Philippines kumpi leh Maoist te makaih Rebels te’n Ceasefire neihding thukimna nei

Philippines kumpi leh Maoist te makaih Rebels te’n Ceasefire neihding thukimna nei

Aug. 27, 2016: Philippines kumpi leh Maoist-te makaih kumpi lehdo (rebels) ten ciangtan hun om lo dingin kikaptuah khawlna ding (indefinite ceasefires) zanhalin Oslo khuapi ah thukimna nei thei uh hi. Maoist-te makaih rebelste kum 50 val kiphinna hangin mi 40,000 valin na sih lawh khin zo uh hi.

Philippines kumpi hih Maoist-te makaih tawh kum khat sungin kilemna thu genna nei dinguh a, tua khit ciangin kilemna taktak hong piang theihna dingin lametna lianpi nei hi. Maoist ten kilaih gawpna – “revolutionary change” kici deihin kiphinna nei uh a, zanhal in Philippines kumpi tawh ceasefire thukimna a neihna uh-ah hunciam nei lo dingin Oslo (Norway) ah thukimna nei uh hi. Philippines kumpi leh Maoist ten kum 30 val bang kilemna ding na kikum den napi un tu dong kilemna piang zo nai lo hi.

Norway Foreign Minister Boerge Brende in hih ceasefire thukimna neih theihna dingin na zindo hi. Zan diakin mahin zong Latin America sunga buaina sawt pen-a kiciamteh Colombia kumpi leh Marxist FARC rebels ten zong a buaina uh kilemna neih dingin thukimna na nei uh a, Oct. 2 ciangin kilemna taktak suai kaihna neih sawm uh hi.

Norway Foreign Minister Boerge Brende in hih ceasefire thukimna kineih theih pen ciamteh tham mahmah a, Norway in Colombia leh Philippines gamte kilemna a om theihna dingin nakpi takin kihanciam hi ci-in gen hi.
Source — Reuters

Thang Khan Lian