Nang Pasian maw? (Mister, Are You God?)

Nang Pasian maw? (Mister, Are You God?)

Alice Gray in a kaihkhop, More Stories for the Heart (Sisters, Oregon: Multnomah Publishers, Inc., 1997) kici tangthu leh thupiang tom nono kigelhna laibu sung ah Pastor Charles Swindle (Dallas ah pastor sem-in, kum tam simsim Dallas Theological Seminary ah president a sem, Insight for Living radio thugen) in a gen hi, ci-a a kigelh thupiang khat ka sim kha hi. A thulu pen, “Nang Pasian Maw?” (Mister… Are You God?) cih khat ahi hi. A beisa kum tam simsim lai-in ka Facebook Note ah ka share ngei khat, hih lai ah kong share kik hi.

Leitung Galpi Nihna a ven khit ciangin Europe gam sunga mite nuntakna haksa mahmah hi. “Old World” kici Europe buppi galpi in zancipsak dipdep a, nek leh dawn mahmah zong haksa mahmah mai hi. Galpi sung ah a nu leh a pa a si tagah naupangte diakdiak hehpihhuai phadeuh hi, ci hi. A om nading uh inn mel lo mel a nei lo, a nek tawm ding uh zong tawm-a lam dung lam vai-a vak kawikawi naupang zong tawm lo hi.

Khua a vot sim mahmah ni zingsang khat American galkap khat London khua sung ah vakin a galkap phualpi omna lam uh zuan-in hong ciah kik hi. A jeep hawl kawmsa-in lam kiu khat ah a kiheii leh, moh ki-emna mun (bakery) khat ah naupang khat in a pualam limlang kawm (glass wall) pan a nak pek liang-in a sunglam en-a om mu hi. Tua inn sung ah bel moh bawlpa in a mohte thuk (oven) ah a em-em kawmin a em lai dingte bawl-in maida mekmek kawm hi.

A gil a kial mahmah naupang’ mit in moh bawlpa khut a tattatna ah zui kawikawi zawzen-a, a gilkial lua-in duh lua hi ding hi ve’n a ciltui bang kai kawm liang hi. Galkappa in zong a jeep khawlsakin tua naupang’ omna ah hong pai a, naupang bang mah-in a et leh, moh bawlpa’ moh emte lim tuak lua mahmah, thuk (oven) pan a tet khiat ciangin khu litlit zawzen-in so neiineii bek-a, kuang sung ah a koih ciang bangin a kikang tung hi lua ahih manin kizial niangniang bek hi.

Moh empa in tua mohte khat khit khat em-em a a zuak dingin tau tung ah gual diudeu hi. Naupang in lah ciltui kai liang mah-in en-en keii hi. Galkappa in naupangno kiang ah,

“Nang hua mohte na duh hia?” ci-a a dot leh, naupang in,

“Ah… duh tazen mah lo dia!” ci-in dawng kik sai keii hi.

Tua American galkappa inn sung ah va tum vingvengin tua mohte dozen khat (mal 12) va lei a, ip sung khat ah guangin hong paikhia kik hi. Tua naupang kiang ah hong pai-a nuihmai hiuhiau kawm sa-in,

“Nang’ ading hi ei!” ci-in pia hiauzen hi.

Tua mun pan kiheii-a a paikhiat laitak, a puan mong kikai ahih manin a kiheii kik leh, tua naupangno in lungdam lua ahih manin khitui mualtuangsa-in,

“Nang Pasian maw?” (Mister…are you God?) ci-in dong ngeu tazen, ci hi.

Kam tampi pau kul lo, thu tampi gen kul lo-in tua American galkappa’ tatzia in Pasian’ tatzia sun (Pasian’ tatzia tawh kibang) hi mawk ding hi. Napangno in tua bangin ngaihsun hi ngel ding hi. Pasian pen a hehpih, a khuatuah Pasian hi a, a lainat den Pasian ahi hi. Itna Pasian ahi hi. I tat i heknate in Pasian a sun hiam? I mukpau i kampaute in Pasian a sun hiam?

Pasian bel hi het kei hangin Pasian’ tate, Pasian’ mite bel hi ngel pha mahmah hi hang! Zam Khat Kham