Nupa kithutuahna zat siam ni

Nupa kithutuahna zat siam ni

Ananias-te nupa in a lo zuakna uh sumte pawlkhat imsim uh a, pawlkhat pen sawltakte’ tungah ap uh hi. Hi bang thuman lohna hangin a nupa un pukin sih lawh uh hi(Sawl 5:1-10) Amaute nupa in a kithutuahna uh zangh khial uh hi. A nupa un a hoih zo kei phial zongun khat in a sia lam a ngaihsut lai takin khat in a hoih lamah na zo thei hi leh hi bang thu piang lo ding ahi hi. Amaute kithutuah khialhna hangin a khanggui uh kisutat a, tu le ta zong nei man loin a nuntakna uh bei lawh uh hi.

Hih thu tawh kizomin i nupa nuntakna lungngaihkik ding ka deih hi. Nupa cih pen pumkhat lungsim khat hi hang i ci phial zongin a sia a pha khensiamna tawh nuntak/kalsuan ding thupi mahmah hi. Ka zi/pasal thu ka man’na hi ci-in, a hoih lohnate leh a sia lamlam a geel/sep khaknate ah i thukimpih khak hetlo ding thupi hi.

I zi/pasal Pasian’ thu a uuk het kei leh (or) a hoih lamlam a thupi ngaihsut kei leh, ei mahmah in pantah a ama uuk loh bangin ei zong i zuih khak hetloh ding thupi hi. Nupa ki thutuahna hoih mahmah hi. Ahi zongin iki thutuahna pen ahoih lamlam(Pasian’ deihna tawh kituak lamlam) i hihsak ding kisam mahmah hi.

Pasian’ deih lohna lamah kithutuahna nungah, mapai lohna, guallehna, khanggui kisuksiatna leh beimangna in hong zui dinga, Pasian’ deihna lamah ki thutuahna nungah mapaina, gualzawhna, khanggui kizom thupha san’na leh nopsakna cihte in hong zui ding hi. I nupa kithutuahnate bangci lam cih ki-en kikin, puahphat a kul leh kipuah pha a, zop dinga hoih a om leh i zop kawmin Topa’ deihna lamah kalsuan in i mainawt ding hi.

Nupa ki thutuahna a zat siam thei dingin, Topa’n thupha hong pia ta hen. Amen.

Khazih sungah,
David Tuang