Ngaihsutna thak nei den in ~ Hau Za Cin

Ngaihsutna thak nei den in ~ Hau Za Cin

“Na mailam a piang ding na neih bang lianin tu in ngaihsun in” cih pen a kigen tam hetlo kammal ahi hi. Leitung khantohna leh pilna, siamna, sepzia bawlzia kilamdang to zel ah mihing ngaihsutna zong a kikhek toto ahi hi. Tu laitak a hoih mahmah i cih thute pen hunkhat lai in mi khat i ngaihsutna ah a om limliam, a om kingkiang ahi hi.

Tua ngaihsutna om tiuhteuh pen hong kipuah in kiphungvuh toto a tuni a thuhoih, thupi i sakte a suak ahi hi. Tua mah bangin mailam ah, nang mailam ah hih bangin piang leh hoih ding hi cih na neih leh, na ngaihsut leh na khuak sungah vom ciuciau lo in thuk ngaihsut sem in ciiktak in kantel in thukpi lutsuk khit ciang genkhia, pulak in semkhia lecin na ngaihsut bangin hong piang ding ahi hi.

Nuntakna kikhel toto leh mihing ngaihsutna kilamdangto zel ah nasepzia leh kalsuanzia, ngaihsutzia leh deihdan zong hong kilamdang toto hi. Tua hangin tomcik i nuntak sunga i kalsuanna a lamzang theihna dingin leh i nuntakna a nop theihna dingin kipawlkhopna, sepkhawmna leh tenkhopna kilekkim i neih kisam to semsem hi. Pilna siamna zonna leh sepna manlang leh tungbaih ding a kisapna tampi omta hi. Tua ahih manin ngaihsutzia ding, ngaihsutna thak neih dan ding a lampi tampi omte lak ah pawlkhat i gen suk ding hi.

1. Mimal Ngaihsutna neu koihlo ding:

Mimal khat ngaihsutna ciiktaka a pai theih leh tua pen neu koih theih hetloh leh a deihhuai mahmah khat ahi hi. Thu ngaihsut ding khatpeuh a om ciangin tua banga amah guaka lungsim tangtaka a na ngaihsun thei mi a kisam mahmah ahi hi. Ama ngaihsutna ciim leh khauh zong a muibun pen ngaihsutna hithei hi. Tua banga mimal khat ngaihsutna pen midangte tawh kikum khawm in genkhawm dingin a hoihna a hoihlohna bangmah kikum masalo ding. Bangzah ngaihsun zo, bangzah thuk bun cihte a ngaihsutna a genna pan kimu thei ding hi.

2. Mimal tuamtuam ngaihsutnate sungkhawm ding:

Tua banga mimal tuamtuam in ngaihsut thak, ngaihsutna paipi i neihte sungkhawm dingin kuamah kigenpih nailo ding, kikum nailo ding. Nang ngaihsutna tua bang hi, kei ngaihsutna tua bang hi ci nailo dingin eima ngaihsutna ciat gen khia limlim phot ding. Tua banga ngaihsutna tuamtuam a kigen, a kipulak ciangin a genkhia sate in zong a ngaihsut khakloh thute phawk kik in ngaihsun kha thei ding hi.

3. Mimal ngaihsutnate kikumta ding:

Mimal ngaihsutna tuamtuam a kigenkhiate a banban hiam, a kinaih deuh hiam, a kituak vetlo hiam – tuate kikumnawi dingin gen khawm ngengngang ding. A kizang thei ding, a kizang theilo ding, a lamdangpi ngaihsutna cihte nangawn hih sungah kikum dingin gen khia gawp ding. Kikum gawp ding hi. Tua banga kikup gawpna panin ngaihsutna tuamtuamte a kikhilkhawm khawm ahi hi. Tua a kikhilkhawm thute panin ngaihsutna thak hong piang dinga tua pen tu mahmaha zattheih ding zong hithei, mailam ah a kizang dinga thu limci mahmah zong hithei ding hi.

4. Ngaihsutna thak pen zatsawm pah ding:

Tua banga kikupna pan ngaihsutna thak hong piangkhia pen a kizang thei pah hiam ciin kisin pah ding hi. Banghang hiam cih leh a kizang thei ding pi khat a kidiah sawt ding kiphallo a, pammaih in a kizang theilo ding thu khat zong a hoih mahmah banga sit kenkan kisam tuanlo hi. Sin dingin a kizat theih ding leh zangto suaksuak pah ding. A kisam lai thu a om leh a kisamte behlap toto dingin zangtoto ding. Mailama zat dinga hoih ahih leh zong mailama zat dinga koihpah ding hi.

5. A kizangtheite uang taka zang ziahziah ding:

Mihing phattuamna dinga thuhoih khat pen manlangtak, nawhsa, leh ciil hetlo a zat pah ziahziah ding ahi hi. Tua hi kei leh kitawmzatlua cih om thei ding hi. Banghang hiam cih leh mihing leh leitung nuntakzia kikhek ziahziah ahih manin tuni a kizang thei khat a kizatpah kei leh mailam ah kizangsuaksuak nawnlo thei hi. Thuhoih, nasepzia hoih, kalsuan dan hoihte a kizat ziahziah ciangin mihingte haksatna tampi nawkkhia in a nuam a gina nuntakna ah hong lamto hi.

Tua ahih manin ngaihsutna khat peuh neulua, cihtham kei, cihtak kei cih omlo hi cih phawk ding ahi hi. A kizang theilo ding ngaihsun kei in zong kicih theihloh hi. Banghang hiam cih leh tuni a kizang theilo khat mailam ah kizangthei kha thei hi. Mihing nuntakna tangzangsak in lungnopna hong guan thei a, mihing kalsuanna a manlang leh hoihzaw ah hong domto in hun thak ah hong sangkah sak thei hi.

Tua manin mimal ngaihsutna neu ngaihsut kei ni. Kei ngaihsutna kicing kei cih theihloh hi. Ken thu bangmah thei keng zong cih theihloh hi. Ka ngaihsutna mite in nuihzathuai sa kha inteh zong cih theih loh hi. A neu pen i ngaihsutna zong a gol pen i ngaihsutna a behlap leh a thek, a phop, a hu ngaihsutna hithei hi. Tua manin a gim a tawl, a sem a bawl, a thadah a tawgik…a kuamah peuh in i ngaihsutnate siit hetlo in i sunkhawm den, i genkhawm den, i kikupnawi den a thupi mahmah hi cih mangngilh kei ni.

Zomi te tukhawma holim a thukikup nuam a sa mahmah minam ihih manin i ngaihsutna te kikum toto, kigen toto lai ni. Hau Za Cin (Phuitong Liim)