Pa Pasian bawng ankuang sungah ~ Mang Khup

Pa Pasian bawng ankuang sungah (God the Father in a Manger) ~ Mang Khup

Isaiah 9:6 ∞ Mate 1:21 “Bang hang hiam cih leh eite adingin naungek khat hong suak a, eite tungah tapa khat hong kipia hi; ama liangko tungah ukna om dinga, ama min pen “Lamdang, Thulakpa, Vanglian Pasian, Tawntung Pa, Nopsakna Kumpi kici ding hi” “Amah in tapa a nei ding hi. Tua tapa in ama mipawlte’ mawhnate sung pan a gumkhia ding ahih ciangin a min Jesu na phuak ding hi,” ci-in a hilh hi.”

Thupatna:

A lamdang mahmah, vang liatna khempeuh a nei, na khempeuh ahih thei, hun khat sungin mun khempeuh ah a om thei, ei mihingte tawh a ki teh theilo, a ut bangbang a, a piang thei, Pasian hong suah nading tawh kisai-in,tangtawng pek panin mi mawhte tankhia dingin hong suak ding hi, ci-in kamsangte’ tungtawn in na gen khol zo hi.(Mikah 5:2) Pasian leh mite kikal ah Pasian zia theihtheih nadingin Israel minam khat Pasianin na tel hi.

Abraham hun pan kipanin Pasian’ zia Israel te’n na tel mahmah uh a, kua hiam cih zong na thei uh hi. Israelte Canaan gam a lut ma in a khang tawntunga, a mang ngilh het loh ding leh naungek khat a pau theih cil in, a kammal lawh masak pen ding leh a sih ciangin a husan nunung pen ah a lawh pel mawh ding, talsuan leh khut buh a kipan, khuam tungah gelhin nisim a, a lawh den ding “Shema” zong Israelte leh eite aading a thupi pen ahi hi.

Tua Pasian pen a min taktak a theih loh uh hangin, a thupina leh a sep zia tungtawnin min tuamtuam tawh na vawh uh hi. A theih tangna bulpi khat ah Yahweh,/Jehovah ci-in na lo uh a, tua pen Amah leh Amah a om Pasian(The One Who is The Self-Existent One) a cihna ahi hi. Israel te’ tangthu leh Pasian tawh ki sai a theihna uh ah, tua Jehovah Pasian khat bek mah thei in um uh hi.

Hih hong suak ding naungek pianzia theihna telna thupi mahmah ahih manin Hosea tungah Pasian in,” Ka mite in kei hong theilo ahih manin ka susia ding hi. No siampite in kei nong theih nading uh nial na hih man un, ka siampi dingin kong deih nawn kei a, na tate uh zong siampi-in ka zang kei ding hi.”(Hosea 4:6) na ci hi. Tua ahih manin hih hong suak naungek ih theih ih up zia tawh ki zui-in Tawntung nuntak nading lampi kizom pai suak pah ding hi.

1. Thuciam Lui ah Pasian Khat bek(Jehovah) hong suak ding cih ki gen khol:

Israel mite Igypt gam pan Canaan gam zuan in a pai khiat zawh uh kum 39 acin kum pan kipan, Canaan gam a lut madeuh kum khat sungin Moses ii kam vaikhak leh a mangngilh het loh ding thu vaikhak nunung pente’lakah a thupi pen in,” ……Topa I Pasian in Topa khat bek ahi hi;….”(Thuhilh kikna 6:4) Tua Yahweh pen a min lawh tangna(Common Name) hi a, tualo a min dangdangte pen a mau mun leh hun ciat a, a sep zia tawh kisai a, a piak uh(generic name) ahi hi.

Gentehna in, Abraham tungah a tapa biak piak nading a nget laitakin a tapa taang dingin TOPA (Jehovah)in Tuutal khat na pia ahih manin Topa in hong sikpa(The Lord is our Provider) a cihna uh Jehovah Jireh na ci uh hi. Tua bangin a gal zawhna, a dam sakna a kipan a tuamtuam te ah a min tapna na pia uh a, up pa pen Jehovah ci a, a ciapteh uh khat bek mah ahi hi.

Abraham, Moses te a kipan Pasian’ sathau nilh kamsangte khempeuh in Pasian khat bek ahihna kawkin tua Pasian Yahweh pen mihing a hong pian nading thu leh a sisan tawh hong tat khiat nading thu na gen khol ciat uh hi.(Piancil 3:15;Siampi 17:11; Isaiah 9:6;53:1-12) Tapa Pasian a dang khat om a, tua hong sawl cih bang hilo in, Amahmah Yahweh Pasian mihing a hong piang ngiat ding cih na gen khol a, tua a mihing hihna pen Tapa a ci hizaw hi. Mihing ngaihsutna tawh pen mi hing khat nam nih suak thei ding cih hamsa mahmah hi, ahih hangin Amah Pasian ahih manin a ut peuh suak thei a, hong gup khiat ding mihing ih hih manin mihing a hong piang ahi hi.

2. Mawhneite Honkhia Ding Hong Suak leh Hong Sipa Khat bek:

Isaiah kamsangpa tungah Pasianin,” ….ama min pen..Tawntung Pa kici ding hi…”(Is.9:6) ci ahih manin hong suak ding naungek pen Tawntung Pa, mihing hong suak ding hi cih theihsa hipah hi. A min deihna zong “….Immanuel (Eite tawh Pasian hong om khawm cihna) zong ahi hi.(Is.7:14) A zenzen in Yahweh a kici Topa Pasian sungah To thum in ki khen thuah a, a vang liatna kikim in tua teng lakah khat om kei leh Pasian kim zolo a hih leh a thum in mihing a hong pian kul a, a sih ciangin zong, a thum mah a hong sih a kul ahi hi. Hong suak dinga, Amah leh Amah a ki gen khol hong suak naungek, khat bek ahi hi.

Thuciam lui hun sungin Pasian mi zat khempeuh leh thu umte in Pasian khat bek na um uh ahih manin Israel mite’ sung peuh mah ah tu dong Pasian phazah tawh kisai buaina om nailo hi. Pasian khat bek um lua ahih ziakin Jesu na ngawn na um zo nawnlo liang uh hi.(Johan 8:24, 27) Sisan in kilemna piang sak hi a ci Jehovah Pasian(Siampi 17:11) in mihingte tan dingin hong sih ciangin midang sawl lo in Amahmah Pasian hong sihna tawh a thuciamna taangtung sak hi.

“Bang hang hiam na cih uh leh, sih ciang luahna lai a kip leh, si ciamna lai-at mi a si ding hi. A sih khit ciangin si ciamna lai a kip ding hi…..a si ciamna lai-atpa a nuntak lai takin si ciamna lai in a kip kei hi.” (Hebew 9:16) Ama sisan tawh tan khia ding ci a, a kamciam pa pen Jehovah Pasian hi a, hong sih ciangin Jesu Khris hong si hi.(Sawl.20:28)

3. Pasian in Thuciam lui hun sungah Amin taktak na genlo:

Thuciam lui hun pan kipan in mihingte in Pasian min taktak na dong zel uh a, ahi zongin Pasian in a min taktak na gen nuam lo in, ni khat ni ciangin ka mite in ka min thei dinga, tua ni ciangin Topa Khat, Min Khat bek a om lam hong thei ding uh hi, na ci hi.(Zekhariah 14:9)

• Moses in Pasian’ min na donga “Keimah ka hi hi,” (Pai.3:14) ci in a min na genlo hi.
• Jacob in Pasian’ min donga, bang hangin ka min hong dong na hiam ci-in gen lo hi. (Pian.32:29)
• Samson ii pa Manoah in Pasian’ min na donga, hih in a lamdang hi ci-in thei napi-in bang hangin ka min hong dong na hiam ci-in a min gen lo hi.(Thukhente 13:18)

4. Yahweh or Jehovah in Pasian min taktak(Proper Name) hilo:

Jehovah kici Pasian lawhna kammal pen Thuciam lui (KJV)sungah 6519 vei na ki zanga, tua pen Adam zi Evua tung pan ki pulak masa pen hi.(Piancil 4:1) Hih kammal pen Pasian in ka min hi ci a, a piak tawm hi tuanlo in Hebrew kam pau mite in Pasian a zahtakna leh a thupi lakna kammal ciamtehna khat hi a, Tetragrammaton kici a aw suahna kammal(vowel) ki hello laimal 4, YHWH/JHVH tawh na ki ciamteh hi. Pasian min siangtho in ngaihsun ahih manin a aw suahzia khialh khak ding a lau man un, tua taangin Adonay(A Thahat Topa)ci-in sam zaw uh hi. Tua hun lai-in aw khumna cih bang om nailo ahih manin a awsuah bang dan hiam cih kuamah a kician a thei omlo hi.

Hebrew lai aw suahna tawh ki sai-in, B.C. 3 pan 2 kikal hun sung tengin kan khiat kipan uh a, A.D. 7 pan 9 kikal sung tengin Massoretic a kici Hebrew mi laisiam te in, aw suahna Vowel bulh ding kipan uh hi. Amau in Pasian a zahtakna tawh a thupi sim na uh hi bek a, tua min a lawh ciangin vangliatna cih zong bangmah kilang tuanlo a, Pasian’ min siangtho ci-in amau lung kimna ahi hi. Ahih hangin a lungsim sung uh ah tua Pasian tel in um mahmah ahih man un, a thu zui-in mang uh a, thupha ngah uh hi. Tua ahih manin Pasian min pen laimal gawm leh awsuahna tungah kinga lo in, lungsim leh a mi(Pasian) lawhna tungah kinga hi.

Evua in Pasian a zahtakna kam tawh Jehovah ci a, a lawh zawh kum 600 val bang a cin ciangin Moses in Pasian min na donga, “Keimah kahi hi” ci bek a,a min taktak na gen nailo hi.(Pai.3:14) Tua banah “Abraham, Isaak leh Jakobte tungah Vanglian Pasian-in ka kilanga, ahih hangin Topa(Jehovah)ahi, keima min tawh amaute tungah ka ki theisak kei hi.”(Pai.6:3) na ci hi.

A zenzen in Jehovah pen Pasian min taktak hi leh tua Pasian’ mizatte in A min na thei khin buang dinga, na dong sansan nawnlo ding hi. Isaiah 42:8 ah “Topa pen keima min hi” a cihna om a, tua zong a ki zoppih LST tang dangte(Context) ih et ciangin Amah longal Pasian dang omlo ahihna a gen nopna ahi hi.(Is.43:3,11,15;46:9;49:23) Tua ahih manin hih Thuciam lui hun sungah pen Abraham,Isaak leh Jakobte Pasian khat bek ahihna a theih a up ding leh a zuih ding a thupi pen ahi hi.

5. Jehovah Pasian in mihing hihna tawh Ama min taktak hong puaksuk:

“ Amah in tapa a nei ding hi. Tua tapa in ama mipawlte’ mawhnate sung pan gum khia ding ahih ciangin a min Jesu na phuak ding hi.”(Mate 1:21) cih thu Josef tungah vangtung mi gen kholh hong tangtung a, Jesu a khiatna pen Jehovah in Hot khiatna hi(Jehovah is Salvation) cihna ahi hi. Isaiah gen kholh bangin hong suak ding naungek min tapna ahi Tawntung Pa pen bawng an nekna kuang sungah hong suak takpi hi.

Tapa ahihna tawh Tawntung Pa hilo a, Tapa ahihna tawh Judah Kumpi hilo hi. A Pasian ahihna Kha tawh Tawntung Pa ahihna hong lak hi. Gumkhia cih kammal pen Hebrew pau in ah “shua” hi a, Jehovah tawh a gawm ciangin “Jeshua/Jashua” hong suak hi. Greek awkaih leh a lai tawh a lak ciangin “Iesous” hi a, minam tuamtuam te pauzia tek tawh a ki tei ciangin ei Zopau in “Jesu” ahi hi.

Johan 5:43 ah,” Kei in ka Pa’ min tawh kong pai hangin nong sang kei uh hi. Midang khat peuh amahmah min tawh hong pai leh, na sang ding uh hi.” cih Topa Jesu kammal ih ngaihsut kik ciangin tuhun Khristiante zong Judah te’ upna tawh a ki lamdang nailo tampi ki om kha ding hi. Judahte zong Jesu thupi a salo hilo a, Kei Pasian hing ci a, a mah leh amah a kigen pen Pasian khat bek om ahih teh ci a, Pasian ahih lam a umlo bek ahi hi. Abraham’ pian’ ma in kei ka om, a cih sawnsawn teh, Pasian hi-ing a cihna tel lua uh ahih manin suang tawh deng dinga, a zan delh pah uh ahi hi.(Johan 8:58,59)

6. Jesu ah Deihna teng Cing hi:

Thuciam Lui sungah Pasian nasep zia tawh ki zui-in a min lawhna tuamtuam( generic name or compound name) a om khempeuh huam kim dingin Jehovah in Gumpa hi cihna min Jesu ki phuak hong suak hi. Mawhna pan, Natna pan, gual lelhna pan, ei guak tuam omna pan cihte a kipan hak satna namkim pan hong gumkhia pa ahihna min khempeuh huamkim khin a, nidangin mihingte tawh a om khawm ngei nailo Pasian pen mihing hihna tawh hong om khawm Immanuel Pasian ahihna hong lak hi.

Pa, Tapa leh Kha pen Jesu sungah a cinna hong lak zaw a, LST buppi ah Tapa Pasian, Kha Siangtho Pasian cih bang na omlo in Pa Pasian cih bek na om ahih manin Jesu pen Pa Pasian ahihna tawh up ding Ama deihna hi. Tua ahih manin hih LST a um Khristian te aadingin mi banga hong pianga, a sisan tawh hong tan a, si-in, kivui a, a thokik Pasian bek, up huai leh belh huai ahi hi. Pasian tampi a om phial zongin mihing a hong kilang ngeilo Pasian pen Pasian taktak kici theilo ding hi.

Thuciam lui hun sungin Pasian in Ama omna ding a telna mun thupha pia in vang liatna koih a, a Kha Siangtho hong buak suk hun, Pentecost ni pan kipan in A min “Jesu” sungah a thu neihna leh vang liatna koih hi. Tua nipan kipan mahin Jesu min tawh gupna thu ki gen, tui kiphum, thu ki ngen,cina dam sak, dawi ki hawlkhia, thupha kipia, na lamdang kibawl hi. Jesu pen min hoih khat a hih mah bangin Jesu min nei a tam hangin Pasian in lungsim tawng a en Pasian ahih manin lungsim leh kammal ki gawmkhawm tungah thu khen hi.(Rom.10:10)

7. “Jesu” pen Pa’ min hong suak:

Jesu kici min pen a tapa hihna min bek hi nawnlo a, a Pa hihna, a Pasian hihna min ahih manin “Kei min suangin na nget peuhmah uh kong hih ding hi.” na ci hi.(Johan 14:14) Thu ih nget ciangin Amah longal, a Pa dang khat kiangah ngen dan a, na lungsim a om leh na nui hiuhiau dinga, hong naupang ngaihsut khathei ding hi. Nungzuipite hun lai in zong kum thum bang ki thuah in a vang liatna tampi mu khin phial mah ta leh na tel taktak zo khin lo ahih manin Filip in,” Topa aw, Pa hong lak lecin ka deihna uh a kicing ding hi,”na ci hi. Topa Jesu in,” …Kei hong mu mi in Pa a mu zo hi.” Note kiangah kong gen thu in keima thu hong hilh ka hi kei hi. Kei sunga teeng ka Pa in na hong sem ahi hi.”(Johan 14:8-10) na ci hi.

Hih thu tawh kizomin gen ding tampi om a, a tomkim thei penin hial bawl hi leng: Mit tawh ki mu theilo Kha ahi, Jehovah Pasian pen si leh sa in hong kilanga (1 Timoti 3:16), a min Jesu ahi hi. Gupna ngah nadingin tua mi lo buang, leitung van nuai mite lakah hong kipia mindang khat beek a om kei hi.(Sawl.4:12) Tua ahih manin hih Lai Siangtho pen a khiallo Pasian humop hi ci a, a umte’ aadingin ih Pasian leh Tawntung Pa in mawh nei mite hong it manin “ Pasian lim leh meel tawh dimin a om napi-in, Pasian tawh kibatnate ka khah kei ding hi ci loin, Ama minthan’na paai-in, sila lim la-in, Mi tawh kibatna ah a suak hi.”(Filip 2:6,7)

Jesu in ei mihingte bang hilo in Pasian hihna(Divine Nature) leh Mihing hihna(Human Nature) a neihna ah Pianzia nam nih(Dual Nature) a nei hi a, hih thu a tel leh a sang theite aadingin Amah pen Pa Pasian ahihna san lah nading leh muan lah nading omlo hi.(1 Kor.8:6; Efesa 4:6,1Johan5:20) Ahih hang, phawk ding thu khat ah; “…..”Jesu in Topa hi,” ci-in kuamah in Kha Siangtho suanglo in a pulak thei kei hi.”(1Kor.12:3)

“Bang hang hiam na cih uh leh, Pasian’ lim tawh a dim khempeuh in Khris pum sungah kilangin a om hi.”(Col.2:9). Tua ahih leh, Jesu sungah Pasian om maw, ahih kei leh, Pasian sungah Jesu om? Nang khensatna bangbang in na zuihna leh na tawntung mun ding hipah hi. Nang koizaw na tel diam?

Hih lai a simte khempeuh tungah Pasian’ angvanna thupha hong tung henla, Pasian zia tel zawkna kong ki hongin, Bawng ankuang sunga hong suak naungek pen Pa Pasian ahih lam Pasian Kha Siangtho in theihtel na hong guan ciat ta hen. Note tawh Pa Pasian a dawn khawm ding, Mang Khan Khup