Na kizatna gam zaisak semsem in ~ Hau Za Cin

Na kizatna gam zaisak semsem in ~ Hau Za Cin

Kizatna gam zaisak ding cih ciangin a lianzaw, a sangzaw, a golzaw, a tangzaizaw in kizang semsem in cihnopna hi. Mihing khat pen Lai Siangtho in a gen mah bangin ‘neucik a muanhuaíte lianpi ah zong muanhuai ding’ ci ahih manin ‘neucik a kizang a zat theih mahmahte lianpi ah kizang leh zong zat theih mahmah toto hi. Tua ahih manin na kizatna ciangciangah muanhuai in sem in mite muan theih dingin om in. Mite muan in om in mite zattheih dingin na om nak leh mite hong muanna in a lianzaw sem ah hong khangkhan dinga hong zatnopna uh hong deihna uh khang semsem ding hi. Tua dingin khatvei thu in kingah pah lo a, na kisin ding zong tampi om ahi hi. Neuzaw, daizaw a kizatna mun ah a kizang thei mahmah vai thupi leh vai golzaw ah a kizang thei hetlo zong mi om veve hi. Ahang pen amah na kisin toto lo ahih manin a tunna kisangkhai lo hi.

A taktakin mihing khat pen a dinmun kikhai toto kei leh a kiam suk lam ahih loh hang a lungkiat huai zaw hi gige hi. Temta nangawn a kitat zel kei leh a hiamloh mah bangin mihing zong kisin zel, kisui zel, kipuah zel kei lehang i khangto tuan kei hi. I muh a zai kul a, i theih a tam kul a, i zakna a zai kul a, i ngaihsutna i liatsak kul a, tuate khempeuh a kisapna mun ah i zat theih ding kisam hi.

Mihing khat a kikhangkhan zel nadingin bang kisam hiam cih leh nisim thupiang a theih loh phamawh hi. Leitung mun tuamtuam a thu kipei kawikawite, kidemna te, mite lungsim paizia leh kumpi vaihawm dan kihei zelzelte a theih kisam hi. Sum bawlna kikhek ziahziah lak pan a huampi bek a theih kisam hi. Mipite lunglutna lam ah a minthang vangvang diakte zong a hunkhop mah a theih kisam hi.

A vekpi in theihzawh ding ahih loh hangin a theihnop lam a theih tam mahma kisam a, a theih nailoh a tuak khak a om leh a theihnop ding kisam a, a lunglutloh lam zong a tuak khak leh a lunglut bangin a seppih theih kisam hi. Tua manin thuthak, vaithak, kal thak khat peuh ah a kisin ut mi ahih ding kisam hi. Tua banga mihing a kisin totote mipi adingin a kisapna leh a kizat theihna hong tam semsem a, amah zong zattak hong suak semsem hi. Khatvei tem hiam a kizat khit ciang a kitat kik zel kei leh a kizat kikkik hangin a hiamna kiam mahmah bangin mihing in a theihna a behlap den kei leh mite in hiam a sakna, a deihna, a lunggulhna kiam mahmah den hi.

A kisap leh laitan sangzaw zong a kisin ngam ding ahi hi. Laitan kibehlap thei cih pen pilna ngah pah veva ding cihna ahih loh hangin mite tawh kikholhna panin omdan khuasak luhek dan kithei thei hi. Ahi zongin Master degree leh Doctorate degree in hong piak theih khitloh pilna tampi om a, tuate zong na zon ngap ding kisam hi. Tuate sim to ngap in sim zo peuh lecin zong lah na ngaihsutna leh na muhzia kilamdang hamtang veve hi.

Tuhun ciangin sanginn ah va pai tangtang selo in zong pilna zon theihna tampi omta hi. Online panin zong pilna kingah thei a, thukizakna laidal tung pan in zong pilna kingah thei a, laibusal panin zong pilna kingah thei hi. Pilna neite tawh kikholhna leh amau kamgenna pan leh amau ngaihsutzia pan zong pilna tampi kingah thei hi. Tua ahih manin tuate a zuih ngap, a kisin ngap ding kisam hi. Hilh leh tai cianga khasia pah, hehpah, lungkia pah cihte adingin ngaihsutna ciim tak leh kip tak a neih ding uh baihlo kha ding hi.

Thuakzo ding, thuak ngap ding, lungduai kisin hamtang ding, mite hong sinsakna, hong hilhna te telsiam a thuak mualsuak zo mite in pilna sangzaw leh gina zawh ngah hamtang uh hi. Mi tawh kisawh khalo a laibu leh laidal tung pan, internet tung pana pilna ngahte adingin zong na kizoppih dniguh mihing mah ahih manin mite tawh na kikholhsiam mah uh kisam veve ding hi. Tua ahih kei leh a thu in thei dingin a taka zangkhia thei nawnlo ding hi. Khuak sunga theihna tampi om pen sum tampi nei in zat theih loh a bank ah kikoihcip bang hi. A kizang ngeilo hauhna sangin a kizang thei mahmah neihsunsun pen manphazaw hi.

Pilna na neihna lam, siamna na neihna lam ah tua bang mite kipawlna khawng a om leh na lut theihna dingin na ngaihsut, na delh, na vaihawm a na hanciam ding thupi mahmah ding hi. Tua banga kipawlna mun ah mimal khat hile cin na theihna lamte vai khat peuh ah nang zong mite muhzia, ngaihsutzia, nasepzia, maban kalsuanzia ding cihte na va siim thei dinga, nangmahmah in na phattuampih ding hi. Tua muna meetna na ngahte in nang mite adingin na kizat ciangin hong huh ding hi. Tua ahih manin kikhoppi, kimuhkhopna cihte a om leh va kihelsawm hamtang in. Thu leh la kizakna a neih uh leh zong tuate laihawm sim hamtang in.

Gentehna in: Sangsia na hih leh sangsiate vai khempeuh ah na hihtheihzahin kihel in a paizai theihsawm in. Pastor bang na hih leh zong na seppihte sepzia leh a khantohnate uh theihsawm in kikholhpih in. Niangtui dawn kawm, anne khawm kawm cih bangin kimuhpih hau mahmah lel inla, na hun manpha taka na zattheihte meetbawl siam in. Nang hong pattah thei ding mi a om leh zong kipattahsak in. Pattah theihin in na om leh zong mi thumang khat, mihilh theih khat na hih manin a hampha khin na hi hi. Na siamna lam tawh kisai a mite na huh theihna a om leh zong va huh lecin mite in hamphatpih ding uh a, nang zong na hamphatpih ding hi.

Laibu sung mah ah pilna kikhum penpen ahih manin laibu sim tawlnga kei in. Laibu khat bek simlo in om kha ngei kei in. Sim theih na muh peuh sim inla, nang kisapna lam bang sim pelmawh in. Mite hong muanna leh hong dot ding thute lam peuhmah simsa, theihsa, taisa dimdem in na koih in. Tua hileh mite hong muanna leh muhna uh kidang pah ding hi. Online pan na sim theih laigelh zong tampi omta a, tuate zong sim hamtang in. A kimang tumtek lo internet sungah sim theih tuamtuam te tawh hun tam beisak kei in. Na meetpih ding thute zong zongsiam in hanciam mahmah in.

Theihna na neih khit hangin na theihna te mite muh theihi na zatkhiat theih kei leh a meetna omlo a, khuak sunga theihna bek pen a meetna tawm zaw hi. Thei ding, zang thei ding, zuun thei ding, mite hilhsawn thei ding – tua hileh kicing dipdep hi. Tua ahih manin na siamna na theihna na zattheihna dingin nasep na kisin kul hi. Na siam lam khat ah kisinna dingin na kipat kul hi. Mite sep laitak a om leh zong na huh theih thu hilh in nang zong na kiguanlut theih leh manpha semsem ding hi.

Midang hauzacintawh semkhawm in hanciam khawm lecin ‘pankhawm’ a sin hipah a, nangbek sep theih sangin mite tawh kikum a sep theihna pen kideihzaw lai, kipzaw lai hi. Na kitathiam theihna ding lampi om khempeuh ah vai zong inla, na sep theih khempeuh ah sem in na kisin theih khempeuh kisin mang lel in. Na zat pah theih a om mah bangin nidang cianga na zat ding zong om toto ding hi. Nang theih bek hilo in midang zong a pattah thei ding zah, a kisinsak thei ding zahin hanciam in kilamto in.

Sangkah a kul leh sangkah, sepna tawh kisin ding ahih leh kisin ngap, laibu simna pan theihna pilna kibehlap ding ahih leh laibu sim, mi tawh kihona kikholhna sepkhawmna pan na meetpih ding hamphatna ahih leh khatzong siitlo in na hanciam ngap kisam hi. Tua manin na kizatna na zaisak semsem nop leh ‘kisin den ngap in’ ‘kisin den hamtangin’ lungkia lo in hanciamin haksa lua ciin thalpuk ngei kei in. Mothak na hih loh hangin nang zong na nunglam sangin na mailam sauzaw hamtang hi cih phawk in mangngilh ngei keiin. Hau Za Cin (Phuitong Liim)