Pa’ Mit (A Father’s Eyes) ~ Khat Thang

Pa’ Mit (A Father’s Eyes) ~ Khat Thang

Jonathan a ngek lai-in a Nu in sih san ahih manin, a Pa in kemin khansuah hi. A pata un kikhawl siamin, kithuthuak uh hi. Jonathan bawlung suih uk ahih manin a Pa in a kimawlna khempeuh ah zui-in tha piak tangtang hi. Jonathan a tha neu kingkeng sim ahih manin, bawlung kimawl ding telcing zo lo himah tase leh, auk, atupna khiam het lo-in akisin ngeina bangin zom den hi.

A kimlepam in Jonathan cikmah hunin, bawlung kimawk ding telcing zo dingin um lo hiphial mah leh, atup le sawmna in ama hong tutpih hi. Bawlung makaipipa in Jonathan ahanciamna, a kipiakkhiatna le acihtaknate mukhia ahih manin, kimawlna sungah kihel dingin hong tel khia petmah ta hi.

Ni khat kimawl akisin laitakun, a siapa in laikhak khat hong pia hi. Jonathan in tua lai hongin a sim khitteh khitui luangin kidik kawm sa-in “Sia aw, Ka Pa in tuzing sangin hong sih san hi, tuni kisinna ah hong kihel zo kei leng a lem dia?” ci-in ngen pah hi.

A siapa in zong a liangko tungah a khut nga kawmin, tawlnga hithiat lel in, hong tung ding Sani ni ciang a kidemna ah zong kimawl dah phot in ci-in tawlnga sak hi. Tua bawlung kidem ni in, Jonathan pawl lamte in a lang khatte suksiat takin hong lel hanhan mawk uh hi.

Jonathan om zo nawn lo-in a tutna pan dingkhia in, tualpi lam hong tai phei hi. Siapa le alawmte in ahih leh tuni bel a lel hita hang ci-in lungkia tek ta uh hi. Jonathan in Sia aw, kei kimawlna sungah hong lut sak ta peuh in va ci mah ta leh Siapa in phal pak lo sawnsawn hi.

Ahi zongin, Jonathan in khamuanna tak tawh a nget niloh ciangin Siapa in mi khekin Jonathan lut sak hi. Jonathan hong lut phet hong thahat lian uhin a sawt het lo in alanglamte tawh hong kidinto zo hi. Kidemna hong munnop semsem ta hi.

Petpet ah, kimawl hun bei dekta ahih manin, hih a manpha pen hun tomno sungah Jonathan hong tai-in, a langte kung dongah hong tungin zawhna goal hong khum mawk hi. A pawl bup in, lungdam luain hong tawndian ngeingai uh hi. Gualzawhna hangin a lungdam mipi zong hong kiko zaizai uh hi.

Kidemna hong zawh siang khit uh ciangin, makai Siapa zong Jonathan tutna lam hong nehin, “Ka nau aw, ka um zo kei phial hi, nasialua mahmah hi teh! bangci bangin hi bangin hong gualzawhpih zo na hiam, hong gen dih in?”

Jonathan in a Siapa en kawmin, a khitui hong luang hi. Sia aw, ka Pa sih thei hive teh maw, ahih hangin ka Pa a mittaw ahih lam na thei kha hiam?” Jonathan a kahnop ki-ip kawmin, hanciamin hong nuih mai hi. “Ka Pa in ka kimawlna khempeuh ah tha hong pia-in hong zui tangtang hi, tuni a kimawlna ahih leh ka Pa in hong muh masak pen kidemna hi, ka hih zawhna ka Pa mu sak nuam ka hih man hi”

Happy Father’s Day! Pa aw, ka hih zawhna kici khempeuh nangma itna vang ahi hi. Khat Thang (Credit to: original writer “A Father’s Eyes”)