OPERASI tawh kisai i hih theih omlo hiam?????

OPERASI tawh kisai i hih theih omlo hiam?????

Reference kician omlo napi tulaitak Malaysia ah Zomi UN Card tawi nailo te lauh mahmah ahi (OPERASI) vai awlmawhna tawh ka ngaihsutna tawm ong kum nuam ing. Tuni ciangciang online/social network tuamtuam pan imuh ciat mah bang in ei Zomite ki khangto mah mah ta aa, thugensiam, mipil, mihau, makai muanhuai kitam mahmah ta hi. August 2, 2014 ni in Zomidaily ah “Zomi te’n UN ECOSOC Consultative Status dinmun kingah ta kici hi. Lungdam mahmah hang. Ahizong in ka lungsim sung ah, ‘Malaysia ah ei Zomite’ buaina tawh kigamla lai si ee maw’,ka ci ngeungau hi. Malaysia ah haksatna pen US or Innlam khawng tawh kilamdang deuh ding in ka ngaihsun hi. Ahang tampi om in teh.

Tua teng lak pan UNHCR Card tawi nailo Malaysia ah i sanggam u-leh-nau haksatna tuakte, gamdang tungsa Zomi mipil te’n hong ngaihsutpih (Consider) le uh cih ka lunggulh na hi. Bang hang in hih gamah Police/Rela/Immigration te, aihkeileh Damiah (Robbers) te nangawn in hizah takin hong nopneh leh hong simmawh lawmlawm ahi uh hiam? Gamdang aa i mipil i makai ten ong huh theilo uh hiam cih pen ka lungsim ah omden hi. Malaysia gamsung cileng, i ZAM/ZRC makai te zong “Mana IC”? kici leh UN Card mah kilak aihciang inah, US, Australia leh Canada khawng ah om aa, UN (Leitungbup kipawlna) zum nangawn ah Consultative Status ciang dong angah i mipil ten ei buaina hong phawk pih le uh cih I lunggulh na hizaw hi.

Kimat kihen ding lau aa, Zusa akua pan pusuak ding bang aa dak khiankhian i mipih te hehpih huai lua hi. Hih Malaysia ah UNHCR te lah nak Responsive loh lua peuhmah uh ahihman in, USA ah om Sia Dr. Do Khan Khup te, Gregory Kap Suan Lian Ngaihte Or Pu Go Sawm Khup te pawl in UNHCR zumpi aizong, Human Rights Organization zumpi ciang dong ah deihtakpi in thu na puak le uh thembeek phatuam zaw deuh ding in lamen mahmah ing. Banghang hiam cih leh Malaysia icih zong gam neuno khat leh, a kiim a paam aa gamdang te hang bek mah tawh nungta hilel hi. Amau tung ah bangmah Pressure omlo ahihman in a ut a nuam vua gamta uh ahi hi.

Hih tawh kisai nasem nuam takpi aa, Fund omlo, sum kisam aih leh zong kidong phial mawk ve ni ee. A phattuam na ding ahihnak leh. Malaysia ah RM 10/20 piak khiat ding haksa lo hi. Makai ten hoih tak ong vaihawm peuh leh a piakhia nuam kitam mah mah ding hi hih OPERASI vai peuhmah. Malaysia icih zong makai picing khat a ding in kitheihmawh bawl (Ignore) theih hilo hi. Zomi tampitak i omna phualpi khat hi aa, na sanggam na meltheih khat hamtang i omna ahihi. US khawng ah Zomi te’n iPhone 6 khawng ngak aa na tut liauluau lai in, Malaysia ah na meltheih OR Zomi pih tampi, a tul a sim te nisim in lauhthawng na leh dipkuatna vive tawh nungta hi. Thungetna ah zong phawkni. “Thupha ngah Zomi te, Pasian teeltuam Zomi te” kici ci buang banghang in Pasian a theilo khasum tawm nono asaang te’n, ganhing mat a man a, bawng hawl a ong hawl zezen hiam??? Ei zong ihih theih khat beek om ding hi.

Abraham Lincoln hang in North America ah mivom ten suahtakna ngah aa, Nelson Mandela hang in Africa ah mivom ten suahtakna ngah aa, Adolf Hitler hang in Galpi nihna piang zo aa, Mahatma Gandhi hang in India in Suahtakna ngah hi. Mihing khat hang in gamkhat ki pumkhel zo hi. Malaysia ah suakta tak in naa kisem thei leh i Zogam zong hong khangto ding aa, minam khantohna step khat zong hipah ding hi. Tua ahihman in pilna siamna kicing, neih leh lam kicing zaw deuh Pasian thupha piak gamdang tungsa makai te aw, MALAYSIA AH ZOMITE GAL HONG DON KIK UN. Pasian in thupha hong pia hen.

Sanggam UNHCR card ngah nailo te aw, lungkia kei un. Sawltak Paul leh Silas Thong innsung pan a suakta sak I Pasian hi aa, Humpinelkai khuuk sung ah Daniel a ompih I Pasian mah ahi hi. Tua Jehovah Pasian in nasep nabawl na khempeuh ah hong ompih henla, UN Card ngah lua kisa Malaysia nusia aa gamthumna na lenkhiat vingveng dong i biak pa Pasian in hong ompih ta hen.

Zoheisa