Parcel tawh hong khak un ~ Hau Za Cin

Parcel tawh hong khak un ~ Hau Za Cin

Leitung pen khangto mahmah ta, laikhak bek hilo van, sum, puan, mawtaw, meileng pan zi ding pasal ding nangawn parcel tawh a kikhak ziahziah hita hi. Canada ah pem India mite bang a zi ding uh Delhi pan parcel tawh a nu leh pate un khak ziahziah a, khatveivei tam khaklua thei uh hihtuak hi.

Zi nih leh thum bang a nei man om hihtuak hi. A ngahten lah phamawh salo, a paite’n lah phamawh salo hi ding… ahi zongin a sawtna ciang kumpi in mi khat numei khat cih ciangtan sak uh a, a val kikhak thei nawnlo hih tuak hi. A val a kikhak pawlkhat bel zi ding, pasal ding hikhollo in gamdang tun theihna peuh ci-a ‘trick’ a kikhak zong hih tuak hi. Kibang kawikawi.

Postal service hong hoih mahmah ciangin nidanga laikhak bek a kikhak pen van nangawn kikhak in, Sakok in pua nawnlo in, Bawngleng in pua nawnlo in, Mawtaw leh Vanleng nangawn in hong puaksak ta hi. Laikhak i ngah ciang a nuam mahmah hi a, vankhak i ngah ciang nuamzaw lai hi. A van lian in i lungnuamsak pong hi.

Khoppi simna ah khuadang nungak maitai deuh khawng tawh photo kilak khopte khawng post office pan hong tun kiaukiau ciang nuam veve mawk hi. A tuamna laikhak nangawn kibalkek ngamlo a, lukhap nuai khawng, datmei sung khawngah Zawhngeu no nei bangin kisel kawikawi hi.

Tua zawh deuh ciangin internet a kici hong kithanga, leitung mong khat pan mong khat mitphiat kal sungin kiho ziauziau, thu leh la kikhak ziauziau in, photo nangawn i kipia theita hi. Kam mahmah tawh kiho in aw mahmah i kizak hun hong tunga, mel kimu in mun khat omkhawm bangin i kiho thei tanghialta hi.

Tu in tua sanga manlangzaw kizopna hong piang dinga, mel kimu, aw kiza, thu kikhak bek hinawnlo in, khut kilen bangin ci kisawh in kilawng bangin kinaih theita ding hi.

Tua hun ciang “Parcel Tawh Hong Khak Un” cih pen kitamzat nawnlo ding hi. Hau Za Cin, Phuitong Liim