun ahih manin, a vek pi-in kitan thei thuhilhna hi zawa, Christian upna in leitung mite nunun nate le pampaih thusim loh tatkhiatna Singlamteh thu masak ahih manin, a vek pi-in a kingah beh thei thuhilhna hi zaw ahih manin tua upna tawh ih kipat ding thupi masa hi.

Upna nei ih cih ciangin ih muh theih nai loh ih lamette ngah takpi ding, ci-in muan’na lungsim neihna ahi hi. Tanglai mite in upna a na neih manun Pasian in a na pakta hi. Pasian’kampauna tawh leitung le vantung piang a, tu-a ih muh theih nate a om nailopi panin hong piang hi, ci-in ih upna bek mah tawh a thei ih hi hi (Hebrews 11: 1-3). Hi Lai Siangtho mun ih et tak ciangin, pilna tawh a thei ih hi hi, na ci lo-in, upna bek mah tawh a thei ih hi hi, na ci zaw hi.

Ni dangin upna pen sepna gamtatna thalawhna tawh kinial hi. Tuhun leuleu ciangin upna pen pilna (academic line) tawh kinialin pilna bekbek kithupi sak hi. Pilna thupitsakna tawh upna a kulna thu kinuainet ta hi. Jesuh Khrih sungah upna tawh ih pianthak phot a kulna va gen lecin pil a kisa mi tampi takin haivai, khitnauhciah vai hong ci ta ding uh hi. Kum zalom 21 sungah pilna pen a kisang et pen laitak ahi hi. Pilna tawh upna kisimmawh ta hi. A taktak in ci rehang, upna a om phot ciangin sepna gamtatna le pilna a om thei a kingah thei pan hi zaw hi. Upna pen ong sem sak ong gamta sak ong pil sak ahihna kitel thei lo hi. Tua pen mihingte’ haina ahi hi. Pasian in upna a neite mipil in na ciamteh zaw hi. Pilna tawh upna kingah thei lo a, upna tawh pilna kingah hi zaw hi.

Vaphual ki-itna, gahing ki-itna sangin a thupizaw khat om a, tua pen upna ahi hi. Ganhingte a ki-it mahmah theih tei uh hangin upna nei thei lo uh hi. Ganhingte sangin mihingte ih pilzawkna tua thu ahi hi. Tua leh leitung ah pilna sangin a thupizaw bang om a hiam? Pilna sangin a thupizaw Upna thu om hi. 1 Corinthians 1: 18, 19na ah, Banghang hiam cih leh sihna a thuak mite-a’ dingin singlamteh tungah Khrih a sihna thu pen a haihuai thu ahi hi. Ahi zongin hotkhiatna a ngah eite-a’ dingin Pasian’ vangliatna ahi hi. Banghang hiam cih leh Lai Siangtho sungah “Mipilte’ pilna ka susia dinga, miteite’ teina ka heikhiatsak ding hi,” ci-in kigelh hi. Ahi zongin kote in singlamteh tungah a kikhai Khrih thu ka hilh uh a, tua thu pen Jew mite-a’ dingin a hehhuai thu hi a, Gentail mite-a’ dingin a haihuai thu ahi hi (1 Cor. 1: 23). Nang e leh, Jesuh Khrih taangmi dingin ong sihna hehhuai sa na hia? Haihuai sa? Hehhuai na sak leh Pharisees te na hi a, haihuai na sak leh, pilna pi in Pasian’ thu umlo a cihte na hi ding hi. Kei’n bel uphuai sa ingh. Ganhing ki-itna in a tel zawh loh, mihing pilna in a thalawh zawh loh, Jesuh Khrih’ ong tatkhiatna thu upna pen leitung vannuai ah mawhnei nang le kei aa dingin a thupi penpen Upna ahi hi. Cope tonu Elezabeth in a upna tawh a itna ong laka, Cope topa Herbert Cope in a upna hi bangin Zomi te’ leitang tungah a lutang ong phumna tawh ong lak hi. Cope topa aa dingin upna tawh a nasep pen mihingte aa dingin a haihuai a bat hangin Pasian’ mai ah a pilhuai hi a, ei Zomi te’ aa dingin a hamphat huai hong suak ta ve leh mate?

Upna sangin a madawk zaw khat om a, tua pen letsong (gift) ahi hi. Upna mahmah zong Pasian’ letsong ahi hi (Ephesians 2: 8). Faith itself is the gift of God. Letsong sangin a madawk zaw khat om a, tua pen hehpihna ahi hi (Ephesians 2: 5; Titus 3: 7; James 4: 6). Hehpihna sangin a madawk zaw khat om a, tua pen sapna ngahna ahi hi. Tua ahih manin ama sap mite a sehsa hi a, a sap mite amah tawh kipawlin bawl a, amah tawh a kipawlin a bawl mite ama minthan’na zong a hawm hi (Romans 8: 30). Sapna sangin a madawk zaw khat om a, tua pen sehna hi-in, sehna ii madawk pen teelkhiatna ahi hi. Ama mai-ah eite pen paubaan’na a neilo, mi siangthote ahi ding le Khrih hangin ama mite ahi dingin leitung a pian’ma pek nangawnin Pasian in ahong teelsa ih hi hi (Ephesians 1: 4).

Hi thu khempeuh pilna tawh kithei zo, kitel zo, kithalawh zo lo-in, upna tawh ngahin ih theithei bek hi. Lai Siangtho sungah pilna cih kammal sangin upna cih kammal tam mu zaw ding hi teh. Banghang hiam cih leh upna pen pilna hi a, pilna pen upna hi lo hi. Pasian pen itna hi a, itna pen Pasian hi lo hi (Habakkuk 2: 4; Mark 11: 22; Sawltak 15: 9; Romans 1: 17; 5: 1; 9: 30; 10: 17; 2 Cor. 5: 7; Gal. 3: 24; Hebrews 10: 38; 11: 23). Thumaan mi, ahih kei leh diktang mi upna tawh nungta…Pasian’ ta ahite peuhmah in leitung nate zo uh a, ih upna tawh leitung nate tungah a gualzo ih hi. Kuate in leitung nate zo ding ahi hiam ih cih leh, Jesuh pen Pasian’ Tapa hi, ci-in a umte bek in zo ding uh hi. Tua hi a, upna in zawhna hi. Faith is our victory! (1 John 5: 4-5).

Evan. Suang Dal
Kalaymyo