Nuta Lai Kikhak – 1 ~ Hau Za Cin

Nuta Lai Kikhak – 1

“Ka tapa aw, hih laikhak ka gelh laitak koi ah om na hiam? Ka at laitak in Zu-Esi-Aye na tungta hiam? Hoihtak om in maw. Khualak khawngah vakvak ken maw. Bawngek khawng na sikkha dinga koh hong sawpsak theilo ding ka hi uh. Na pai zawh i bawngpi nihvei huk in khatvei zong gai nailo hi. Bangcih ding i hiam? Na omlai na pute bawngtal tawh i bah pen mah hi. Nong ciah ciang bawnglong ding zong hong pua in. Zanni in na pi in a ak hungna lamah i akno a gial pen ciangtawh satlum kha in innuai ah na phum ung. Nidang a na lawmte tawh na sial kineihna uh veihnamkhau te tua lam ah a om hiam? Tukum i khua ah guahzu khol kei. Khuavengte kiangah zong zu lo hi. Ni sa mahmah hi. Khatveivei guahzu zel bek hi. Na lup ciang na khe sil siangzel in.

Mi gam ei khua banglo ahi. Ko zong kong pai mengmeng na ding uh hong vaihawm mengmeng in. Hong it, na Nu. Na mang in nong muh leh hong hopih in maw, hong ngai mahmah ta ung. Na naute’n zong hong phawk mahmah hi. Na pa zong a vaumimgau nekna a ha kawm ah vaimim hawng taanglai hi. Tua lamah a holhna a om leh hong pua in. Gennop tampi tawh hunsak ning. Na lup ciang ihmu pahpah in. Lai at, na Nu. Na nau hong at hi, ken ka gennop teng ka gen hi. A maanlo a om leh a sim dan na siam mai in. Ka mit zong hat nawnlo a ka gen nop teng zong kizom theilo hi. Ka phawk masaksak kong gen hi. Nong ciah ciang na pute kiangah hawh sawm ni. Na gang zong a lu na thei zel a, a luvai thei zel hi. Na ni zong buai mahmah hi. I vokpi a suak kik ciang a pa khat na khawi nung. Nong ciah ciang i gawh ding in. Akpi lah no nei napi khuai pahpah hi. Khatvei huan sungah huan kho in ka om laitak mu in hong laksak sawm a, ka tu tawh ka den gawp leh khah kik bilbel hi. Tua hi kei leh i akpi kum khawi pen bang a khahsuak dektak ka hi.

Ka vaimimgau nek na uh ka gil uh puak mahmah in sodamin bungkhat nong khak pen mah na ne zel ung. Bung khat hong puak in, nong ciah ciang. Khatvei mah in na lawmpa khat galkap tum pen hong ciah in a zi hong ciahpih in, a khut khawng a khe khawng ngo kekkak hi. No lam ah zong tua bang a om hiam? Ahi zongin ei tawh kiho theilo hi. Ann zong ei nek te ne theilo ci uh hi. Amau ngo lua ei annte vom sa lua hi. Nang zong tua bang nong neih leh bel nong ciah uh ciang buai mahmah ding i hi. Na naute ading bakilh leh lingkhei zong ong mangngilh ken. Na pi ading bil holhna leh zabel sik tawh kibawlte hong pua in.

Na pa ading cintanna a sante khat. Kei ading ungsii bung khat. Ka sam sau mahmah ta in, ka ungsii lah a bei ding hita. Nong puak theih leh a bung lian mah hong puakzaw in. A neute hileh na naute in hong zatpih in bei pahpah hi. Na vak ciang phanat mah bulh tangtang in aw. Mi gam khawngah khe guak tawh kivak ngeilo ahi. Ko zong na omna lam mu nuam mahmah ung. Mawtaw khawng, vanleng khawng a gen uh ka zak ciang ka sih ma in mu nuam hamtang ing. A khu zong namtui mahmah kici hilo hia. Piantanah paite in gen ve uh aw. Saupi hong gelh leng sim man kei kha niteh.

Na nau zong a gelhna a khut khamlua ta, tua zah ci phot ning. Ka gen ding zong thei nawn keng. Kong gensa ungsii bung pen hong mangngilh het kei in. Ka mangngilh a om leh na behlapsak in. Kong khak kik ciang hong gen mai ning. I khuapihte khawng na muh leh na kikhawl unla, thu na mang in. Mi lak ah annek ciang khutsil ding sawl hamtang kul in om nawn ken. Tangval hita a nungakten zong hong ngai maithei hi. Ahi zongin na nasep nawngkaisak dingin lawm ngaih khawng hong nei het ken. Nungak helna ah githa gol te pua nawn ken, na lawmte a a neuzaw kawm mai in. Na pi zong a ihmut suakta hi inteh, lu susu, hunsak taktak ta ning ei, na mangpha o. Hih ka laikhak na sim khit ciang na lumpah in. Zan sawt hak nawn kei in. Lup baih ding, thawh baih ding cih siate in gen den uh hi. Mangpha. Lai at,

From: Hong it mahmah, na Nu, zan nai 10:00 P.M. lup hun hita”

Note: Khuaimei (meikhuat) zong a tui bei dek in ko zong na nau tawh lumsuk pah nung. Na pa lum zo. Na pi zong a lupna lam zuanta. Mangpha aw. Nang zong lumpah in. Ka thu hong mang in aw. Na sim khit ciang lumpah o. Na nu, from mother, yours very truelyi.

Cimphawng!

Hau Za Cin
Phuitong Liim