Ngaih Anglai Zal Dingin – 1 ~ Hau Za Cin

Ngaih Anglai Zal Dingin – 1

Rangoon Institute of Technology (RIT) pan Bachelor of Engineering (Civil) a zawh ciangin Suanno zong a lunggulh mahmah Singapore ah nasep zom dingin a paisuak pah hi. A sang tawpma pek pan a nasepna ding Singapore ah construction company lian mahmah khat in a ‘khaamsa’ ahih manin a kigenkholhsa bang un laisim zawh pan nipi kal nih sunga Singapore a tun ding ahi hi. A paina ding laibusan (Passport) khempeuh a sangkah laiin a bawlsa hi a, a paitheihna ding visa zong a sepna ding Heng Do Construction Co. (HDC Co) te in a vaihawmsaksa hi.

A taktak in Suanno in bel a sang man lian leh khua lam ah ciah vilvel phot dingin, Nipini nitak sima laikhak a gelh, Monday sangkah ciang Laito (post office) pan a khak zel pen ‘a tung takpi hiam’ cih va kan phot leh a ut ahi hi. Khut liing daldal a gelh daldal pen Niangno in a ngak takpi mah hiam cih a tel nuam phot ahi hi. Niangno maan leh laikhakte hong tung zel in, khualzin lemtaang a om sima ‘ngalsa keu’ hong khakzel te zong a takpi mah hiam ciin va en nuam ahi hi. Va en nuam cih hang a tuate a va munuam hilo in, a taktakin pen Niangno kiangah va tawlnga hit-hiat nuam ahi hi!

Ahi zongin nuntakna ding leh mailam ngaihsutna tawh a ut mahmah, a lunggulh mahmah Niangno kiangah laitual leng manlo in a maban Singapore HDC Co te kiang a tunsuk a kul hita hi. Cikciang kimu kik dinga, cikciang khawlkhawm ding cih ngaihsutnate van ah khai mah bangin huihlakah hong mang hiaihiai hi. Niangno ka mu kik takpi diam? Niangno in keilo midang khat peuh ana ngai kha diam? Niangno in amah ngailo sa in kei hong mawhsak kha diam….. Laikhak sungah ut ut kigelh thei a, lungsim takpi pen mittang kimu, maitang kituah mah in kiho leeng itna kipkho taktak kitel pan hiven maw!!

Suanno leh Niangno te mailam ding ngaihsut haksa buang ei…

Niangno ngaihsutna ah, “Ka u Suanno in kei sangin sum leh pai deihzaw, kei tawh kimuh ding sangin Singapore muh ding lunggulhzaw, kei tawh tomvei nunnop ding sangin singdang lianu te tawh laitual lengkhawm nuamzaw… hi inteh” ciin a ngaihsutna hong lian deuhdeuh hi. “I mailam ding ka khualna, i nuntak a nopzawkna ding ka khualna tawh hih bang a kalsuan hi ing; nang kong itlohna hilo hi; nang kong ngaihlohna hilo hi…” ci a laikhak tawh a gelhsa laidal khempeuh in Niangno lungsim nem lah dekdek in, a hun sawt semsem – ngaihsutna sau semsem; mun leh gam kigamla semsem – ngaihsutna in banlo semsem… ‘Oh! U Suanno in hong ngai takpi mah ahi tam maw! U Suanno in hong ngai takpi mah ahi tam maw!! Kei sang paalzaw lia honem duangah bangta ahi tam maw!!..

Suanno zong a lenkhiat ding laitak in Rangoon vanlengtual pan vanlengtual nasemte telephone tawh a kiho ziauziau amuh ciang lung ngaingai in, “Niangno ka hopih theihna ding om leh ut sing maw, a aw za nuam si ing maw” ci ngaungau liang hi. Niangno tawh a kizopna theihna omsun uh lah laidal bekmah hi a, tua laidal lah ni tampi pai hilai hi. Niangno beek a u Suanno khualzinma in Rangoon hong zinsuk thei leh cih ngaihsutna om a, ahi zongin tua tantan khualzin ding cih pen Zomi te ngaihsutna ah om nailo hi. Zogam pan Rangoon zin thei dinga ngaihsutte bel – galkap te, kumpi nasemte leh siamsin sangnaupangte khawng bek ahi hi.

Tua manin Suanno zong Niangno tawh kithuza hetlo bang phial in lungzuang takin vanleng sungah lut suk in a nasepna ding Singapore lam zuan in a leng vangvangta hi. Tua hun laitakin Niangno kiangah om hileeng nak ‘hekciai’ sam inteh mate!

(zop lai ding)

Hau Za Cin
Phuitong Liim