Najib kimantading cih thuthang hangin Reporter te’n a innmai ah ngakcippah ngeingai

Najib kimantading cih thuthang hangin Reporter te’n a innmai ah ngakcippah ngeingai

Abeisa in Malaysia gamsung ah Prime Minister asemlui ahi Datuk Seri Najib Razak pen zannitak in kimankhia tadinghi cih thuthang kiza ahih manin Reporters honkhat in delhpah ngeingai uh cih Bernama pan kiza hi. Najib kimanding cih thuthang akizak ciangin Taman Duta, Jalan Langgak Duta aom Najib ii innmai ah Reporter bekbek mi 30 bangin delhpah ngeingai uhhi.

Ahi zongin hihvai tawh kisai in Bukit Aman Commercial Crime Investigation Department Director Datuk Seri Amar Singh Ishar Singh tungah akidot ciangin tua thuthangpen thumanlo hi, Rumour hi ci’n genkhia hi.

Malaysia gamsung ah golhguk ane te apholakkhia leh amankhia kipawlna ahi Malaysian Anti-Corruption Commission (MACC) Commissioner Datuk Seri Mohd Shukri Abdull tungahzong akidot ciangin Najib innpen kibuluhna “Raid” omlo hi, kimatna zong omlo hi ci’n genkhia hi.

Najib ii inngeiteng ah Police Personnel te’n limtak in ngakcip, encik gigelai uh cihzong kiza hi.

Abeisa in Prime Minister Tun Dr Mahathir Mohamad in 1MDB (1Malaysia Development Berhad) vaitawh kisai in sum Billion tampitak supna om ahih manin, Najib pen thu kibawlding hi ci’n genkhia ngeihi.

Tuavaiteng hangin Najib Razak leh azi Datin Seri Rosmah Mansor tepen gampualam ah azinkhiatheilo, ataisim theiloding inzong Immigration Department te’n Blacklist sungah koihsak in, gampua apaikhiatding aki khakcip ahihi. Zanni in Najib kimantading cih akizak ciangin Reporter leh Media tuamtuam te lawpmahmah in delhpah ngeingai uh a, ahi zongin aki mantaktakding nahinailozel hi. Najib ii kimatkhiatding pen ki ngaklahtuak mahmahleh kilawm hi.

1MDB Scandal vai, sum neksimna vaitawh kisaipen 2015 kumpekpan akipankhia ahihi. Ahi zongin tualai in Najib Razak pen Prime Minister aseplaitak hi a, bangmah khialhna kaneikei hi ci’n Najib in nialcipden hi. Tuaban ah 1MDB vai akansawm Malaysian Anti-Corruption Commission (MACC) makaite pen Investigation abawl hangin khakcipsak pahpah kici hi.

1MDB sumvai tawh kisai in Najib in ama mimal Personal Bank Account sungah RM2.6 Billion (US$681 Million) lutsak kici a, tuavai akikan ciangin Saudi Royal kumpi te’n Donation apiak hi cihtawh khupcip sukziau hi.

Tu’n Dr. Mahathir in Prime Minister hongngahkhiat, hongsep taktak ciangin tua 1MDB vai hoihtak in aki kankik theipanding ahihi.

More: Najib innsungpan sum akimanteng kisimkhinta, RM114 Million pha

Najib ii abeisa sumvai tawh kisai 1MDB gamtatna vaipen tulaitak hoihtak in aki kanciansan laitak hi a, tua Result tungtawn in Najib pen thong akiatleh akiatlohding ki khentatding hi ci’n Dr. Mahathir in genkhia hi. Abeisa in mattheih taktak nading mawhmat kician, Evidence kician taktak kimu nailo himahleh tuni akipan 1Malaysia Development Bhd (1MDB) Special Task Force cih kipawlna in mawhpuakla in Najib ii sumvai limkansawm mahmahlai uhhi. Sawltak #zomidaily