USA, Kentucky pan Pa Lian Suan Khai @ Zogam Khai (Haupi, Ngaihte) in hongnusia

USA, Kentucky pan Pa Lian Suan Khai @ Zogam Khai (Haupi, Ngaihte) in hongnusia

Mangpha Pa Lian Suan Khai @ Zogam Khai (Kum 49) Ngaihte Beh

Haupi khuami Bowling Green, KY USA aa ateng Pa Lian Suan Khai in abeisa July 29, 2022 in Kalnatna tawh hongnusia cih thu izakman in ZIUSA kipawlna mintawh dahpihna ipulak hi.

Pa Zogam Khai pen Zomi Innkuan Kentucky ah member khat leh ZIUSA Genvai member pom ni 4/30/2018 pan active member khat ahih manin thumeilet/policy zuiin (100%) Death Benefit $15000 kipiakhia aa paakkual $150 man khat tawh zong mangpha khakna kinei hi.

Pa Zogam Khai luanghawm tawh anunung pen hunzatkhop ding hong tung ding Monday August 1, 2022 12:30pm in (ZCC) Pawlpi makaihna tawh, Funeral Service bawl khit ciang, Rev. Zam Suan Mung in han ah vuina nei ding hi.

Pa Zogam Khai hong nusiatna hang adahakap alungleng khuangai tanau meltheih khempeuh hehnemsiampa Kha Siangtho in alamdangin hong hehnem ciatta hen! Dahpihna Lianpitawh, Mun Mang (Zomi Innkuan USA, Inc. Secretary of Genvai)

ZOGAM KHAI AW KA LUNGSIM NONG DAHSAK HI

“Pa aw, na hun kigak lam thei ing, ahi zongin vanleng ciah leh kuan hong sapsak ning, ka nupa un ka lutung uah khut nga-in thupha nong piak khit ciang ka ngasa huan ne inla, kileh kik pah in” ci-in phone nong set thithe hi. USA om sung a kigel kholsa hunte a kibicih luat manin kong pai thei kei mawk hi.

“Nu aw, Pa aw an lim khat na nekna un” ci-in sum nong khak zel hi. Tuzingsang in nang tungtang thu bekbek FB ah hong pai mawk ahih manin ka lungsim nong nasak lua hi. Na lu tungah khut nga in thupha hong pia man nawnlo ka hi ta mawk hi.

MIHING KHAT BEK IN I HIH ZAWHLOH THU TAMPI OM MAWK EI

Zogam Khai aw nong ngai mahmah a, ahi zongin nuam takin i kikhawl kha ngei kei hi. Online sermonte pan na kikhelna hangin “Pa aw” nong ci tangtang hi.

Vanleng tawh hong leng vingvengin thupha kong piak khak loh, na lunggulhna kong tangtun zawhlohna in ka lungsim hong nasak mahmah hi.

“Aw mihing khat bekin mi khempeuh lungkim nading kisem zo hetlo ahi mawk ve maw” ci-in ka khuisa hiaihiai a nang kong phawk hi.

“Pasian nasem ten hong lunggulh selote bel phamawh kei, hong lunggulh thupha i piak ding a ut valval tampi a om lam phawk huai hi” ci-in kei leh kei thu ka hilh phapha hi. Sia Do Khup