Nipah Natna ~ Pau Tun Thang

Nipah Natna ~ Pau Tun Thang

A ki muhkhiat masakna:
Kum 1998 in Nipah natna hik (Nipah virus) pen Malaysia a vok (pig) pan kimukhia masa hi. Vok tung tawnin vok khawi mihing ten ngah kik hi. Malaysia pan, Singapore, Bangladesh te ah kimukhia kawi kawi hi. Kum 2001 in India gam West Bengal state Siliguri ah mi 45 bang hih natna huhau in si uh hi. Tulai takin India gam Kerala ah hih natna laang hi.

A kilat khiat dan:

Khuasik, lutangna, thagolh, naaksi, luaksuak, sungpai te a kilat khiat dan (symptom) taangpi ahi hi. Hih natna pen ki nawh mah mah in ni 2 sungin ihmut suak leh khua phawk loin om thei uh hi. Hih natna veite dawivei danin om thei uh a, a kal(kidney) uh zong khoihsia hi. Ni 7 pan ni 10 sungin sihna tuun thei hi.

Koi pan hih natna hik kingah thei:

Ganhing (vok) leh vasa (baak) tung pan kingah thei. A veisa mihingte tungtawnin zong kingah thei. Vok khawi aihkeh vok tawh ki sukhate leh voksa ne ten hih natna ngah baih uh hi. Baak (bat) tawh kisukha ten zong ngah thei uh hi. Baak neek bang singgah thei puam neekna panin zong kingah thei hi.

Bangci kikep ding:

Tuciang ciang a zatui om nailo ahihmanin lauhuai hi. Vok damlo tawh kineh khakloh ding hoih hi. Ahih theihleh voksa zong neekloh ding hoih hi. Tua banah sianthona a diak in khutsil thupi ngaihsut ding. Singgah theipuam kia, baak duh namte nee lo ding. Bang hang hiam cih leh baak neek bang khawng peuh na hi thei.

More: Ebola virus ihcih in bang hiam?

Meh huan min loh a sial khawng peuh ne lo ding. Khuasung vaak leh khualzin ciang kamleh muuk tuamna(mask) bulh ding. Hih natna kilatkhiatna (symptoms) na neih leh a manlangin doctor ki ensak pah ding. Pau Tun Thang