Nalawm numei in nang hong simngaih ahiam? ~ Job Cinpi

Nalawm numei in nang hong simngaih ahiam? ~ Job Cinpi

Na innveng nu le na lawm numei in hong sim ngaih leh – Numei le pasal kilawmta ahi a, kivengta cih ciang tawh khat le khat tawh kizopna pen khat veivei ciangin upmawhna sangin na thuk lut nuam zaw thei hi. Lawmta khat, vengta khat kizopna sangin aman ei’ tung ahi a, en ama tungah ahi zongin lawmta itna sangin a sang zaw itna kinei thei hi. Tua ahih manin numei khat in ama lawm pasal khat sim ngaih khinkhian ahihna a kilangsak thu pawlkhat en kawm ni….

1. Na duh theih ante thei nuam

Nang a bang an namte duh thei cih thei nuam mahmah a, tua na duh ante a theih ciangin ama annek zong kikhel zo thei hi. Zingsang na kiallap nek khatpeuh ama nek ngeite ne nawn loin nangma nekte ne nuam dinga ahi zongin tua pen a mawk nek hi loin amah le nang na kibatna uh om ahih lam na theih ding ut ahih manin tua thu na theih nading zong lampi tuamtuam zong ding hi.

2). Na kiang ah om nuam

Na khiang ah om nuam den ding ahih manin lawmta khat vengta khat hihna sangin nang hong kizoppih zaw dinga, ahi zongin tua bangin a mawk om dingin amah le amah kisuang ahih manin lawmta na hihna uh le vengta khat na hihna uh siksanin thu vaihawm den ding hi. Gentehna, na gei ah a om nop manin nang bek mah ama lawm hoih pen ahihna le midang lawm nei lo ahih manin haksatna ahi a, thu khatpeuh a neih ciangin thu a kikuppih ding nang bek mah om hi den ding hi. Lawmta khat/vengta khat kizopna sangin a khangval zaw ci ka hih manin na tungah lawmcitak lungsim a nei na lawm hoih khat a tuaci dingin muangmawh kha kei in. Na kizopna uh kisia zo ding hi.

3). Na kampau hong cing

Na kampau khempeuh hong ciing den ding cihna hi lo a, na kammal zatte sungah a nuihzakhuai , a khel pian, a uang pian, cih kammal na zatte hong ciing kik nuam ding hi. Tua bangin na kammal zatte hong a zat kik ding ciangin, “Na cih dan leh” ci-in nangma tung pan a copy kik ahihna gen tangtang ding hi. Tua pen amah ngiat in zong ahang thei lo dinga, nang zong na thei tuan lo ka thei ding hi.

Ahi zongin tua hang pen nang hong lunggulh ahih manin na kampau khempeuh limtakin hong ngaihsak cihna ahi hi. Na kammal zat dangte zong hong ciing thei dinga a zaw deuhin gentehna, cih sese, liang tak aw, mawk peuhmah, sese cia, cih bangin mihing khat le khat in zat dan a kibang lo, kamdangsakna le a thupi a uang thute ah a kizang kammalte hi zaw thei hi.

4). Hong en sim

Lawmngaihte en simsim cih pen a kilang khia penpen gamtatna khat ahi hi. Tua hangin na lawm numei, na innveng nu in na theih loh kaal-in nang hong en simsim dinga, hong et sim na muh vat ciangin a maizum mahmah ding hi. Tua pen numei mawkmawk khat in pasal dang khat a et sim laitak tua pasal in a muh ciangin a mauzum tawh kibang lo lai ding hi.

Tua sangin a maisumna uh le a kisuanna uh lian zaw thei hi. Ahang pen amah tawh kilawmta, lawmngaih itna ahi lo, lawmta itna tawh kizom khin na hih manun ama lam pan lawmngaih itna tawh hong it ahih lam na theih ding ut mahmah napi tua zah khat mahin aman nang hong ngai ahih lam na theih ciangin amah it kik zo lo a, na zumpih khak ding lau mahmah hi.

5) Patau-in lunghimawh baih

Dam lohna khat na neih ciangin na lawm dangte sangin lunghimawh zaw den dinga, amah bek tawh na om ciangin nu in a tapa a lunghimawh bangin nang adingin lunghimawh ding hi. Na innkuanpihte muhna ah tua zah khop-in a lunghimawhna kilangsak ngam khol lo thei hi. Amah bek tawh na om hun cih ciangin lawmta khat, vengta khat na hihna uh hangin na inn ah sungtum pusuak ziauziau thei ahih manin na innkuanpihte om loh tawh a kituak hun ciangin na tungah a lunghimawhna kilang zaw sem lai ding hi.

6). Heh baih

Na tungah a hehbaih mahmah tawh kibang dinga, ahi zongin tua ama hehna pen naupangno khat aheh tawh kibang lel ding hi. Thu khatpeuh na tungah hong gen ciangin tua hong gen thute tawh kisai dotna pawlkhat hong dong kik thei kha zel dinga, tua hong dot thute na dawn kik theih loh ciangin, ka thugen a ngai lo na hi ve maw ci-in heh thei uh hi.

Amah tawh lawm kingai na hih loh uh hangin ama suahni le Valentine’s Day cih nite ah amah tawh hun na neih khop ding lunggulh mahmah a, ahi zongin amah tawh lawm kingai hi lo na hih manun ama tungah na tuacih kei dinga, midangte tawh hun na nei khawm zaw kha ding hi. Tua bang hun ciangin na tungah heh mahmah kha dinga ahi hi zongin lawm kingai hi lo na hih manun a heh nading om lo ahih lam amah le amah kithei hi mah leh a heh nading zong veve ding hi.

Midangte tawh hun zang kawm dingin amah zawn masa hi le cin zong ut peuhmah lo ding hi napi a hun a khen zawh ciangin bang dinga kei zong hong zawn lo ci-in heh nuam ding hi. Tua pen tua banga ni thupite ah amah na phawk khak loh, hun na piak loh a khasia pian ahi hi.

7). Hong gumtuam

Na lawmte le ama lawmte khatpeuh tawh thu na kinial uh ciangin nangma lam ah pang den ding hi. A zenzenin nang a khial zaw na hih leh zong na thu kinial uh hong phiatmitsak ziau lel dinga, a kikaal ah thudang khat hong sung ziau kha thei ding hi. A zaw deuhin nang hong gensia nuam pen khatpeuh na lawmte sungah om kha zezen leh tua mi pen en thei nawn lo pah dinga, na tungah ama hoih lohna hong gen nop loh hangin tua nu tua pa tawh na kithuah leh kidawm pian le teh, na kampau kidawm le teh ci-in hong theisak ding hi.

8). Hong pimuh

Numei ahi a pasal ahi zongin it le ngaih mi khat pimuh a zahtak cih pen a ngaina ahi hi. Mi khat in nang hong it ci napi, a gamtat a kampaunate ah hong pimuh lo, hong zahtak bawl lo ahih leh tua mi in nang hong it a cih hangin a kampi bek hi lel dinga, kidop theih zahin na kidop ding hi ta hi. Numei khat in a lungsim takpi tawh a it a ngaih pasal khat pen pimuh pah a, a diakin tua ama it pasal thugente umin muang pha deuh uh hi.

Tua hangin numeite in pasalte tung pan kamciam (kiciamna) ngen den uh hi. A muan loh manun a ngen hi zaw lo uh a, ama tungah kiciam ahih manin hih mipa in kei hong it hi ci-in amau le amau a kilungmuangsak nuam uh ahi hi. Numeite in pimuh pasalte kampau thupisakin ciamteh thei uh-a, Tua hang mahin zong pasal pawlkhatte dongtuak kik thei zel uh hi.

Nidang lai a na gensa kammalte tawh hong mawhmat kik hun zong om dinga, tua hun lai-in tua mun ah, tua bangin na gen ve leh ci-in na kammal zatte nangawn mangtangsak loin a gen bang lianin hong gen kik thei lai ding uh ahih manin, numeite pen mawhna ciamteh hat ci-in minsia kik thei leuleu uh hi.

9). Amah na zolna kamkhum za nuam

Mun khatpeuh ah amah tawh pai khawm dingin na zot ciangin a ut lo kineih masa phot thei hi. A ut lo taktak hi saam lo a, hehpihna tawh hong zui ta peuh ve lawm, kei bek ka pai ding ut keng, hong paipih le teh ka lung nak dam in teh, kei hong huh thei ding nang bek mah om hi ve cin, cih bangin nang ading amah kisam ahihna thu kamkhum tawh gen a amah na zol ding a ut ahi hi. Tua bangin na zol ciangin bang zahtakin vai dang hau hi mah leh nang mah hong masak veve ding hi.

10). Numei dangte tawh hong zasa

Numei dangte thu ama tungah na gen ciangin lawmta khat bangin na thugen hong ngaihsak lo dinga, a lawmngaih pa in ama tungah numei dangte thu a gen bangin ngaihsun kha ahih manin numei dangte thu hong gen nawn ken ci-in hong siang gen, hong hap bak ngam loh hangin na thugen za nuam het lo ahihna kilang mahmah dinga, ama tunga na gen numeite tawh na kithuah khak lohloh theih nadingin vaihawm kha ding hi.

11). Na kilawn khak ding uh lunggulh

Hih pen zahmawh thu lam gen nopna ahi lo hi cih kong gen nuam masa hi. Numeite zia pen lamdang mahmah uh a, numei khat le pasal khat a khut a khe (a vun) uh a kitaat khak pak nangawn pasalte sangin numeite lungsim sungah a thuakna uh lian zaw hi ci-in nulepa thu a sittel mipilte in gen uh hi. Thuak cih kammal ka zat ciangin a lang tuak a huam hi pah hi. Nuammawh sa cih zong hi thei a, nuam sa cih zong hi thei hi.

Gentehna, pasal khat in numei khat a hehsak khak ciangin a zol kik dingin a heh numeini’ khut a letsak ciangin tua a heh numei in, hong lawng vet kawh, hong sukha vet kawh ci thei hi. Bangin hangin tua bangin ci thei a hiam cih leh numei khat adingin a cii / a vun pen ama lungsim thuakna tawh kisai ahih manin amah a hehsak mi khat in amah a lawn khak ding pen deih vat lo, ut vet lo hi.

Tua bangin numeite in amau cii/vun tungah lungsim thuakna lianpi nei uh ahih manin itna thu ah zong (zahmawh lunggulhna om lo) numei pawlkhatte in a it a ngaih pasalte khoih le lawn ding lunggulh thei uh hi. Hih kikhoih kilawnna thu ah numeite in zahmawh lunggulhna tawh khoih le lawn ut uh ahih khit lohna thu pen numei le pasal kilamdanna thu a kantel, sittelna a bawl mipilte in kiciantakin gen uh hi. Pasal pawlkhatte in hih thu telsiam lo uh ahih manin numei khat ama ang sungah tawm khat puk kha peuh leh ngaihsut loh ding teng ngaihsun pah zangzang thei uh hi.

12. Nang hong muang hi

A nu a pate zah mahin nang hong muang ahih manin a sung thu zong hong gen ngam lel dinga, ahi zongin nang hong lunggimsak nuam lo ahih manin a haksatna le a lunggimna khempeuh hong gen khin den lo ding hi. Amah bek in siangsak zo nawn lo a, cih nading a theih nawn lo ciangin nang hong ko’ ding hi.

13. Nang tawh hun sawtpi zang nuam

Nang tawh a zat khop hunte a sawt theithei dingin gal hi. Gentehna, mawtaw, setbing cihte zat theih hi napi khe tawh pai khop ding zong phamawh sa lo, ut zaw lai, amah tawh na hawh na vak khop uh ciangin gilkial dangtak hi masa lo napi, sai khatpeuh ah amah tawh hun na neih khop ding a lunggulhna tawh sum na neih khol loh lam a theih hangin hong aana khol lo thei hi. Nang tawh hun la niam ahih manin ama neihsa a zat ding zong itsik tuan lo ding hi.

Hih a tunga thute tawh khat le nih a kituak manin na lawm it numei khat in nang hong sim ngaih hi ci-in ummawh pah kei inla a tunga kigelh thu khempeuh tawh a kituak khin sitstel kei zongin a tam zaw tawh a kituak leh cihna hi bek ahih manin nangma upmawh thu tawh ka lawm it numei khat na tan lawh khak loh nadingin kidawm siam zaw in. Job Cinpi