Pasian lunggulhna ~ Dr. Ngul Khan Pau

Pasian lunggulhna ~ Dr. Ngul Khan Pau

(Late 42:1-11) Topa Pasian in i omna tekah hong kemin tuni-in cidam takin i kimuh theih manin ka lungdam hi. Kong pai nop uh kum li bang pha khinin vai tuamtuam hangin kong pai thei kei uh a, tutungin ka zi Lucy Engjadim tawh kong pai thei uh a, kong paikhop masakna uh ahih hangin inn tung bangin ka kingaihsun uh a, nuam kasa mahmah uh hi.

Kei pen Mizoram piangin Manipur gamah ka khangkhia hi. Tulaitakin India nisuahna saklam Tuiphum Tapidawte kipawlna phualpi Council of Baptist Churches in North East India ah March 1, 1999 ni a kipanin General Secretary ka sem a, (1996-98 sung Associate G.S. sem) minam dangte laka na kisem ahih manin pau nam 53 bang a zang minamte hi. Thungetna tawh nong phawk ding uh ka deihna hi. Thungetna pen kisam mahmah hi’ing cih zong nong theihpih ding uh lunggulh ing.

Tunitak in Late 42 sung kikumin tha lakhawm leng ut ing. Hih Late Lai Siangtho pen Lai Siangtho siamte’n a gen uh ciangin Late 1-41 dong lomkhat hi a, tua bup i deihna pen Late khatna sungah kicing hi, ci uh hi. Tawm ensuk lehang, Minuamsa i cihin cih tawh kipan a, tua pahphot pen “mi nuamsa” cih ziau bek hi loin ‘Mi nuamsa mahmah’ cih nopna hi. Migilote kiangah a pai lo mi, mi mawhte lampi ah a ding lo mi, mi a thusim lote phual ah a tu lo mi, ci-in nam thum na pha hi. Gitlohna sungah thakhat in kitupah loin kipai in, dinsa in ki-en a, sep i sawm leh kitusuk hi. Hih in kiamsukna lim ahi hi.

Abanah sun le zan Ama thu a ngaihsun mi ahi hi. Sanggam, zanin na ihmut theih loh ciang bang teng na ngaihsun hiam? Kei ka ihmut theih loh ciangin Pasian in Ama thu ka lungngaih theih nadingin hun hong pia , cih ka phawk hi. Mipilte’n “Na ihmut theih loh ciangin tuu honte simsim kenla tuucingpa tawh kiho in, “ cih paunak nei uh a, hoih kasa mahmah hi. Na ihmut theih loh ciangin Topa’n gen nop hong nei hi thei a, Topa’ thu nang tungah hong tung ding zong hi thei ahih manin daitakin ngak in. Late 42 sunga thute tungtawnin a nuaia bangin thu thum kikum leng cih ka ngaihsun hi.

PASIAN LUNGGULH-DANGTAKNA (PANTING) Late 42 sungah David in “ka kha, ka ann, ka thungetna, ka nuntakna, ka guh le tang, ka suangpi” cih bangin “KA” vive 10 vei na zang hi. David in Pasian pen aituam neihna (personal pronounce) hong lak hi. David bangin Pasian pen ka aituam Pasian hi, na ci thei diam? Pasian pen PA dingin picing na sa hiam? Zanni a lamdang i sak sangin tuni’n lamdangzaw lai hi. Pasian in a lamdanna hong sintosak hi. No zong biakinn thak vai dingah Pasian hoihna le a lamdanzia na sin laitak uh hi.

Tukum May kha sungin London khuaipi pan kigamla lo Swanick khua ah leitungbup Tuiphum makaipite’ khawmpi ah Asia gam bup ai dingin kei zong hong sam uh a, ka va kah hi. Kong ciah ciangin Africa gama ka lawmten hong samin va phak dingin ka geel hi. Africa pai peuh mah kidalna zatui kisut kul a, tua zatui kisut man pen pound 40 ($85) bei ding ci uh hi. Tua pound 40 nei lo ka hih manin “Topa, pai dingin nong deih leh pound 40 hong pia in, nong piak kei leh ka pai kei ding hi,” ci-in Pasian kiangah thu ka ngen hi. Nipi ni biakinn ah hunzang, bangmah om nai lo, Monday ni zingsang nai 10 a zatui kisut ding pen, Monday zingsang niangtui dawn ciang dong bangmah om nai lo hi.

“Topa sum nong piak kei leh pai lo ding ka hi maw!”ci-in sikkhau ka nawhsat mahmah hi. Niangtui dawn khit ciangin ka zinnu in Pawlpi sunga meigong nupi khat in siapa hih lai-ip na pia inla, ka min zong na gen ken, hong ci hi, ci-in lai-ip hong pia a, ka et leh pound 40 linlian na om hi. Topa lamdang hi, hoih lua hi. London khuapi sung mihau hizah lakah meigong khat Pasian in a zat sese! Elijah adingin Pasian in meigong nupi a teel khawng zong ka phawkto hi. Ahoih Pasian, a lamdang Pasian nei napi hangin i Pasian luvaihna khop dingin thungen nai lo hi hang. I Pasian lunggulh zo lo dangtak zo lo hi hang.

Tukum American Baptist Mission Conference, ah kei Nipi ni zing thugen nading hunpi hong pia uh a, ka sang ngampah kei hi. Amau ko American Khristiante nuntakzia le dinmun thei pen ding na hih ciangin ka thanemna uh hong gen in hong ci uh hi. Hong cih teitei uh ciangin, ken zong “Americate aw pil mah uteh, hau mah uteh, leitungbup palik kisa na hi uh hiam, tua gamte na tua cih kei uh hong kap ding hong do ding na cih kawikawi uh,” ka ci hi. “Mihing thuneihna (human right) limgen mahmah napi ucin bang hangin nau suksiat gen ngei lo na hi uh hiam? Sum le pai zonna dingin annek tuamtuam (breakfast, lunch, dinner) na limbawl mahmah uh a, pawibawlna na hat mahmah uh hi. Bang hangin anntang thunget sawm lo na hi uh hiam?” ka ci gawp hi.

Sakhi in luitui luang a lunggulh bangin i Pasian i lunggulh ding, i Pasian i dangtak ding kisam hi. Palestinete’n ui tawh sabengin uite’n sakhi a delh ciangin sakhi adingin lui khat om henla tua kantan leng ui in ka gimnam za nawn loin tua pan ka suakta thei ding hi ci-in luitui lunggulh mahmah uh hi. Jacoh in vantungmi tawh a kibuan lai-in thupha nong piak kei leh hong khah kei ning a cih bangin Topa, nang kong muh kei leh si ning cih zah khopin Pasian i lunggulh ding kisam hi.

Americate’n bang dingin Irag gam kap uh hiam? Ahang tampi omkha ding hi. Euphrates le Tigris guntuite a deihna uh hi, a ci zong om hi. Hih gunpi pan tuite a tua gamte-ah zuak leh summuhna hauna hi ding hi. Leitung nisuahna laizang (Middle East) gamten namgim, datsi, diesel hau mahmah uh a, ahi zongin tui pen haksa mahmah hi. Asawt loin Middle East gamte’n a tuidawn ding uh tawh hong buai ding uh hi. Datsi, diesel bang zahin hau hiam cih leh motor tawh zum a kah uh ciangin a set sumit loin air-condition hong suak uh hi. E’n pen lamkabom ah meisan ngak ciangin zong kisumit lai ci leng maw! Bangbang dinmun ah i om zongin Topa bek mah lunggulh ni.

TOPA MAIAH KISUNKHIATNA (POURING) Hih Late sungah David in a heh a dahnate zong gelhin a galte a phuisamna a hamsiatna khawng zong na om hi. Khami mahmah dinga i ngaihsut David in bang hangin hi bangin gelh ahi tam? David in Topa tungah a lungdamnate banah a hehna a dahna le a galte a muhdahna khempeuh Topa tungah ko hi. David pen Topa’n na theisiam mahmah hi. Ei pawl in Topa tungah ko loin i muhdahte tungah va genphei i hih ciangin a buaizel i hi uh hi.

David bangin Topa tungah a kosiam dingin Topan thupha hong pia ta hen. Pasian in ka lungtuak David a cih ciangin David pen a hoih tawntung hi loin ahihna bangbangin Topa maiah a kisunkhiat man ahi hi. Tua ahih manin Pasian in David nuntakna ah puah ding a kisap hunin puahin, tai ding thuhilh ding a kisap ciangin tai-in thuhilh a, thanem ciangin a thakhauhsak hi.

David in Pasian tungah sunkhiat nam thum nei hi. Khatna, Akhitui Sun le zan ka khitui annin ka nei hi (42:3). Kam tawh a kigen theih nawn loh ciangin khitui luang hi. I theih ngei loh khat a khitui a luan leh nasa hi, khasia hi, cih kithei veve hi. Mipil khat in “Khitui in pau nei a, a khiatna sin kul lo hi” ci hi. David in sun le zanin Topa maiah a lungsim khempeuh sungkhia hi. Nihna, Ahaksatnate Ka haksatna tuihual bang hi (42:7). Mite’n haksatna a tuak ciang la phuakin e’n tua late sa-in nuam i sa mahmah uh hi. La tawh i haksate gen ngei lo i hih ciangin e’n haksatna tuak lo tawh i kibang hi.

Kei bang tan 5 ka sin kumin ka nu’n hong nusia, nute kingai mahmah hi. Sawltak Paul leh Silaste’n zankim laitak a lasak uh a nuam diam? Haksatna tuihual i cih in kiam hun le khan hun nei a, hun khat ciangin paikhia-in nopna ni hong taang kik hi. Thumna, Lametna nei Pasian ah lametna nei in (42:11). David pen amah le amah kihansuahin tha kipia hi. Bangbang ahi zongin ka Pasian ka phat veve ding hi, ci-in a buaina a mangbatna khempeuh phatna tawh na khup hi.

PASIAN PHATNA LE PAHTAWINA (PRAISING) Piangthak putek khat in “Praise the Lord” ci ngitngetin a veng a pamte’n ning, cimtak mahmah uh hi. Ni khat sing tungah singgah lo dingin a kah leh kia hi. A vengte’n tu’n pawh Praise the Lord nawn kenteh maw, ci-in va en uh hi. Na thallupin nak thei lo ahih manin phongto-in a sin kheuhkheuh uh leh hong nak thei a, Praise the Lord mah hong ci veve hi. A vengte’n “Singtung pan kia a Praise the Lord na cih teitei” a cih uh leh ka lutang a kitap loh man, ka guh ka tang a kitan loh man ci-in lungdamna a gen ding hau mahmah hi. Ute naute lungdamkoh ding sawm leng gen ding tam mahmah a, phun nading zong leng dawimangpa’n hong huh pahin i gen ding tam mahmah hi.

Pasian bek i muan ding dawimangpa patau ahih manin Pasian tungah hong khasiasak thei hi. E’n a nungta Pasian bia ci-in hi bang teng tuak, a nungta Pasian bia lote’n lah nuamsa mahmah cih khawng tawh hong phunsak thei hi. Ute naute, bangbang i tuak zongin Pasian phatna pahtawina tawh thuak ding hi hang. Tua pen Jesu dan (Jesus Style) hi a, tua in gualzawhna ahi hi. Topa Jesu gualzawhna zong, “Na en vo, vantung mite hong sam ning ei,” cih lam hi lo hi. Guallehna tawh gualzawhna ahi hi. Hong koko hong bawlsiate thukkik lo a thu i ngetsakna in Jesu dan hi a, gualzawhna ahi hi.

Mite’n hong gensiat ciangin heh kei in. Ngaihsutna nam thum om thei hi. Khatna, A khuamuhna a toiluat man hi. Thai, Japan, Singapore le Americante hauhna le pilna khawng thei leh nangma thu zenzen gen loin a dang a gen nop tam mahmah ding hi. Nihna, Hong gensiatna ahi mah ahih leh, “Hi mah ei Topa khial ing ei, hong kipuahpha ning ei,” ci-in thungenin ki-ap pah in. Thumna, Hong gensiatna ahi lopi ahih leh, “Ama gen bang hi lo ka hih manin ci-in Topa’ tungah lungdam ko in.”

Pasian nasem minthang D.L. Moody a sih kuanin mi va pai-in, “Moody aw, na hun nai mahmah ta ahih manin gennop na nei hiam?” a cih uh leh “Tuni pen khamlukhu ka khuk ni hi, ka lunggulh tawntung Pasian kiang ka tun ni ding hi. Pasian in hong sam hi, ka pai ta ding hi,” a cih zawh sawt loin si hi. Pasian phatna tawh gualzo hi. Tua ahih manin i nisim nuntakna ah i Pasian mah lunggulhin dangtak ni. I dah i kahnate Topa maiah sungkhia-in, Topa phat in pahtawi ni. Amah a phattak Pasian ahi hi. Amen. Rev. Dr. Ngul Khan Pau (Full Gospel Assembly, Yangon “Zohun” ah November 16, 2003 hunzatna a tomkim a kila hi)