Nuupaa icih teh… ??? ~ Lengtong Pauno

Nuupaa icih teh… ??? ~ Lengtong Pauno

Anuukhat leh apaakhat kiteeng, cihna hiziau deksuailo hi. Aki itpen, aki ngaipen, aki hehpihpen, aki khualpen, aki deihsakpen, aki masakpen, aki neekngaihpen leh, kuamah alahloh, kuamah apiakloh, aki lak, aki pia tepen NUUPAA tebek ahi hi.

Tapa tangvalte leh anu NUUPAA hilo hi. Tanungakte leh apa zong NUUPAA hilo hi. Tua ahihmanin, ta nungak tangval te’n hongitkei a, imonu imakpa te’n hongit zolo isak phial lezong, mawhpaihluatding hilo hi. Ahangin, amau tawh NUUPAA ihikei hi.

Ita itu imo imak, iU inau ibeh iphung leh mikhempeuhin hongitkei phial lezong aki it, aki ngai, aki hung aki gum cintending ei’ NUUPAA te ihi hi. Amaute i-it ikhualluatmana, akingai akiteeng zong ihikei hi.

Tua hi a,… Leitungah, sihna’khenloh buang a, aki hingkhen’ NUUPAA te sanga, aHAMSIAzaw mihing, om nawnlo dinghi. Ka lungdam, Munkhai’pa

TATE’ CIAPTEH KHINKHIAN DING THU

A tate hongitluat mana inu le ipa ana kiteeng uh ahihloh hangun, a tate hongitluatna hang utawh khat le khat kithuaksiamin mawhna kimaisak a, ana kikhenngam hetlo uh nahi gige hi.

Sihna in akhen’phial lezong, adamlai penpenin atate’ mailamding akhualna tawh, atate taisanngam hetlo in, anuntak’pih tin’ten’ hi.

MANLANG VEVE LEL EI’ MATAW

Ta thum aneipan papi damtheilokhat lupna ngakin kumzawn’a, kumnih khitciangin si hi.

Akizanhah nidingzanin,tuama khakhatlai a, azi asi aphaitam’pa pen, sigalding leh zawlheel ding namnih thuahin, lametna tampi tawh akilawmpen leh anamtui theipenin hongpai khekhe a, apasal’luanggei a akapkap akong’nu gei ah hong tusukkhuan’ hi.

“Doniang’nu aw, kapkap nawnkei in.Leitung ngeina hi, ki hehneem siamin. Ei tenih akibang hilo ihiam…Doniang pa’n hong nusiat zenzen hangin, kei omlai buangsam hiveng. Asisate asisa hi. Ei anungtalai tenih i mailamding kikum dihni. Khawisa ganno, bawngle sial zong 2le3 neilaibuang hive hang, khuazaang vaakin Mopawi ibawl keiding maw… nacina? Doniangnu”.

Doniang’nu zong akahtawpin, alukhuhna dial hongin enphei a, aphaitampa’ bilpaang ah: “Kei,…kei- awwngnawnlo hiveng” cikhiankhian hiau mawwkkk…

Pasal’ ki zanhah nizana awwngnawnlo zongbel, MANLANG VEVE LEL EI’ MATAW!!!… Ka lungdam, Munkhai’pa