Na ngaihsutna in Zogam kikhel sakzo dinghi

Na ngaihsutna in Zogam kikhel sakzo dinghi

British Emperor le a dang Colony Gamkek te khut sung pan suahtak hun a kihual Gam tuamtuam te Kum 60 khit ciang in a Khantohdan uh hong kihual dimdiam het lo hi.

Myanmar gam in British te khut pan a suahtak cil in Asia ah a haupen lak ah kihel hi. Tuhun ciang in Leitung ah a zawng pen lak ah a bul lam in kihel hi.

Myanmar Gam a pian cil hun tawh kinai in Korea gam thu en leng kician zaw kan lai hi.

Gam khat, minam khat, pau kibang te hinapi Gamvai Tangpivai Kalsuanzia (ideology) kibat lohna huhau in nasiatak in tualgal (1950 June) piang in, kum 50 khit ciang a Korea khat pen Leitung ah ahau pen Top 15 lak ah hong kihel in, Amau Minam te khansau cidam in, a kampau a ngeina, nek le dawn te a kipan mataw te, electronic van hoih nono te dong in leitung zeel zo uh hi.

A lang khat N-Korea te hi leh a mipi te zawng in, nek tawm ding haksak in, a gi lo mahmah Thukici khempeuh a lencip Makaipipa khat nuai ah nungta uh hi. Ama lungsim tawh kituak lo te, ama mun a luah thei ding in a upmawh leh sanggam unau cih zong omlo in lipkhap huai tak that ziauzaiu hi. Amau tuahkhak gentheih haksatna te pen US le apawl te leh a kidempih uh S-Korea te hang hi ci in Kumpi Media pan tangko sak den lai hi. Leitung apualam mite muhna ah ahih leh mipi te hehpihhuai kisa hi. Kua mah tawh kilempih anei lo, Gal a deih, gamkiim gampaam te a linglawng sak den gam, Leitung tawh kizopna a nei lo a tuam vilvel a om gam hong suak hi.

Akilangh pen in S-Korea te pen mimal in a tun ngiat uh sangzaw, khansau zaw, nuntakna nuamsa zaw, suakta zaw uh hi. Zan ciang in S-Korea gambup mei a tangzihziah laitak in N-Korea pen mialcip hi.

Bang hang hiam?

Ahangin, amau le amau le amau kiuk na nuai a tun khit nung ah mipi sung ah atamzaw ii san theih thupomzia, mipi te tung ah a thuzawh, thugen a siiam, mite lungsim a zo a makai te ii let thupomzia i lamlakna, ki pattahzia l (ideology and political culture) te hang ahi hi.

Tulaitak in zong Zomi te in i ngah ding a kilawm mahmah thu ahi “ei le ei ki uk zawhna bukim”(Federal /Self-determination) i ngah gai nai loh hang in, a beisa Galkap Kumpi hun dan kihi nawn saam lo hi. Kiukna lam, Khua le Tui vai te akipan mun tuamtuam ah ei deihna bang in gamtat theihna tawmtawm i nei ta hi.

Abeisa hun te ah ilungsim sung ah hong uk, imuh isin ituah thu te in tulaihun a Gamvai Minam Vai ah i thupomdan, dik i sak thu te, i gamtatzia te hong piang khia sak hi.

Tulaitak a isep thute ii gah in mai lam hun khang sawn te hun ah summuhna, pilna, cidamna, khantohna, lungnopna te piang sak thei ding a, alang khat ah Mihing bawltawm gentheih haksatna lianpi zong piang sak thei ding hi.

Hih bang hunpha i ngah sungin Gamvai Minam kalsuanzia, Kimakaihzia nam tuamtuam sung pan Zomi (amihing) le Zogam (aleitang) hong lamsang sak thei ding thu te ngaihsun in, kikum in phuangkhia, kihilh kipattah theih ding thupi mahmah hi.

Leitung gamlim te zong a kikhelkhel hi lel hi cih thu siksan in; Zogam zong a tawntung in Kawlmang te ukna nuai ah om suak den ding cih kigen thei lo hi.

Ei lei ei i kithawi siiam kei leh a kithawi akiging te in tua mun hong luah ziau ding hi. Tua ban ah, ni khat ni ciang in, ei le ei kiukna i ngah ni hong tung thei lai ding hi.

Tua hun ciang in bang ci kiuk, vaihawm ding cih te ‘a thak’ in kipankhia pan ding hi leng khua nung phawk hak lua ihi ding hi hang.

Apua lam ah mit tawh akimu thei khangtohna khempeuh pen lungsim mitkha sung ah kiciantak le cimtaak liang in i muh khit ciang, haksatna tampi te hangin lungkia lo in i mainawt khop ciang in hong piang khia pan ahi hi.

Mai lam Zogam hong bang ci kikhel ding hiam? Zomi te kikoi ci nuntak ding hiam? Gamvai bang kiukna nam hi ding hiam? Asia hi ta leh Apha hi ta leh – khang khat tawmvei sung, minam khat hihkhopna tawh a nungta khawm kha nang le kei te tung ah tampi kinga hi.

Zogam le Zomi te khantohna dingin makai khat le nih vaihawmna bek tawh tangtung zo lo a, ei mimal kim in i hih theihna tek pan ma ipang ciang in hong tangtung ding ahi hi. Siambawi