Malaysia Johor ah Boss numeikhat kithahna vaitawh Myanmar gammi nasem 2 kiman

Malaysia Johor ah Boss numeikhat kithahna vaitawh Myanmar gammi nasem 2 kiman

Malaysia, Johor Baru aom Workshop khatah Boss numeikhat Friday zanlam in ki thatlum hi. Johor Bahru, Kampung Sri Purnama aom Lorry Workshop khatah hi a, tua Boss numeinu sihna vaitawh kizom in Myanmar gammi nasem mi 2 te kiman cih Bernama pan kiza hi.

Hihvai tawh kisai in palik thunei ahi South Johor District Police Chief ACP Shahurinain Jais in agenkhiatna ah tua akithatlum Boss numeinu pen kum 43 aphakhin khat hi a, aminpen Goh Geok Leng kici hi ci’n pulakkhia uhhi.

Goh Geok Leng kithahna vaitawh kisai in Police te’n akankhiat uhciangin nasem in azat Myanmar Employees te thahlup hiding hi ci’n genkhia uhhi.

Goh Geok Leng sihnavai akician dingin Sultanah Aminah Hospital ah Postmortem kibawl a, asihna ahang “Cause of Death” pen naklah husam in asi hi ci’n siavuan te’n genkhia uhhi. Akam sungah a awngkhia theiloding in puansia ki hencip in, tuakhit ciangin agawl aki mekcip ahihi.

Tuaban ah alu zong aki satliamna liamma pawlkhatzong kimukhia hi.

Police te genkhiatna ah hihvai hangin nasem in aom Myannmar Staff 2 kiman in, tuate pen kum 20 leh kum 39 aphakhin uhhi ci’n genkhia hi.

Boss numeinu Goh Geok Leng pen Friday nitaklam 2pm hunpawl akipan mangcip in kimukhia zolo hi.

Tua Businesswoman ii azumkhan sungah aki etcian ciangin ama Personal vanzatteng zong Office sungah omlai hi. Tuaciang in CCTV panin Video Footage teng ki encian a, tua Boss numeinu pen Workshop innnunglam alutsuk kimu a, ahi zongin tuamun panin pusuak khiakik nawnlo hi.

Innnunglam hoihtak akizon ciangin akhedap kimukhia masa a, tuaciangin aluanghawm pen zanlam 9:30pm hunpawl in Container khat ii anuai guamsung khatah ki mukhia hi.

More: Myanmar gamsung ah tukum kha 3 sungin Human Trafficking Case 61 omkhin

Tua munsan pen nasem te ii omna Company Worker te ii Hostel munsan hi a, nasem te khat ii aomzia muanmawhhuai kisa in tuapan in Boss numei nu ii aluanghawm aki mukhia ahihi. Hih Boss numeinu kithahna vaitawh adang muanmawh mikhatzong aki zonsan laitak cih kiza hi. Sawltak #zomidaily