Nupi naupaai kha 6 aphakhin khat inndawl 3 na panin kia in sipah

Malaysia gamsung Kota Kinabalu ah zanni Tuesday ni in nupi naupaai laitak khat inndawl 3 na (3rd Floor) panin kiasuk in si cih theStar pan kiza hi. Tua nupinu minpen Jaequiline Ribot kici a, kum 25 aphakhin khat ahihi. (Photo na et ciang inndawl 3 hikei, inndawl 4 hilo maw, mihai ci’n nong kogawp zelma in amau simdan hidan hi. Ground Floor, 1st Floor, 2nd Floor, 3rd Floor 🙂

Agil sungah naungek pen kha 6 phakhin a, aomna Apartment ii inndawl 3 na panin akia ahihi. Innmai Balcony ah akikhung sikzawn tungah muaiza khat phoding in akithawi laitak in akiasuk kici hi.

Tuesday nitaklam 3pm hunpawl in innmai Veranda ah muaiza delhphah apho khiading in akithawi hihtuak a, Balcony sikzawn tungah delhphah pho in anensuk ciangin kitan a, akiasuk kici hi.

Hih tuahsiatna Incident apianlaitak in ataneu kum 2 aphapan khatbek tawh inn ah aom uh ahihi. Apasal leh anu pen nasem in akuan uh ahihi. Ataneu pen bangmah cilosam hi.

Kota Kinabalu acting police chief Supt George Abd Rakman ii genkhiatna ah a innveng te’n vankia agingdam khat za ahih manin, a etkhiat ciangin tua nupinu pen innnuai leilak ah akiasuk nahimawk cihi.

A innveng te’n amanlang in Guardhouse aom Security te zasakpah uh a, tuapan in Guard te’n Police te zasaksawn uhhi.

Jaequiline Ribot ii aluanghawm pen Postmortem bawlding in zato ah kipuak a, thunei te genna ah kuama suamlup hilo, amahleh amahzong atuaksuk hilo in, atuahsia in asi “Sudden Death” hiding ci uhhi.

Malaysia gamsung ah inn alui mahmah pawlkhat omin, kipuah khollo in aki koihcip tammahmah hi. Inndawl 20 valval apha, innsangpi honkhat aki puahkhollo in aki koihcip te ah Kawlgammi pawlkhat innsaap in ki omsawnsawn ahih manin, dipkuat huai simsim hi.

Related: Malaysia ah papi khatin atanu buan in naupaai, kha 7 phakhin

Tuahsiat hunding ki gentheilo, ih sihhunding Pasian honggeel saksa hi, kidop hangin ki tuahsia veve aci pawlkhat aomsam hangin, kidopding zong thupi veve hi. Adiak in naupangno tawh aki thuahte adingin kidop huai mahmah cih ihki phawksak phapha hi. ZD Sawltak #zomidaily