Nuta Lai Kikhak – 2 ~ Hau Za Cin

Nuta Lai Kikhak – 2

Ka tapa aw, nunglama kong laikhak ngah lo na hiam, hong thuk nailo hiteh. Ken tun na nau sangkhak ma deuh in a khutlam a hoih laitak hong atsak leuleu hi ing. Sangkhak leh na nau in singpua dinga, a khut pol gawp ding ahih teh tua ma in ong at kik hi ung. Ka lai masa na muh leh tua zong hong thuk kik veve in aw. Na nau sangkhak naita ahih manin hong nawh at mahmah nung, na sim theih kei leh inn vengpa nung deuh in no kiang lam ah hong zin in na dong mai in.

Eh, inn vengpa a pai lamin KUULIA leh ZAPAAN lam tawn ding ciin, no omna lam mah hong tung ding hih tuak hi. Zangkung pan a din khiat sawm leh vanleng a mei tomlua in a sau in peh kik kul ding ciin gunkuang tawh gunkhawm lam tawn in KUULIA lam tawn ding ci hi. Ei omna pan ka ngaihsut uh ciang KUULIA pen gamlapi hi ding a, vasa lengleng leh nitum ciang a giak thumvei khit ciang KUULIA gam kimu nailo ding ci uh hi. I khua hausapa zong lumuhzii tawh gamdang pai sawm in ahih hang no omna lam ka gen kei uh hi. Nang omna pen na lawmte hong genn pan a hoihpenpen mun, sum zong a tam penpen na mun cih in za ung. AMELIKAH mah ci hilo na hiam. Tua gam te pen ZAPAAN te leh KUULIA te sang zong hauzaw uh a, MALISIA sang zong gamla zaw ci uh hi. Nang zong tua sung na tung takpi hiam? Ka lai hong thuk mengmeng in. AMELIKAH na tun takpi leh na lawm Mutpu zong tung ci hiven, a nu leh pa bang sum leitawi liangin Bawng go in pawi kham kei uh hi. A sum bei khempeuh Mutpu in khak ziau ding ci hi. Ko zong nang AMELIKAH na tun takpi lam ka theih uh ciang tua sang nasia zaw hih nuam ung. Hih lai hong thuk mengmeng in.

[Na laikhak ding uh …. bang e, laikhak hawmpa?…. ka gen khin veh…]

Aw, na khol pak o. Hiah na laikhak ngah pah ung ei. Ka gelh laitak uh na lai ngah ka hih man un hong sim masa nung. Tua ciang ka gelhsa uh hong zomkik nung.

To MY Mather and Fader and Sistaa…

Gud mawning. How are zuuu? I am very fine here today. You also fine I hope very muchs. Today is hot. I eat also.

Zinglish theilo ding na hih uhteh tua zah hong at phot ning. Ka atte na seih kei uh leh innvengte khawng na dong mai un. Siapipa zong sanginn ah om kha ding hi, na dong un. Tun kei AMELIKAH tung ding hita ing. Tu laitak ka omna uh bel AMELIKAH pai dingte omna khua hi ci uh. A gam min bel OKE cipong uh hi. AMELIKAH hilo in USA hi. Na sim uh ciang Zu-Esi-Eie cih a sim ding hi. Tun kei gamdang tungta ka hih manin ka cih bangbang in na om ding uh hita hi. Ko omna gam ah mi khempeuh pil hi. A pillo te hih gam tung theilo hi. A tung masasa mi pil thei mahmah hi. No zong na hai omom nawn kei un. Bawng, Vok, Kel cih khawng na khawi uh ciang a tuam tek in na khoi un. Mawtaw tawh bawngann, vokann, kelaan khawng na pua ziahziah un. Sum na neih kei uh leh lungkham kei un, keimah in kong khak ding hi. A kisam zahzah leitawi na zong unla, kong khak mateng na ba phot un. Ka nasepna ah ka nasemte leh keima mawtaw zong datpong, sorry fotuu zaih in kong khak hi. Na en le uh cin, a gei lama a gol, a hoih penpen kei mawtaw hipah hi. A dang mawtaw 30 khawng te pen keima nasemte vive hipah hi. Ka company uh gol mahmah hi. AMELIKAH ah a golpen hipah hi.

Bangmah na lungkham kei un. Ko AMELIKAH ah bel noh lam banglo in President khawng pen kitel ngekngek hi ung. Deih khat peuh guang ziau cih bang hilo hi. Ukcip cih bang zong hilo hi. Vai hoihtak kihawm diatdiat hi. Thu kikum tangtang uh hi. Ka kumpipa uh bang leitungah a gol pen hi. A pil pen zong hipah hi. Aman a khutpi meek leh leitung vut leh vai suak lel ding hi. Tua ciang galpi thumna hong tung leh ko gam bek suakta ding hi ung. Tua manin no zong hong pai mengmeng un. Sum leitawi khong na zong unla, a kisap leh keimah in ka loh ding hi. Kei zong hi lam ah ka sum leibat teng ka loh khit ciang no ading kong khak ding hi. Ka sum batsa te zong a neite in hong siiksiik lai uh hi. Ka pia thei nai kei hi. No ading zong kong vaihawm ding hi.

Ka zinkhiat lai un KUULIA lam tawnlo in ZAPAAN lam zong ka tawn kei uh hi. MALISIA a cih na vuah kum tampi ka taam uh a, tua mun zong khatveivei kong phong zel ngei hi. Ka lawmte tu dong MALISIA ah omlai uh hi. Ahi zongin amau ka phong man nawn kei hi. No zong tun AMELIKAH ka tun zawh kum sagih bang pha ta lo dia, kong phong zo nai kei hi. Sum leiba ka khit zawh ciang kong phong thei pah ding hi. Na lungkham kei un. Kei zong lawmte zii ding pasel tawh kikhak ziauziau uh a, khat hong ngaihsut sak dih un. Pasel golte hileh deih ing. Githa banga a taw lam a bo biuhbeuh hi leh ka deihdan hi. A taw gol ding, a awm gol ding, a mai peek ding, a khe neu ding, a tangai gol mahmah phot lel ding. A vun bel a ngo, a pak beba kisam tuan kei. Hih lam ah a ngo tam mahmah lel in a vom zong tam lel in, tua manin a vom leh a kang kikal hileh deih ing. Ka nuno te a om dia? Ahih kei leh kua melhoih pen a, i khua ah? Amah a ut ding lamen ing. A ut kei leh zong sum tampi ka neih lam na gen le uhteh hong ut pah ding hi. Ka mawtaw maan leh ka office maan te uh zong na lak le uhteh lem lel taw.

Tua zah hong gelh ning. Ka nasepna uh office khua vot lua in ka khut liing hi. Damdam in na simsak mai un.

Na tapa…

Bawi, katapa aw, na office na cih pen zum na cihna hiam? Mawtaw tawh bawng ann la ding na cih pen a bawngpi zong kinei lo a koi ah bawng ann la ding, hithei nailo. Khuasungah hausapa thuthu in bawng kilei thei hi. Amah kiangah bawng lei theihna ding paamit ka siau uh a, a kiat ciang hong theisak pah nung. TUa ciang a sum ding hong khak inla, bawngpi a la khat na lei nung. Nuvaw lawp lua ing. Nang bang tapa kong neih uh lungdam lua. Na sumbat te na loh mengmeng in. A neite in zong zang nuamta ding hi. Mi muhdah dingin na om het kei in. Ko zong thungetna ah hong phawk ung. AMELIKAH na tung ciang Zinglih a cihte khawng zong hong siampah teh, ka kipaak lua. Ko kaingah naupangte in zong ZInglish sinta uh hi. How is your name? cih khawng ka theita uh hi. Tua a kidot ciang a dawnna pen My name is Mather ci-a dawn ding hi, hong ci uh hi. Nong ciah ciang Zinglish tawh kiho theita ding hi hang. Ka laimal gawm pen amau gawm dan tawh kibang lo kha ding hi. Ken bel a aw gin dan tawh kong gelh pahpah mai hi. Tua bang vive in hih lam ah lai kigelhzaw hi. Noh AMELIKAH lam ah a kigelh hiam.

Nung deuh in na lawmpa KUULIA pan Lai Siangtho MA a cihte zo in hong ciah a, vanleng tungah a tuanna thu hong gen hi. Vanlengtungah mivom, mikang, Sen, Zapaan, Indiah, Kala, leh Neekruu te khawng zong tuang thei ci hi. Noh lam zong a tua bang mah hiam? Koh zong mu nuam mahmah ung. Hong sam mengmeng in maw.

Inn lam bel damtek ung. Nung lam deuh in na omlaia na hawhna zelte uh pitek pen si in, a zingciang kivui pah hi. A ma kum kiciamteh dan in khua gal mual neih kuma suak hih tuak hi. A tupa pen noh tawh kigual hi a, Tedim pai kum a piang mah hi. Tua kum ka Tedim pai uh nang kong paai lai hisi, gim mahmah ka hi maw. Na mawtaw maan nongkhakte, kilamdang den keei a, a koi pen hi ding hiam ci ung. Na office nasemte mawtaw zong a mun ki laih den ahih ciangin a koi pen mun hi ding hiam cih thei kei ung. Nong khak kik teh mawtaw toh i khua hong tung in maw. Na paizawh ka simsim leh akpi tui lai sawm val bang a kinei man hita hi. Aktui ka neih uh hangin mite in hong guksak mai mah uh hi.

Khua pawlpi zong hoih zel hi. Upa khat in nung kal in thu pulakna a neih leh huansakpa heh a kilai dek uh hi. A kitotna uh bel thupi kei. Upa komiti te in kumthak thupha mipi khempeuh tung kong puak uh hi, a cih leh huansakpa in, kei thupha upa komiti te in puak thei kei uh teh, kei mah in ka puak ding hi ciin kikhop tawp ciang awng lala hi. Tun siate leh upa komiti in pawl pua ah koih ding a sawm uh hi.

Na zin zawh, KUULIA hiam ZAPAAN hiam khat na tun laitak hi inteh, khua ah Jubilee khat ka nei uh hi. Tua Jubilee ah mi tamlua mahmah a, khuasung mi khempeuh sang mi kitamzaw hi. Leitung mi khempeuh khoppi siim in hong pai tawh kibang hi. Nang na omloh hang AMELIKAH te khempeuh zong pawi siim in hong pai tawh kibang hi. Noh lamah zong tua pawi na zang uh hiam? Khua pawi pen mi khempeuh in thei ding hi. Leitungbup in kithei ding ci uh hi. Tua zaha thupi pawi kibawl leitungbup ah om nailo ci uh hi. Tua a genpa pen ENGLAAN ah sangkah ngei khat hi. ENGLAAN a tung ngeite pen mipil penpente hi kici hi. Tua manin tua pa thu gen peuhmah thuman hiding hi. Amah pil mahmah hi. Tua manin i khua ah pawi pi kibawl pen leiutungbup ah a thupi penpen hi, tuapa in ci ngiat hi.
Na nau zong lu susu ta in, ka ihmut uh suaklua ta hi. Nang laikhak sim masa ka hih man uh hi. Tun na laikhak pen sabuai tungah ka koih uh hi. A kiu ah meikhuat tui kawt a, namsia mahmah hi. Na nau kiangah kawtsak kei in ka cih hi napi, na kawtsak veve hi. Den ciang ka vua kha ding hi. Na pa a ihmut zawh sawt khin zo hi. Naak ging lalal hi. Ko zong lumta nung. Na ihmut ma in ka laikhak uh na sim phot in. Tun koh lumta ding hi ung. Ka ihmut khit uh ciang na simpah in, na lupma in.

Kong gennop tampi tawh hizah in hunsak phot ning. Na mangpha in. Zingsang tho baih in. Na zi ding zong pasel a liante in hong khak sawm nung. Tun bel ka ihmut suakta. Zingciang hih mai ning. Sum na neih ciang ka khedap lui lua mahmahta in a thak ka leina ding hong khak in. Na nau a zong a taw vang khinta hi. Na pa pheituam zong a vtaw vang ka phop khinta hi. Sum hong khak mengmeng in. Lumta nung. Mangpha. Na nu. Hong it. Ka gente mangngilh ken. Na thei hia. Mangpha taktak ta aw. Mangpha. Mangpha. Na nu hi ing. Na nau ka atsak hi. Mangpha.

Hau Za Cin
Phuitong Liim