Naungek Jesu na bangci zonhiam? ~ Sia Do Khup

Naungek Jesu na bangci zonhiam? ~ Sia Do Khup

Amah na theih nading uh limin hihbang hi ding hi: puan tawh kitun naungek khat, gan annekna kuang sungah a kisial na mu ding uh hi. (Luka 2:12) Herod kiangah a kihil kik loh nadingun a mang sung uh ah Pasian in hilh ahih manin, lampi dang tawnin a gam uh ah a ciah kik uh hi. (Matthai 2:12)

Hong suak naungek Jesu pen mipilte leh tuucingte in zong uh a, a zon dan uh a tuam tuak hi. Nang na bangci zon hiam? cih theih nadingin enkak pak ni.

MIPILTE: Amau pilna tawh zong uh a, vantung ah aksi lamdang khat mu uh hi.

TUU CINGTE: Pasian’ vantung mi in a bil uh tawh a zak dingun aw tawh gen hi.

MIPILTE: A tel loh uh, a suah nading a cian lopi in zong uh hi. A mun a mual ding kan tawmtawm dong tawmtawm uh hi.

TUU CINGTE: Gan annekna kuang sungah a om zia ding khempeuh puan tawh kitun naungek a muh ding zia khempeuh uh teltakin kihilh hi. Pilna nei lo uh ahih manin a tel mahmah ding dongun kihilh cian hi.

MIPILTE: Aksi a muh uh hangin vantung panin thukimpihna pahtawina lasakna za lo uh hi. Pasian hopihna cihte za ngei lo uh hi.

TUU CINGTE: “Tua khit phetin tua vantung mi tawh vantung mi honpite thakhatin hong omin Pasian phatna la sa uh a, ‘Van a sang belna ah Pasian min thang hen la, leitung a deih mite tungah nopna om ta hen’ a ci uh hi. (Luka 2:13-14) Leitung mipil misiamte leh mihau mi minthangte, ukna neite, kumpite in a zak ngei loh vantung mite lasakna za mawk uh hi.

MIPILTE: A tel lohpi uh, a omna mun a theih loh pa uh zong uh ahih manin vantung a aksi en sain pai kul mawk a, vandak veva sain pai kul den ding hi. Van dak sain pai uh ahih manin singkung lopa a kipan ganhing no tampi sik lum kha ding uh a, amau hangin a gim a tawl tampi om ding hi.

TUU CINGTE: A suah nading mun leh naungek om zia ding limtakin kihilh khin ahih manin a mai uh enin lam pai nuamtakin pai ding uh hi. Bia khial kha leng cih lung himawhna om lo ding hi. Amau lampaina hangin a gim a tawl lawh bangmah om lo ding hi.

MIPILTE: Mipil uh ahih mah bangin pilna neite, ukna neite thupi sa uh a, mi dangte biakna, midangte ngeina, midangte theihna, midangte upna, midangte zia tungtawnin Jesu zon sawm uh a, Herod kiang dong tung uh hi.

TUU CINGTE: Pasian vantung mi in teltakin gen khin ahih manin Herod kiangah baan sawm peuhmah lo uh hi. A tel mahmah uh thu ahih manin midang ten kham leh zong kikham zo lo ding a, a pai nading mun uh a tun mateng uh pai lel ding uh hi. “Mi hai hon” a kicih hangin Jesu thu tel mahmah uh ahih manin patau lo ding uh hi.

MIPILTE: Jesu kiang pan a ciah ciangin lamdang tawnin ciah dingin kisawl a gelkhia uh hi. Jesu a zon dan uh a khialh lam uh kihilh cian ta hi. Jesu thu a kan zia uh Pasian in deih lo hi.

TUU CINGTE: “Tuu cingte zong ciah kik uh a, amaute tungah a kigensa bangin a zaksa leh a muhsa uh thute hangin Pasian min a phat uh hi.” (Luka 2:20) Tuu cingte a ciah uh ciangin Pasian min phat sain ciah uh hi. Mipilte sangin gam lumzaw uh hi. Topa Jesu thu pen gengen ding saksak ding hi, cih lamsangin amau pom uh hi.

MIPILTE: Gel ciah khiankhian, lamdang tawnin ciah khiankhian napi uh, amau hangin naupang kum nih nuaisiah in sih lawh veve hi.

TUU CINGTE: Pasian min phat sain ciah uh a, gam lum sain ciah uh hi napi amau hangin naupang khat zong kithat lo hi. Tuu cingte hangin naupang khat zong si lo hi.

Ih biakna sungah Pasian Kha om a, kipawlna mawkmawk hi loin a gamtangtang Kha Siangtho in biakna thu hong hilh hi zaw hi.

Kum 100 cin pawipi ih bawl khit ciangin ih phawk ding ka deih in, “Pilna nei a om ma a ih pu ih pate upna, Jesu thu a tangko ziate uh phawk huai hi. Pilna nei lo thu um masa nu leh pate kaihkhop sa pawlpi mite ih B.Th, BD, M.Div, M.Th, Th.M, D.D, Th.D, Ph.Dte tawh phelsuahin philbang zaangbangin ih thehthang lam ih phawk ding kisam hi.

Lai Siangtho leh Zomi ah hong ciah kik tapeuh in maw.

Itna leh Deihsakna tawh Topa Jesu sungah khuata mipa; Evan. Langh Do Khup