Pastor Joseph Prince leitung mihaute’ lakah kihel

Pastor Joseph Prince leitung mihaute’ lakah kihel

Singapore ah pawlpi mi tampen anei New Creation Church founder and senior pastor Joseph Prince (Kum-50) pen leitungah Pastor sumhau pen kiteelna ah a sawmna ngah zo ding hi ciin Luxury lifestyle ten website sungah pulaak khia uh hi. Tua bek hi loin, US bulphuh aa kibawl RichestLifestyle.com, te in Pastor Joseph Prince in sum $ 6.3 million a neih banah kum khat sunga asum lut pen $700,000 pha den ahihman in, mihau number sawmna ah koihto uh hi.

CelebrityNetWorth.com in a genna leuleu ah Pastor Joseph Prince pen 2009 kum a kipan a pawlpi sung sumlut kiciapteh sak lo lai hi ci-in gen uh hi. A pawlpi New Creation Church pen Singapore gamah member tam pen ahih banah abeisa kum nih sungin mimal tul 30,000 te tung pa’n sawm-a-khat a ngah zah pen $75.5 million pha hi ci-in Commissioner of Charities in gen khia hi cih thu Reuters thuthak kaikhawm pawl in pulaak hi.

Abeisa 2010 August in New Creation Church pawlpi in nikhat sung bekbek in Fundraising a bawl uh leh $21.1 million ngah uh hi. Hih sum kingah teng khempeuh pen Siamna tuamtuam lahna mun The Star Performing Arts Centre kici lamna dingin koih uh hi. Hih Centre pen dawl 8 pha a, alamna ding sum kisam zah vekpi $500 million kisam hi.

Hih center Auditorium sungah tutna 5,000 om in, a pualam limlahna munah zong tutna 300 kikoih lai hi. Hih centre pen New Creation Church pawlpi i sumbawlna hiang khat mah hi-in, The Rock Production khut sungah om hi. Tua center tung khum ah The Star Vista akici vanzuakna innpi (Mall) khat om lailai a, dawlthum pha hi. The Star Vista pen Capital Land te kep leh neihsa hi in Buona Vista Station gei a om hi.

Nung kum 2013 in USA a zinna Los Angeles khuapi sunga om Long Beach Arena ah thungenna nei hi. A thugen angai dinga pai mi tawmsan lo banah Texas sunga biakinn lian pen Lakewood Church ah thu a gen leuleu ciangin, biakinn sung dimlet liangin thungai mipi kikhawm uh hi. A laibu gelh “The Power of Right Believing” zong New York Times te’ ciaptehna ah tam akikhawng pen nihna in ciamteh uh hi.

RichestLifestyle.com in CelebritynetWorth.com leh Forbes’s te tung pan a thungah dan un Joseph Prince pen Nigerian Pastor a hau pen a kiciamteh 5 te lakah kihelzo ci uh hi. Amah leh US pastor 4 te’n a thumna leh a gukna ngah uh a, a dang munte Nigerian pastor 5 in ngah uh hi. Nigeria pastor te hauhna pen leitung ah minthang zo uh a, tua teng lakah ahau pen pastor pa in $190 Million nei ci in kiciamteh hi. Francis Lamthang (Zomi Quavadis)