Pakte in thu hong hilh ~ Sia Do Khup

Pakte in thu hong hilh ~ Sia Do Khup

Zingsang tho-in Topa tungah lungdam ka ko masa hi. Zing maiphiat khit ciang tei sitsetin ka pusuak a pakte ka en hi.

A KOIHNA MUN KHEL LO UH HI.

“Aw pakte aw, kong koihna mun ciatah lungkim takin na om ciat uh hi. Kei na pu uh Pasian hong koihna mun pan ka kikhin kha zel hi” ka ci hi.

KIBANG LO AHIH MANIN HOIH HIZAW

“Aw pakte aw, na kibat lohna teng uh na kilawmna uh hizaw a maw, kei’ up, kei’ sanzia, kei’ pomzia, kei’ makaihna a zui lo khempeuh gal bawl kha pahpah ing” ka ci hiat-hiat hi.

EI MUN CIATAH

“Aw pakte aw, hoih takin pak nahih manin na kung a neu zenzen hang etlawm lua hiteh, kei na pu un a kung lian deuhte ka eng kha zel hi” ka ci ngeungau hi.

BEL VOM, BEL KAANG, BEL SAN

“Aw pakte aw, bel vom, bel san, bel kang kong suanna mun ciatah lungkim takin na pak ciat uh hi. Kei na pu uh hong kisuanna bel ahi ka mel peuh ka hawmthawh kha zel a, ‘ngo lai deuh leng, ka ha hoih deuh leh’ peuh ka ci kha zanzan hi” ci-in Pasian deih pak bel ka hih lam ka kiphawk a, bel vom panin zong pak kaang ngo sitset a pak theih lam ka tel semsem hi.

NIN BULOM TENG TAWH HOIHZAW

“Aw pakte aw, na phung ciat ua kong koihsak nin bulom teng tawh khangtoin na pak uh pha semsem hi mawk a maw” ci-in simmawh bawlsiatna, gensiatna daisakna nin bulom teng pen kei na pu uh hong pak phasak lei hoih zaa ahih lam ka phawk semsem hi.

KHUA HUN KIKHEL TA LEH

“Aw pakte aw, khuapha-in khuanim taleh maitai takin nong muak den uh hi. Kei na pu un hamphatna ka ngah loh ni ciangin ka phun numnum kha zel a, hong bawl Pa Pasian lungdamsak ding, ka mangngilh kha zel hi” ka ci thei phingsan zenhoh hi.

KI-HAZA SE LOIN

“Aw pakte aw, hoih takin na pak ding bek na hanciam ciat uh a, na gei a omte pak peuh na susia nuam se kei uh hi. Kei na pu un kei sang a lawhcingzaw a om khak ding dahin mi’ pak teng ka heuh siang nuam kha zel hi” ci-in dip hum sain ka kun ngeungau thei ta a, hel khe zezeen ka kici thei ta hi.

MUN KILAIH THEI HI

“Aw pakte aw, na pak phatna uh zui-in na omna mun uh kong laih zel lam ka phawk hi” ci-in Itna pak a tawm luat leh Pasian in ei’ munah midang koih thei lua hi, cih ka phawk a, thong aw ei, lawlawm song, ta vial liang, khong di aw, khezen buang, hel khe zezeen ci-in ka laigelh ka khawl lian hi.

“…. Mihing hong kipiansakna a thu bulpi pen in: Pasian zahtakna le a thupiakte manna ahi hi.” THUHILHNA 12:13 TDB Deihsakna lianpi tawh; Evan. Langh Do Khup (Khuata mipa)