Nuntakna Tembaw ~ NK Khanno

Nuntakna Tembaw ~ NK Khanno

Tembaw icih pen Tuipi gal khat pan gal khat kawmna dingin a kizang khat ahi hi. Tuipi tuihualte leh, huihpite pen tembaw a siasak thei lauhuainate ahih mah bangin tembaw a kizang sak theite nate hizel uh hi.

Tui om kei leh tembaw cih om lo ding hi. Ahizongin tua Tembaw akisia sak/tui sung a tumsak pen a pualam a om tuipi te hi zeizai lo a, ama sung a a om tuite hang na hi zaw hi.

Huih om kei leh tuipi gal kantan na ding baihlo ding ahi hi. Tembaw uk captain te in huih nunzia zui in Tembaw puanpi a khun siam uh kisam mahmah hi. Tua bangin a khun siam kei leh a pai nopna lam lo pi manawh thei hi. Tembaw zong kisia sak thei hi.

Nuntakna ah zong tuipi mah bangin ih pua lam ah thusia, thunawngkai tampi tak in hong tuam hi. Tuate hangin a ki guallel ahi kei zaw a, tuate ih sungah ih lut sak, ih om sak ni in ih guallehna ding akipan na hi zaw hi.

Eleanor Rosevelt in “mi khat pen a ma lungkimna omlo in ki hehsak theilo hi” na ci hi. Heh ding na lungkim leh akiheh ahi hi.
Hehlo dingin na lungkim leh zong akiheh lo thei ahi hi. Thugen siam khat in “na hihna hong kici ahih leh heh kei in, na hih na hi. Na hihlohna hong kici ahih leh heh se dah in, na hihlohna hi lel hi” ci hi. Ih lungsim pen eima thu ahi mai hi.

Huihpi bangin ze-etna, haksatna tampi in hong nawk hi. Tuate hek siam (manage) lo in, amau sawn nana ah ih pai leh ih kung kitunglo in lam kimang thei hi.

Leitung ah ih nuntak sung pen ze-etna, haksatna, siatna tampi tak akinawk kha ciat ahi a, tuate koi ci hek (manage) hiam cih tungtawn in mihing te ih tunna akilam dang ahi hi. Nk Khanno