Pentecost leh Babel Tausang Ki Keelki (4) ~ Rev. Fr. Damian Dal

Pentecost leh Babel Tausang Ki Keelki (4) ~ Rev. Fr. Damian Dal

Babel tausang akisiatna dingin, Pasian in tua Babel tausang alamte ii pau, kammal leh awsuah te khat le khat kitelkhial sakin, khat le khat kitukalhsak hi. Tua ni pan kipan in, amau te pau kitelnawnlo, kammal kitel nawnlo, thukhat in luangthei nawnlo, awkhat pau in lawngkhat in gingkhawmthei nawn lo uh ahihman in, nasepna te ah zong sepkhat in semkhawmthei nawnlo, ngimna khat neikhawmthei nawnlo, tupna khat neikhawmthei nawnlo uhhi. Amau te ngaihsutna kipumkhatthei nawnlo, thukhat genkhawmthei nawnlo, la khat sutkhawmthei nawnlo ban ah, munkhat ah omkhawmthei nawnlo uhhi.

Laisiangtho sungah amau te Leitung munkhempeuh ah kithehthang hi, ci in nakigelh hi (Piancil 11:8). Leitung min le vang deihluatna, leitung lungsim leh leitung ngeina te tungah kibualluatna in awkhat pau in, lawngkhat a inga, nakkhat luangkhawmin, annkuangkhat a uumkhawm innkuankhat nangawn hong thehthang hi. Hihthu hangin, kithehthangna, kikhenkhapna, kitukalhna te in, Pasian deihloh nuntakzia te ahihna thu Babel tausang lamte tungtawn in Pasian in athusiangtho ahi, Laisiangtho sungah honghilh ahihi.

Tua hi leh, Pentecost in Babel tawh bangci kikeelki hiam cihthu i sutkhawmlai dinghi. Babel ah paukitukalhna piang hi. Pentecost ni in, Khasiangtho vangliatna hangin, paukitel in, pau kibatlohna, kammal kibatlohna, awsuah kibatlohna te hangin apiang ahi, mihing te nuntakna ah apiangden ahi, khat le khat kitukalhna, kilehdona, kikhenkhapna, kithehthangna te bei sak in, “pau leh kammal” kitelna piangsak hi.

Pentecost ni in, pau kibanglo minam tuamtuam te, akithehthang minam tuamtuam te in nungzuipi te gen lungdamna thu pen amau pauciat, amau kammal ciatin za in, tel uhhi (Sawltak 2:7–12). Pasian Khasiangtho in mite gawmtuah in, mite khat le khat kitelsak a, mite pumkhat suaksak hi. Khasiangtho in kilamdanna, kibatlohna te leh khat le khat hongki keelkisak thute tungah ama vangliatna tawh zem in, tuam a, Jesu Topa sungah pumkhat, awkhat, nakkhat hongsuah ahihi. Khasiangtho in kikhen khapna piangsaklo in, kimelmakna piangsaklo a, kithehthangna piangsaklo hi.

1. Khasiangtho Awging: Amasa penpen in, Pentecost pawi ni in Khasiangtho in awging leh meikuang leiilim tawh hongkilang hi (Sawltak 2:2–4). Leii in paukhiatna awging ahihi. Tua ahih manin, Pentecost pawini in Khasiangtho in, leitunga dingin “awging” ahihi. Tua Khasiangtho awging pen mite lei panin paikhia, gingkhia, kigenkhia, kisutkhia ding ahihi. Hihthu hangin, meikuang leiilim zangin, thu ummi te tungah hihthu nakilangsak hi. Tua ni in, tua Khasiangtho angah te paukhiat kammal te pen mite in amau pauciat in za uhhi ci in Laisiangtho in honggen hi.

Khasiangtho awging hi a, akigenkhia kammal leh akigen khia thu in Jesu Topa gupkhiatna thu ahihi. Hihthu hangin, Sawltak sungah, Khasiangtho tawh kidim in, Peter hong dingin, Topa Jesu gimthuakna, sihna, athawhkikna leh amamin hangin mitampi te in gupna angah nading leh, tua gupna angah theih nading un amawhna pan un akisikna ding thu hangtak in nahilhin, nagen hi (Sawltak 2: 14–41).

Peter in thuhilhna pen azami khempeuh te in amau pauciat in za uh a, amau kammal ciatin telkim uhhi. Hihthu hangin, Khasiangto ngah mite thugenna in, mite khenkhia lo dinga, mite gawmtuahin, amau te Topa sungah pumkhat sakhat asuahding ahihi.

Babel hun lai a, akithehthang mite, leitung min le vang, nam le gui, pau le ham, zia le tong kibatlohna, kitukalh nate hanga kithehthangna, kideidan na, kikhenkhapna khempeuh te tungah, Pentecost ni a hongkumsuk Khasiangtho in hong gawmtuah kikin, Leitung min le vang ding hilo in, gupkhiatna hongpia anungta Jesu Topa min le vangdingin pumkhat, awkhat tawh Babel lamlo in, Christian nuntakna alamdingin hong mapi kik ahihi.

(azom omlai)
Rev. Fr Damian Dal