Piakkhiatna tawh lungkhamna do in ~ Tdkhen

Piakkhiatna tawh lungkhamna do in ~ Tdkhen

Khatvei a hau mahmah nungak khat in a nuntakna cimtakin, lametbei ahih manin, Lungsim siavuan, Psychiatrist minthang khat kiang va zuan hi. Nungaknu in a haksatna teng gengenin, siapipa in a ngaingai hi. A lungkim’zah a genkhit ciangin Psychiatrist in a zum innphiatnu, Mary a sam hi. Mihau nungaknu’ kiangah, “Nangmah bangin a lungkham, Mary in bangci bangin lungnopna mu thei cih hong hilh ding hi. Hoih takin ngai lecin kong deihsak hi” a ci hi. Tua ciangin Mary in hibangin thu a gen hi.

“Ka pasal in nattun natna tawh hong sihsanin, ka pasal sihkhit kha 3 ciangin ka tapa neihsun uh mawtaw in hong gawi’lup sak leuleu hi. Ka lungkhamna leh ka lametbei’dan pen a gen’in zong ka gen thei vet nawn kei hi. An leh tui ne zolo-in, zan-in zong ka ihmu thei kei hi. Lametbei khin ka hihmanin nuntak ngap nawn lo-in, sihtheihdan ding bek ka lungngai ta hi.

Nitak khat ka nasepna zum pan ka ciahleh zawhngeuno khat in hong zui lengleng hi. Khua vot mahmah ahih manin hehpihhuai sa-in, ka innsungah lutpihin bawngnawi ka pia hi. A sawt lo-in ka bawngnawi piak a gai ziau hi. Amah zong lungdam mahmah hileh kilawmin, kidok pen’pen’in, ham ngeu’ngeu’ a, ka khe hong liak hi. Ka khe hong liah ciangin ze/za sa ka hihmanin ka nuikhia hi.

Tua banga ka nuih laitakin ngaihsutna thak khat hong suak hi. “Nuih cih genloh, bang hun-a maitai ngeilo khat pen, zawhngeuno khat tungah ka piakkhiatna in hong nuisak ahihleh, midangte panpih leng lungnopna nei zaw lai ding hitanga” cih khat hong suak leklak hi.

A zingsang ciangin moh ka bawl a, ka veengte khat a damlo, lupna tunga sawtpi a lum khat ka va pia hi. Tua-a kipanin nisimin mikhat peuhmah tungah thupha khat peuhmah bawl’teitei ding ka sawm hi. Midangte’ tungah thupha ka bawlna panin tu-ma lama ka neihzawh ngeiloh lungkimna leh lungnopna ka ngah hi. Ka lung nuamin, ka ankam lim a, ka ihmut zong a lim hi. Midangte’ aadinga ka kipiakna panin lungnopna ka ngah hi” ci-in nui hiuhiau-in a gen hi. Mary in lungnopna a ngahna thu a genkhit ciangin, tua mihau nungaknu ki-ip zolo-in a kapkhia hi.

A sawt lo-in hong kinul nainai a, na lianpi khat a mu tawh kibangin, thakhatin hong dingto-in, Mary nohsetin a kawicip hi. Tua laitaka a melpuak pen gualzawhna mel mahmah hi, ci-in Psychiatristpa in a gen hi. (Khristian Thalai Pawl, Vol II. No.6. MIZORAM). Tdkhen